Ffliw Adar wedi'i ganfod mewn dofednod ac adar gwyllt ym Mwrdeistref Sirol Wrecsam

Mae parthau Rheoli Clefydau Dros Dro o 3km a 10km wedi'u gosod o amgylch yr eiddo bach sydd wedi’i heintio, i gyfyngu ar y risg o ledaenu’r clefyd. Mae ymchwiliad milfeddygol ar y gweill, fodd bynnag, mae adar gwyllt marw sydd wedi’u darganfod yn yr ardal wedi profi'n bositif am y feirws a chredir mai hwy yw ffynhonnell yr haint.

Ystyrir bod y risg i iechyd y cyhoedd o'r feirws yn isel iawn ac nid yw'r achosion hyn yn peri risg diogelwch bwyd i ddefnyddwyr y DU.

Anogir aelodau'r cyhoedd i beidio â chodi na chyffwrdd unrhyw adar sâl neu farw ac yn lle hynny cysylltu â llinell gymorth Defra ar 03459 33 55 77.

Roedd yr achos diwethaf o ffliw adar i’w gofnodi yng Nghymru ym mis Ionawr eleni. Daw cadarnhad heddiw yn dilyn cyhoeddi canfyddiadau tebyg o ffliw adar yn y DU ac Ewrop.

Cynghorir unrhyw geidwaid adar i fod yn wyliadwrus am arwyddion o'r clefyd, fel mwy o farwolaethau neu ofid resbiradol. Os oes gan geidwaid unrhyw bryderon am iechyd eu hadar, cânt eu hannog i ofyn am gyngor prydlon gan eu milfeddyg.

Dywedodd Prif Swyddog Milfeddygol Cymru, Christianne Glossop:

“Mae Ffliw Adar wedi ei ddarganfod mewn dofednod ac adar gwyllt yn ardal Wrecsam. Mae hyn yn dystiolaeth bellach o'r angen am i bawb sy'n cadw dofednod ac adar caeth i sicrhau bod ganddynt y lefelau bioddiogelwch uchaf yn eu lle.

“Mae Iechyd Cyhoeddus Cymru wedi dweud bod y risg i iechyd y cyhoedd o Ffliw Adar yn isel iawn ac mae’r Asiantaeth Safonau Bwyd wedi nodi’n glir nad yw’n peri risg diogelwch bwyd i ddefnyddwyr y DU.

“Mae parthau rheoli dros dro wedi’u gosod i helpu i atal y clefyd rhag lledaenu ymhellach.

“Rhaid rhoi gwybod ar unwaith i’r Asiantaeth Iechyd Anifeiliaid a Phlanhigion am unrhyw amheuaeth o ffliw adar neu unrhyw glefyd arall y dylid hysbysu amdano.”

Mae mwy o wybodaeth am sut i roi gwybod am adar gwyllt marw a chael gwared arnynt ar gael yn Adrodd a gwaredu aderyn marw ar LLYW.CYMRU