3. Israddedigion rhan-amser

O fis Awst 2018, bydd israddedigion cymwys rhan-amser sy’n fyfyrwyr am y tro cyntaf yn cael cymorth tebyg i fyfyrwyr amser llawn ar sail pro rata. Bydd y cymorth hwnnw ar ffurf cyfuniad o grantiau (Grant Dysgu Llywodraeth Cymru) a benthyciadau (Benthyciad Cynhaliaeth).

Os byddwch yn bodloni'r meini prawf cymhwystra ac mae eich cwrs yn dechrau ar neu ar ôl 1 Awst 2018 bydd swm y grant a'r benthyciad a gewch yn dibynnu ar ddwyster eich cwrs ac incwm eich aelwyd. Mae'r ffigurau isod yn cynnig canllaw i fyfyrwyr rhan-amser newydd yn unig ac maent yn dangos yr uchafsymiau y gallech eu cael.

Yn y rhan fwyaf o achosion mae'n hawdd nodi a ydych yn fyfyriwr newydd neu'n un sy'n parhau i astudio, ond mae'n bosibl y bydd yna amgylchiadau sy'n seiliedig ar gwrs dysgu blaenorol a allai effeithio ar beth y gallwch wneud cais amdano a sut y gallwch wneud cais. Os byddwch yn ansicr a ydych yn gymwys fel myfyriwr newydd neu un sy'n parhau i astudio, gofynnwch i'ch Prifysgol neu i Cyllid Myfyrwyr Cymru i gael gwybod eich statws.

Rhaid ichi fod yn astudio cwrs sydd â dwyster o 25% o leiaf i gael grant a benthyciad.

Enghreifftiau o ddwyster cwrs Incwm aelwyd Grant Cynnal Benthyciad Cynhaliaeth  Cyfanswm
25% £25,000 neu lai £1,500 £203.75 £1,703.75
25% £45,000 £769.25 £934.50 £1,703.75
25% £59,200 neu fwy £250 £1,453.75 £1,703.75
50% £25,000 neu lai £3,000 £407.50 £3,407.50
50% £45,000 £1,538.50 £1,869 £3,407.50
50% £59,200 neu fwy £500 £2,907.50 £3,407.50
75% neu fwy £25,000 neu lai £4,500 £611.25 £5,111.25
75% neu fwy £45,000 £2,307.75 £2,803.50 £5,111.25
75% neu fwy £59,200 neu fwy £750 £4,361.25 £5,111.25

Bydd Cyllid Myfyrwyr Cymru yn cyfrifo faint o Grant Cynnal y gallech ei gael yn gyntaf, a bydd yr hyn sy'n weddill yn cael ei roi fel Benthyciad Cynhaliaeth. Bydd eich grant a'ch benthyciad yn cael eu talu'n uniongyrchol i'ch cyfrif banc ar ôl ichi gofrestru ar eich cwrs ac ar ôl i'ch presenoldeb gael ei gadarnhau gan eich prifysgol neu eich coleg bob tymor.

O dan y pecyn cymorth newydd, gall myfyrwyr cymwys rhan-amser sy'n astudio cwrs sydd â dwyster o 25% o leiaf wneud cais am Fenthyciad Ffioedd Dysgu i helpu i dalu costau eu ffi dysgu. Caiff eich Benthyciad Ffioedd Dysgu ei dalu mewn tri rhandaliad i'ch prifysgol neu i'ch coleg yn uniongyrchol ar ôl i'ch presenoldeb gael ei gadarnhau.

Lleoliad eich cwrs Y Benthyciad Ffioedd Dysgu sydd ar gael yn 2019/20
Os byddwch yn astudio mewn prifysgol yng Nghymru neu'n astudio yn y Brifysgol Agored £2,625
Os byddwch yn astudio mewn prifysgol neu goleg yn y DU ond y tu allan i Gymru £6,935
Os byddwch yn astudio mewn prifysgol neu goleg yn y DU ond y tu allan i Gymru sydd wedi'u hariannu'n breifat £4,625

 

Ni fydd angen i’r rhan fwyaf o fyfyrwyr dalu dim ymlaen llaw am eu cwrs. Os bydd eich prifysgol neu eich coleg yn codi tâl sydd mwy na'r Benthyciad Ffioedd Dysgu sydd ar gael, bydd rhaid ichi ariannu'r gwahaniaeth eich hunan (mae'n bosibl mai dyna'r sefyllfa ar gyfer prifysgolion neu golegau a gaiff eu hariannu'n breifat).

