Ar sail yr hyn rydym yn ei wybod hyd yma am y coronafeirws (COVID-19), mae meddygon wedi cynghori bod y grŵp o unigolion a nodir yn y rhestr isod mewn mwy o berygl o gael salwch difrifol o ganlyniad i’r coronafeirws (COVID-19). Dylai unigolion sy’n perthyn i’r grŵp hwn ddilyn y cyngor a’r canllawiau ar gadw pellter cymdeithasol a gyhoeddwyd ar gyfer y cyhoedd yn gyffredinol yng Nghymru ond, wrth wneud hynny, dylent hefyd gadw mewn cof eu bod nhw mewn mwy o berygl.
Mae’r grŵp hwn yn cynnwys y rhai sydd:
- yn 70 oed neu'n hŷn (waeth beth fo'r cyflyrau meddygol)
- dan 70 gyda chyflwr iechyd sylfaenol a restrir isod (h.y. unrhyw un sy'n cael cyfarwyddyd i gael pigiad ffliw fel oedolyn bob blwyddyn am resymau meddygol):
- clefydau anadlol cronig (tymor hir), megis asthma, clefyd rhwystrol cronig yr ysgyfaint (COPD), emffysema neu broncitis
- clefyd cronig y galon, megis methiant y galon
- clefyd cronig yn yr arennau
- clefyd cronig yr afu, megis hepatitis
- cyflyrau niwrolegol cronig, megis clefyd Parkinson, clefyd niwronau motor, sglerosis ymledol (MS), anabledd dysgu neu barlys yr ymennydd
- diabetes
- problemau gyda'ch dueg – er enghraifft, anemia cryman-gell neu os tynnwyd eich dueg
- system imiwnedd wan o ganlyniad i gyflyrau megis HIV ac AIDS, neu feddyginiaethau megis tabledi steroid neu cemotherapi
- dros eich pwysau’n ddifrifol (Mynegai Màs y Corff (BMI) o 40 neu fwy)
- y rhai sy’n feichiog
Mae’n bosibl y bydd llawer o’r unigolion yn y grŵp hwn yn ofidus ac yn dymuno gwybod beth mae codi mesurau’r cyfyngiadau yn ei olygu iddynt. Yr un yw’r cyngor ar gyfer y grŵp hwn ag ar gyfer y boblogaeth yn ehangach. Wrth inni barhau i godi’r cyfyngiadau fodd bynnag, dylai’r grŵp hwn ddilyn y canllawiau ar gadw pellter cymdeithasol a golchi dwylo yn ofalus.
Yn ogystal â hyn, mae adnodd asesu risg wedi cael ei ddatblygu i helpu pobl sy’n gweithio i weld a ydynt mewn mwy o berygl o ddatblygu symptomau mwy difrifol os byddant yn dod i gysylltiad â’r coronafeirws (COVID-19). Mae’n helpu unigolion i ystyried beth yn union yw eu ffactorau risg personol ar gyfer y coronfeirws (COVID-19) ac yn awgrymu sut i gadw’n ddiogel.
Ceir rhai cyflyrau clinigol sy’n golygu bod unigolion mewn mwy o berygl eto hyd yn oed o gael salwch difrifol o ganlyniad i’r coronafeirws (COVID-19). Roedd Prif Swyddog Meddygol Cymru wedi gofyn i unigolion sy’n arbennig o agored i niwed ‘warchod’ eu hunain. Mae lefel y feirws yn ein cymunedau yn isel ar hyn o bryd ac felly mae’r cyngor i warchod wedi’i rewi.
Cymorth ehangach sydd i’w gael
Mae gwasanaeth newydd ar gael os ydych chi, neu rywun rydych chi’n ei adnabod, wedi cael ei effeithio gan y coronafeirws (COVID-19) ac angen rhagor o gymorth. Bydd hwn yn eich helpu i ddod o hyd i wybodaeth ynglŷn ag amrywiol faterion, o dalu biliau i ddod o hyd i rywle i fyw.