Gwerthusiad o’r Siarter Iaith

Canfu’r gwerthusiad fod cefnogaeth i’r pedair rhaglen ymhlith yr holl randdeiliaid allweddol sydd yn ymwneud â’u gweithredu.

Roedd swyddogion consortia addysg yn croesawu’r egwyddor o ddatblygu fframwaith cenedlaethol ar gyfer y Siarter Iaith. Fodd bynnag, canfu’r gwerthusiad hefyd fod angen mwy o eglurder ynghylch sut y bwriedir i’r fframwaith weithio yn ymarferol.

Cafwyd enghreifftiau o ysgolion yn gweithio ar y cyd i ddarparu cyfleoedd i ddisgyblion ddefnyddio’r Gymraeg mewn cyd-destunau anffurfiol. Cafwyd tystiolaeth hefyd o ddyblygu wrth ddatblygu adnoddau ac wrth ddatblygu cysylltiadau gyda phartneriaid allanol.

Mae’r adroddiad yn adnabod y potensial i gryfhau’r aliniad rhwng nodau’r Siarter Iaith a nodau sefydliadau a ariennir gan Lywodraeth Cymru sydd yn gweithio i hyrwyddo defnydd y Gymraeg yn gymunedol.

Mae’r canfyddiadau hefyd yn amlygu angen i archwilio a mynegi mewn mwy o ddyfnder y llwybrau rhwng gweithgareddau’r Siarter Iaith a’u deilliannau disgwyliedig.