Ffioedd deintyddol ac eithriadau y GIG

Cewch archwiliadau deintyddol am ddim os ydych:

• o dan 25 oed
• yn 60 oed neu'n hŷn

Bydd rhaid talu am unrhyw driniaeth sydd ei hangen arnoch ar ôl yr archwiliad am ddim fel pelydr-X.

Cewch driniaeth ddeintyddol y GIG yn rhad ac am ddim os ydych, pan fydd y driniaeth yn dechrau:

• o dan 18 oed
• yn 18 oed ac mewn addysg amser llawn
• yn feichiog neu wedi cael babi o fewn 12 mis cyn i'r driniaeth ddechrau
• yn glaf mewnol i'r GIG a chaiff y driniaeth ei rhoi gan un o ddeintyddion yr ysbyty
• yn glaf allanol i Wasanaeth Deintyddol Ysbytai'r GIG (efallai y bydd rhaid ichi dalu am ddannedd gosod a phontydd)

Mae gennych hefyd hawl i gael triniaeth ddeintyddol am ddim os yw unrhyw un o'r canlynol yn wir pan fydd y driniaeth yn dechrau, neu pan godir ffi arnoch:

• rydych chi neu'ch partner yn cael rhai budd-daliadau gan gynnwys:
  • Credyd Cynhwysol
  • Credyd Pensiwn 
• rydych chi ar incwm isel, darllenwch y cynllun incwm isel
• mae gennych hawl i gael tystysgrif eithrio credyd treth y GIG neu rydych wedi'ch enwi ar dystysgrif ddilys

Gallwch ddefnyddio gwiriwr ar-lein y GIG i weld a oes gennych hawl i gael cymorth.

Gwybodaeth bwysig

• Os byddwch yn hawlio triniaeth ddeintyddol am ddim gan y GIG, efallai y gofynnir ichi ddangos tystiolaeth bod gennych hawl i hynny.
• Os byddwch yn hawlio esemptiad nad oes gennych hawl iddo, efallai y bydd rhaid ichi dalu tâl cosb.

Os oes angen triniaeth ddeintyddol y GIG arnoch, bydd y swm y byddwch yn ei dalu yn dibynnu ar y math o ofal sydd ei angen arnoch

Dylech ofyn i'ch deintydd faint fydd eich cynllun triniaeth unigol yn ei gostio. Efallai y bydd y practis deintyddol yn gofyn ichi dalu cyn ichi ddechrau ar eich triniaeth. Fel arfer, byddwch yn talu un ffi am bob cwrs o driniaeth, neu becyn gofal. Hyd yn oed os yw'r driniaeth yn cael ei rhoi dros fwy nag un apwyntiad.

Codir uchafswm ffi o £384 am gwrs o driniaeth (neu sawl cwrs a ddarperir ar yr un pryd).

Dylai eich deintydd arddangos poster am ffioedd y GIG yn yr ystafell aros.

Gwybodaeth bwysig

• Fel arfer, byddwch yn talu un ffi am bob cwrs o driniaeth
• Mae rhai pecynnau gofal yn eithrio ffioedd labordy, a allai fod yn daladwy ar wahân
• Efallai na fydd rhaid ichi dalu os ydych chi wedi'ch eithrio rhag ffioedd deintyddol y GIG

Gofal deintyddol brys

Pecyn gofal brys: £37.50

Mae gofal deintyddol brys yn cynnwys asesiad o iechyd geneuol a thriniaeth i leddfu poen neu atal y broblem dan sylw rhag dirywio'n sylweddol.

Lle bo hynny'n briodol, dylai gofal brys ddarparu ateb hirdymor a gall gynnwys triniaeth barhaol, fel triniaethau adferol, gyda'ch cydsyniad. Efallai y cewch eich atgyfeirio ymlaen os bydd angen gofal pellach arnoch.

Asesiad claf newydd

Asesiad claf newydd: £27.21

Mae asesiad claf newydd yn cynnwys asesiad iechyd a chlinigol cynhwysfawr, gan gynnwys archwiliad o feinweoedd meddal a sganiau pelydr-X lle bo hynny'n briodol.