Os byddwch wedi eich derbyn ar raglen cyfnewid Erasmus, ni fyddwch yn gymwys i gael Benthyciad Ffioedd Dysgu.

Cofiwch, nid oes rhaid ad-dalu grantiau fel arfer, ond bydd rhaid ad-dalu benthyciadau gan gynnwys y llog. Gallwch gael rhagor o wybodaeth am ad-dalu benthyciadau a'r llog y bydd yn cael ei godi ar wefan Cwmni Benthyciadau i Fyfyrwyr.

Yn ychwanegol at gymorth ar gyfer costau byw a ffioedd dysgu, gallech gael y cymorth canlynol:

Grant Gofal Plant – gallech dderbyn Grant Gofal Plant fel cyfraniad at gost eich gofal plant os bydd gennych blant mewn gofal plant cofrestredig neu gymeradwy ac rydych yn astudio cwrs sydd â dwyster o 50% neu fwy. Ni fyddwch yn gymwys ar gyfer y grant hwn os byddwch chi neu eich partner yn hawlio'r elfen gofal plant sy'n rhan o'r Credyd Treth Gwaith neu'r Credyd Cynhwysol, Lwfans Gofal Plant y GIG neu Gofal Plant Di-dreth oddi wrth Gyllid a Thollau Ei Mawrhydi. Bydd maint y grant y byddwch yn ei dderbyn yn dibynnu ar ddwyster eich cwrs, hyd at yr uchafswm sydd ar gael ar gyfer myfyriwr rhan-amser.

Lwfans Dysgu i Rieni - gallech dderbyn cymorth ar gyfer costau sy'n gysylltiedig â chwrs astudio os bydd gennych blentyn neu blant dibynnol. Yr uchafswm y gallech ei gael yw £1,557 y flwyddyn, ond bydd hynny'n dibynnu ar incwm eich aelwyd a dwyster eich cwrs. 

Grant Oedolion Dibynnol - gallwch wneud cais am Grant Oedolion Dibynnol os bydd gennych bartner neu oedolyn arall sy'n ddibynnol arnoch. Ac unwaith yn unig y gallwch wneud cais am y grant hwn. Yr uchafswm y gallech ei gael yw £2,732 y flwyddyn, ond bydd hynny'n dibynnu ar incwm eich aelwyd a dwyster eich cwrs.

Lwfansau i Fyfyrwyr Anabl - mae'r rhain ar gael ar gyfer myfyrwyr i dalu am y costau ychwanegol sy'n gysylltiedig ag astudio y gallech eu cael o ganlyniad uniongyrchol i anabledd, cyflwr iechyd hirdymor, cyflwr iechyd meddwl neu anhawster dysgu penodol. Nid yw'r swm a gewch yn seiliedig ar incwm eich aelwyd. Mae'n seiliedig ar anghenion yr unigolyn a dwyster eich cwrs. Mae'r tabl canlynol yn dangos y mathau o gymorth a'r uchafsymiau sydd ar gael ar gyfer astudiaethau rhan-amser.

Lwfans Yr uchafswm sydd ar gael
Helpwr anfeddygol £16,853 y flwyddyn
Cyfarpar arbenigol £5,657 ar gyfer y cwrs cyfan
Lwfans cyffredinol £1,420 y flwyddyn
Teithio sy'n gysylltiedig ag anabledd Gwariant rhesymol ar gostau teithio ychwanegol sy’n codi o ganlyniad i'ch cyflwr.

Bwrsarïau ac ysgoloriaethau - gallai rhai prifysgolion a cholegau gynnig bwrsarïau neu ysgoloriaethau yn ôl disgresiwn. Gallwch gysylltu â'ch Gwasanaeth Cymorth i Fyfyrwyr i weld a oes unrhyw gymorth ariannol ychwanegol ar gael ichi. Os byddwch yn astudio cwrs sy'n arwain at gymhwyster mewn meddygaeth, deintyddiaeth neu ofal iechyd, yna mae'n bosibl y gallech gael bwrsari gan y Gwasanaeth Iechyd Gwladol (GIG). Ewch i wefan Gwasanaethau Dyfarniadau i Fyfyrwyr i gael rhagor o wybodaeth.

Bydd rhagor o wybodaeth ar gael am y cymorth ychwanegol ar wefan Cyllid Myfyrwyr Cymru

Cofiwch ddilyn Cyllid Myfyrwyr Cymru ar Twitter a Facebook i gael gwybod y newyddion diweddaraf.