A5 Pont Menai: cwestiynau cyffredin

Dechreuodd gwaith Cam 1 i osod rhodenni newydd y bont ar 4 Medi 2023 a chafodd y gwaith hwnnw ei gwblhau ym mis Hydref 2024. 

Bydd gwaith ailbeintio Cam 2 yn dechrau ym mis Mawrth 2025 ac yn cael ei gwblhau erbyn diwedd mis Rhagfyr 2025, er mwyn i'r bont fod yn barod ar gyfer ei 200 mlwyddiant yn 2026.

Datblygwyd y rhaglen adeiladu gan UK Highways A55 Ltd. Maent yn gweithredu ac yn cynnal a chadw’r bont ar ran Llywodraeth Cymru drwy Gontract Dylunio, Adeiladu, Ariannu a Gweithredu (DBFO) Menter Cyllid Preifat (PFI). Mae'r cynlluniau wedi cael eu trafod gyda rhanddeiliaid.
Ni wnaethom gau'r bont yn gyfan gwbl yn ystod gwaith Cam 1. 

Cynlluniwyd y gwaith fel bod un lôn yn aros ar agor bob amser. Roedd goleuadau traffig ar y lôn i alluogi traffig i barhau i groesi'r bont i'r ddau gyfeiriad. Roedd y lôn ar gau a goleuadau traffig ar waith o 7am ddydd Llun tan 3.30pm ddydd Gwener bob wythnos.  Cafodd y goleuadau traffig eu gweithredu â llaw yn ystod yr oriau brig, er mwyn rheoli’r traffig mor effeithlon â phosibl. Cafodd y goleuadau eu symud ymaith ac nid oedd y lôn ar gau ar benwythnosau. Rydym yn disgwyl defnyddio'r un system ar gyfer gwaith Cam 2.

Rydym yn disgwyl i'r holl waith angenrheidiol gael ei gwblhau erbyn diwedd mis Rhagfyr 2025 (yn dibynnu ar y tywydd). Bydd hyn yn sicrhau bod Pont Menai yn barod ar gyfer ei 200 mlwyddiant yn 2026.

Er mwyn cwblhau'r gwaith erbyn y dyddiad hwn, bydd angen i’r gwaith gael ei wneud yn ystod cyfnodau gwyliau, gan gynnwys y Pasg, hanner tymor yr ysgolion a gwyliau'r haf. Bydd hyn yn caniatáu i'r gwaith gael ei gwblhau cyn gynted â phosibl a lleihau effaith oedi ar y rhaglen oherwydd y tywydd drwy weithio ar adegau pan fo’r tywydd yn well yn draddodiadol. Ni fydd gwaith yn cael ei wneud yn ystod gwyliau'r Nadolig nac ar wyliau banc.

Bydd y cyfyngiad 7.5 tunnell yn cael ei ddileu dros dro tan fis Chwefror 2025. Dylai hyn fod o fudd i'r gymuned leol a'r ardal gyfagos. Bydd angen ailgyflwyno'r cyfyngiad pwysau 7.5 tunnell pan fydd y gwaith Cam 2 yn dechrau ym mis Mawrth 2025. Unwaith y bydd yr holl waith wedi'i gwblhau, bwriedir i’r cyfyngiad pwysau o 7.5t gael ei ddileu yn llwyr.

Yn dilyn y gwaith cynnal a chadw a gynlluniwyd a'r argymhellion a nodwyd yn Adroddiad Archwilio 2019 i adnewyddu’r system baent ar y bont grog, gwnaed dadansoddiad technegol manwl pellach. Nodwyd mater posibl gyda rhodenni fertigol y bont.

O ganlyniad i waith modelu pellach, nodwyd risgiau difrifol a gwnaeth peirianwyr strwythurol argymell cau'r bont ar unwaith i'r holl draffig. 

Bydd y cyfyngiad 7.5 tunnell yn cael ei ddileu dros dro o ddydd Sadwrn 2 Tachwedd 2024 tan fis Chwefror 2025. Bydd hyn yn caniatáu i bob cerbyd, gan gynnwys y rhai sy'n pwyso mwy na 7.5 tunnell, ddefnyddio'r bont.

Bydd y cyfyngiad pwysau 7.5 tunnell yn cael ei ailgyflwyno pan fydd y gwaith Cam 2 yn dechrau ym mis Mawrth 2025.

Yn ystod gwaith Cam 2, caniateir i gerbydau brys groesi'r bont cyn belled â'u bod yn pwyso llai na 7.5 tunnell.

Cafodd busnesau eu hannog i ddefnyddio ein gwasanaeth Busnes Cymru i gael cymorth.

Mae llawer o fusnesau llai eisoes yn gymwys i gael cymorth trethi 100% ym Mhorthaethwy ac nid ydynt yn talu trethi annomestig, a nododd Cyngor Sir Ynys Môn 30 o fusnesau ychwanegol ym Mhorthaethwy a oedd yn gymwys hefyd o bosib i gael rhyddhad ardrethi o dan y cynllun rhyddhad ardrethi manwerthu, hamdden a lletygarwch. Fe wnaeth y Cyngor wahodd y busnesau hynny i wneud cais.

Os ydych yn credu y gallai eich busnes fod yn gymwys i gael rhyddhad ardrethi, cysylltwch â Chyngor Sir Ynys Môn i drafod ymhellach. Mae rhagor o wybodaeth gyswllt, gan gynnwys ffurflenni cais, ar gael yn Cyngor Sir Ynys Môn: Ardrethi annomestig - cynllun rhyddhad ardrethi manwerthu, hamdden a lletygarwch.

Gall busnesau sy'n atebol am gyfraddau annomestig fod yn gymwys i wneud cais i'r Asiantaeth Swyddfa Brisio am ostyngiad dros dro mewn gwerth ardrethol. I gael gwybod mwy, ewch i GOV.UK: Find a business rates valuation.

Mae'n anghyffredin iawn i’r A55 Pont Britannia gau. Os bydd yn cau, dim ond am ychydig o oriau y bydd hynny.

Pan fydd gwyntoedd cryf, cynghorir rhai mathau o gerbyd i beidio â chroesi yn ystod amodau penodol

Yn dilyn adolygiad strategol, mae’r terfynau cyflymder gwynt wedi cael eu newid ar gyfer rhai mathau o gerbydau. Felly, dylai'r bont aros ar agor i fwy o gerbydau, yn amlach ac y bydd unrhyw gyfnod o gau'r bont mor fyr â phosibl. Mae’r mesur hwn wedi helpu Cerbydau Nwyddau Trwm i fynd ar draws Pont Britannia ar yr A55 yn ystod tywydd drwg.

Yn ystod gwaith Cam 2, bydd Pont Menai’n aros ar agor i gerbydau sy’n pwyso llai na 7.5 tunnell. Bydd hynny’n golygu y gall y rhan fwyaf o’r traffig ddilyn arwyddion llwybr y dargyfeiriad.

Lle y bo’n bosibl, bydd y mesurau rheoli traffig sydd wedi’u cyflwyno ar gyfer gwaith Cam 2 yn dod i ben ar Bont Menai yn ystod argyfyngau/digwyddiadau ac os bydd gwynt uchel. Bydd hyn yn golygu bod llai o amharu ar lif y traffig (cerbydau o dan 7.5T) dros y Fenai.