A5 Pont Menai: cwestiynau cyffredin

Mae’r bont ar agor ond mae terfyn pwysau o 7.5 tunnell a therfyn uchder o 3 metr yn eu lle. Dylai cerbydau sy’n fwy trwm neu’n uwch na’r terfyn ddefnyddio Pont Britannia. 

Mae’r gwaith atgyweirio yn parhau ac mae’r sgaffaldau o dan y bont wedi cael eu gosod. 

Mae’n bosibl y bydd angen cau lonydd ar gyfer cyflawni rhai tasgau (gyda goleuadau traffig) neu gau’r bont yn llwyr. Byddwn yn ceisio hysbysu pobl o leiaf wythnos ymlaen llaw. 

Dyma’r trefniadau ar gyfer yr wythnosau nesaf:

• Ar 13 ac 14 Mai rhwng 10am a 6pm – bydd lôn ar gau, bydd goleuadau traffig yn hwyluso teithio i’r ddau gyfeiriad, bydd y bont ar agor i gerddwyr 
• O 2pm ar 15 Mai hyd 6pm ar 16 Mai – bydd y bont gyfan ar gau i draffig – bydd angen i gerbydau ddefnyddio pont Britannia. Bydd y bont ar agor i gerddwyr.
• O 8pm ar 17 Mai hyd 6am ar 18 Mai – bydd lôn ar gau, bydd goleuadau traffig yn hwyluso teithio i’r ddau gyfeiriad, bydd y bont ar agor i gerddwyr 
• O 18 hyd 21 Mai. Bydd lôn ar gau bob dydd rhwng 10am a 6pm, bydd goleuadau traffig yn hwyluso teithio i’r ddau gyfeiriad, bydd y bont ar agor i gerddwyr 

I gael mwy o wybodaeth am gyfyngiadau a chau ewch i wefan Traffig Cymru.

Bydd cerbydau sy’n pwyso hyd at 7.5 tunnell ac sy’n is na 3 metr  yn cael croesi’r bont.

Mae mesurau gorfodi yn eu lle i wneud yn siŵr bod pobl yn cadw at y terfyn pwysau o 7.53 tunnell. Gallai peidio â chadw ato arwain at eu herlyn ac efallai cau’r bont eto.

Dylai cerbydau sy’n fwy trwm neu’n uwch na’r terfynau ddefnyddio Pont Britannia.

Fel arfer, mae cerbydau argyfwng yn defnyddio Pont Britannia. Ond os bydd problemau ar Bont Britannia, caiff cerbydau argyfwng ddefnyddio Pont y Borth gan ddilyn cynlluniau teithio arbennig.

Bydd y gwaith diweddaraf yn cynnwys y canlynol:

• paentio'r is-ddec, y parapetau a’r mynediad berynnau
• atgyweirio’r corbelau concrit
• ailraddnodi'r cyfrwy tir
• uwchraddio’r goleuadau

Mae'n anghyffredin iawn i Bont Britannia ar yr A55 gau. Os yw'n cau, dim ond am ychydig oriau mae hynny fel rheol.

Pan fydd gwyntoedd cryfion, cynghorir rhai mathau o gerbydau i beidio â chroesi o dan rai amodau.

Yn dilyn adolygiad strategaeth, mae’r terfynau cyflymder gwynt wedi'u newid ar gyfer rhai mathau o gerbydau. Felly dylai'r bont aros ar agor i fwy o gerbydau, yn amlach a bydd unrhyw gau am gyfnod mor fyr â phosibl. Mae hyn wedi helpu Cerbydau Nwyddau Trwm (HGVs) i barhau i groesi Pont Britannia ar yr A55 yn ystod tywydd garw.

Rydym yn ymchwilio i safleoedd cadw ar y tir mawr ac Ynys Môn a ddylai leddfu'r sefyllfa yn ystod cau Pont Britannia yn llwyr i HGVs.

Os bydd Pont Britannia yn cau, bydd Heddlu Gogledd Cymru yn helpu i gydlynu’r trefniadau ar gyfer defnyddio Pont Grog Menai o ran cerbydau sy'n pwyso llai na 7.5 tunnell.

Dechreuodd gwaith cam 1 i osod crogwyr newydd ar y bont ar 4 Medi 2023 ac fe'i cwblhawyd ym mis Hydref 2024.

Gallwch weld mwy o wybodaeth am y cau a’r atgyweiriadau a ddigwyddodd ym mis Hydref 2022.

Mae busnesau’n cael eu hannog i sicrhau cymorth trwy ein gwasanaeth Busnes Cymru pwrpasol: Busnes Cymru: cefnogi busnesau yng Nghymru. 

Mae llawer o fusnesau llai eisoes yn gymwys i gael rhyddhad ardrethi o 100% ym Mhorthaethwy ac nid ydynt yn talu ardrethi annomestig. Yn ystod gwaith Cam 1, nododd Cyngor Sir Ynys Môn 30 o fusnesau ychwanegol ym Mhorthaethwy a oedd yn gymwys i gael rhyddhad ardrethi o dan y cynllun rhyddhad ardrethi manwerthu, hamdden a lletygarwch. Gwahoddodd y Cyngor y busnesau hynny i wneud cais.

Os ydych yn credu y gallai eich busnes fod yn gymwys i gael rhyddhad ardrethi cysylltwch â Chyngor Sir Ynys Môn i drafod ymhellach. Mae rhagor o wybodaeth, gan gynnwys ffurflenni cais ar gael yn Cyngor Sir Ynys Môn: Cynllun rhyddhad ardrethi manwerthu, hamdden a lletygarwch. 

Gall busnesau sy'n talu ardrethi annomestig fod yn gymwys i wneud cais i Asiantaeth y Swyddfa Brisio am ostyngiad dros dro mewn gwerth ardrethol. Am ragor o wybodaeth, ewch i GOV.UK: Dod o hyd i brisiad ardrethi busnes.