Mae hefyd yn cynnwys gofal ataliol fel:

• Hylendid geneuol a chyngor deietegol
• Cymorth i leihau ffactorau risg fel ysmygu, alcohol a siwgr
• Gosod fflworid ar wyneb y dannedd
• Presgripsiwn past dannedd fflworid crynodiad uchel
• Selyddion rhychau ar gyfer pydredd enamel lle bo hynny'n briodol yn glinigol

Apwyntiadau adalw

Adalw: £25.00 yr ymweliad

Rhaid i archwiliadau adalw ddilyn canllawiau NICE a bod yn seiliedig ar eich lefel risg unigol.

Rhaid i'ch deintydd gofnodi eich ysbaid adalw a monitro eich iechyd geneuol i sicrhau eich bod yn aros ar y llwybr adalw mwyaf priodol.

Pecynnau gofal

Mae pecynnau gofal yn grwpio triniaethau cysylltiedig gyda'i gilydd ac maent yn seiliedig ar eich angen clinigol. Mae'r mathau o becynnau gofal, yr hyn y maent yn ei gynnwys, a'r ffioedd cysylltiedig wedi'u nodi isod:

Pecyn gofal adferol syml: £36.03

Mae'n cynnwys llenwadau, coronau dros dro, coronau Hall ac echdynnu hyd at gyfanswm o 4 dant.

Pecyn gofal adferol helaeth: £68.75

Mae'n cynnwys yr un triniaethau â'r pecyn adferol syml ar gyfer rhwng 5 ac 8 dant.

Pecyn gofal periodontol: £48.53 

Ar gyfer cleifion â chlefyd y deintgig sy'n gallu ymgysylltu â thriniaeth. Mae hyn yn cynnwys cyfarwyddyd hylendid geneuol wedi'i deilwra a dileu plac

Pecyn gofal dannedd gosod: £86.40

Mae'n cynnwys dannedd gosod uchaf ac isaf.

Nid yw ffioedd labordy wedi'u cynnwys a rhaid ichi eu talu ar wahân oni bai eich bod wedi'ch eithrio rhag ffioedd deintyddol y GIG.

Pecyn gofal sefydlogi: £75.00

Ar gyfer cleifion â phydredd dannedd helaeth (effeithir ar 7 neu ragor o ddannedd).

Mae'n cynnwys echdyniadau, gofal ataliol, triniaethau adferol, a chymorth ar gyfer clefyd y deintgig

Pecyn gofal sianel y gwreiddyn ar gyfer dannedd blaen: £91.18

Triniaeth sianel y gwreiddyn ar gyfer hyd at ddau ddant blaen (dannedd 1–3)

Pecyn gofal sianel y gwreiddyn ar gyfer dannedd ôl: £182.72

Triniaeth sianel y gwreiddyn ar gyfer hyd at ddau ddant ôl neu ogilddant.

Nid yw ffioedd labordy wedi'u cynnwys a rhaid ichi eu talu ar wahân oni bai eich bod wedi'ch eithrio.

Pecyn gofal coronau a phontydd, mewnosodiadau, arosodiadau ac argaenau: £140.44

Mae'n cynnwys:

• Hyd at ddwy goron, neu
• Bont â hyd at dair uned, neu
• Bont gantilifrog sengl a choron sengl wedi'u darparu gyda'i gilydd

Nid yw triniaethau adferol dros dro a ffioedd labordy wedi'u cynnwys a rhaid ichi eu talu ar wahân oni bai eich bod wedi'ch eithrio.

Pecyn gofal amrywiol: £25.00

Ar gyfer triniaethau sy'n dod y tu allan i becynnau gofal eraill neu'r tu allan i'r cyfnod gwarant. Gallai hyn gynnwys:

• Atgyweirio, ychwanegu neu ail-leinio dannedd gosod
• Addasu dannedd gosod
• Modelau astudio
• Cyfarpar codi brathiad
• Biopsi
• Atgyweirio neu ailsmentio coron, pont neu argaen
• Tynnu pwythau
• Trin heintiau
• Materion brys orthodontig
• Rheoli gwaedu neu soced sych

Nid yw ffioedd labordy wedi'u cynnwys a rhaid ichi eu talu ar wahân oni bai eich bod wedi'ch eithrio.

Defnyddiwch yffurflen hon i hawlio ad-daliad ar gyfer ffioedd deintyddol os oes gennych hawl i gael cymorth gyda chostau gofal iechyd. Defnyddiwch y gwiriwr ar-lein  i weld a ydych yn gymwys.