Cylch gorchwyl

Mae'r Grŵp Gorchwyl a Gorffen wedi'i sefydlu gan Lywodraeth Cymru i fwrw ymlaen â'r ymagwedd ysgol-gyfan tuag at les emosiynol ac iechyd meddwl, a hynny fel rhan o'r ymagwedd system-gyfan sydd hefyd yn cydnabod y cysylltiadau rhwng lles meddyliol a lles corfforol. I sicrhau y bydd plant a phobl ifanc yn parhau wrth galon y gwaith, caiff ei gefnogi gan Grŵp Rhanddeiliaid Ieuenctid.

Diben

Diben y grŵp yw:

• Cynnig profiad personol o'r cymorth iechyd meddwl a lles meddyliol sydd ar gael i blant a phobl ifanc
• darparu cyngor i'r Grŵp Gorchwyl a Gorffen ar ei raglen waith
• Cynhyrchu polisi gyda Llywodraeth Cymru a rhaglen Law yn Llaw dros Blant a Phobl Ifanc (T4CYP)
• Herio'r Grŵp Gorchwyl a Gorffen i gadw llais plant a phobl ifanc wrth galon ei waith

Aelodaeth a Strwythur y Grŵp

Bydd y Grŵp yn cwrdd bob 2-3 mis, gan ddilyn yr un amserlen â'r Grŵp Gorchwyl a Gorffen. Os bydd angen, gall gwrdd yn fwy aml na hynny i fwrw ymlaen â gweithgareddau neu waith penodol. Gellir ffurfio is-bwyllgorau gyda chytundeb y grŵp cyfan, er mwyn canolbwyntio ar waith penodol. Mae'r cyfyngiad amser ar y grŵp, a bydd yn rhedeg tan ddiwedd tymor y Cynulliad (Mai 2021).

Plant yng Nghymru fydd yn hwyluso'r Grŵp a bydd swyddogion o Lywodraeth Cymru a  T4CYP yn bresennol yn y cyfarfodydd, yn ogystal â'r aelodau ieuenctid, yn amlwg.

Mewnbwn y tu hwnt i gyfarfodydd

Y tu allan i'r Grŵp, efallai y gofynnir am fewnbwn o bryd i'w gilydd. Caiff aelodau'r Grŵp gytuno pryd a sut y byddant am i bobl gysylltu â nhw y tu allan i'r cyfarfodydd.

Cyfrinachedd

Yn ogystal ag aelodau'n rhannu profiadau neu farn bersonol yn ystod cyfarfodydd, efallai y bydd swyddogion yn rhannu syniadau neu wybodaeth: pethau sydd wrthi'n cael eu datblygu - ni ddylid rhannu hyn y tu allan i'r Grŵp. Gofynnir i aelodau barchu'r cyfrinachedd hwn.

Deddf Hawliau'r Grŵp

• Hawl i fod mewn amgylchedd diogel
• Hawl i beidio dioddef camwahaniaethu
• Hawl i fynegi fy marn fy hun
• Gwybodaeth - Cyfrinachol
• Bydd pobl yn gwrando arnaf
• Hawl i anghytuno a thrafod
• Hawl i annibyniaeth
• Hawl i gael y wybodaeth gywir
• Hawl i gael fy mharchu
• Hawl i symud o gwmpas yn hollol rydd
• Hawl i gael egwyl
• Hawl i gael fy nghynnwys ym mhob trafodaeth

Fy rôl fel aelod yw

• Hawl i gael fy mharchu
• Hawl i roi fy marn
• Byddaf yn gwrando ar eraill
• Byddaf yn dangos empathi
• Byddaf yn rhannu profiadau ac yn gwrando ar eraill
• Byddaf yn dweud pan rydw i angen egwyl
• Byddaf yn sicrhau bod eraill yn cael eu cynnwys yn y trafodaethau os ydynt yn dymuno
• Byddaf yn rhoi gwybod os oes problem
• Byddaf yn meddwl am yr hyn y byddaf yn ei ddweud
• Byddaf yn sicrhau cyfrinachedd
• Byddaf yn garedig ac yn hynaws
• Byddaf yn rhoi gwybod i staff os na allaf ddod i gyfarfod
• Fe gadwaf mewn cysylltiad - hysbysu am newid amgylchiadau ac ati
• Byddaf yn rhannu fy rôl gan godi ymwybyddiaeth ymhlith eraill.