Datganiad Ysgrifenedig: Setliad Terfynol yr Heddlu 2022-23

Rwyf heddiw yn gosod gerbron y Senedd Adroddiad Cyllid Llywodraeth Leol (Rhif 2) 2022-23 (Setliad Terfynol – Comisiynwyr Heddlu a Throseddu). Mae hwn yn amlinellu elfen Llywodraeth Cymru o Setliad Terfynol yr Heddlu ar gyfer heddluoedd yng Nghymru yn 2022-23. Mae’r cyhoeddiad heddiw a wnaed gan y Swyddfa Gartref yn cyhoeddi  Dyraniadau Grant Terfynol yr Heddlu ar gyfer cyrff plismona yng Nghymru a Lloegr, er mwyn sicrhau bydd Comisiynwyr Heddlu a Throseddu yn gallu gosod eu praeseptau erbyn 1 Mawrth.

Nid yw polisi plismona wedi’i ddatganoli a darperir y cyllid ar gyfer pedwar Heddlu Cymru drwy drefniant tair ffordd, sy’n cynnwys y Swyddfa Gartref, Llywodraeth Cymru a’r Dreth Gyngor. Ar gyfer 2022-2023, bydd cyfanswm y cymorth craidd ar gyfer heddluoedd yng Nghymru yn £432.4 miliwn.

Mae fformiwla gyffredin sy’n seiliedig ar anghenion yn cael ei gweithredu gan y Swyddfa Gartref i ddosbarthu cyllid ar draws heddluoedd Cymru a Lloegr, ac mae’r dull o bennu a dosbarthu elfen Llywodraeth Cymru o’r ddarpariaeth cyllido heddlu wedi ei seilio ar yr egwyddor o sicrhau cysondeb a thegwch ar draws Cymru a Lloegr.

Mae'r Swyddfa Gartref wedi penderfynu trosglwyddo’r cyllid ar gyfer y Gangen Arbennig allan o Brif Grant yr Heddlu i'r Grant Plismona Gwrthderfysgaeth, yn unol â chyllideb 2021-22. Gan fod y cyfanswm sy'n cael ei drosglwyddo yn seiliedig ar gyllideb heddluoedd ar gyfer 2021-22, a bydd yn parhau felly ar gyfer 2022-23, ni fydd y trosglwyddiad yn cael unrhyw effaith net ar yr heddluoedd.

Fel mewn blynyddoedd blaenorol, mae’r Swyddfa Gartref wedi defnyddio mecanwaith cyllid gwaelodol ar gyfer ei fformiwla sy'n seiliedig ar anghenion. Mae hyn yn sicrhau y gall pob heddlu yng Nghymru a Lloegr ddisgwyl cael cynnydd o 5.9% mewn cyllid craidd ar gyfer 2022-23, cyn yr addasiad a wneir ar gyfer trosglwyddo cyllid y Gangen Arbennig, o'i gymharu â 2021-22.

Yn dilyn ymgynghoriad, mae’r ffigurau ar gyfer setliad terfynol yr heddlu yn parhau fel y nodais yn fy natganiad ar 16 Rhagfyr ar setliad dros dro'r heddlu. Fel y nodais yn y datganiad hwnnw, yn 2022-23, bydd cydbwysedd y cyllid rhwng y Swyddfa Gartref a Llywodraeth Cymru yn newid. Ni fydd gostyngiad yn lefel y cyllid cyffredinol y bydd y heddluoedd yn ei dderbyn ond bydd cyfran y cyllid a dderbyniant yn uniongyrchol oddi wrth y Swyddfa Gartref yn cynyddu. Newid gweinyddol yn unig yw hwn, ac ni fydd yn golygu unrhyw newid yn y cyllid cyffredinol ar gyfer unrhyw heddlu.

Rwy’n awgrymu y dylid pennu cyfraniad Llywodraeth Cymru i gyllid yr heddlu ar gyfer 2022-23 yn £113.47 miliwn. Mae’r cyllid gwaelodol yn cael ei darparu gan y Swyddfa Gartref. Mae’r ffigurau wedi’u crynhoi yn Nhablau 1 i 3 y Datganiad hwn.

Disgwylir i Adroddiad Cyllid Llywodraeth Leol (Rhif 2) 2022-23 fod yn destun trafodaeth yn y Senedd ar 15 Chwefror.

Setliad yr heddlu: terfynol 2022 i 2023

Cyllid Refeniw yr Heddlu

Nodiadau:

[1] Ers Adolygiad Cynhwysfawr o Wariant 2015, mae'r Swyddfa Gartref wedi trosglwyddo cyllid yn flynyddol i Lywodraeth Cymru er mwyn i Lywodraeth Cymru fodloni’r cyfraniad y cytunwyd arno ar ei chyfer at gyllid yr heddlu yng Nghymru. O 2022-23 ymlaen, ni fydd y cyllid ychwanegol hwn yn cael ei drosglwyddo bellach a bydd, yn hytrach, yn cael ei ddarparu gan y Swyddfa Gartref drwy Grant yr Heddlu a'r Grant Atodol. O ganlyniad, bydd gostyngiad o £29.93 miliwn yng nghyfraniad Llywodraeth Cymru at blismona. Newid gweinyddol yn unig yw hwn, ac ni fydd yn golygu unrhyw newid yn y cyllid cyffredinol ar gyfer unrhyw Heddlu.

[2] Dyma swm grant yr heddlu a nodir yn adran 3 o Adroddiad Grant yr Heddlu sy’n cynnwys y dyraniad o dan ‘Prif Fformiwla’ ac ‘Ychwanegu Rheol 1’ (colofnau a a b) plws swm y ’cyllid gwaelodol’ y mae’r Swyddfa Gartref wedi’i sicrhau sydd ar gael.

[3] Dangosir y ffigurau ar gyfer 2022-23 cyn yr addasiad a wneir ar gyfer trosglwyddo cyllid y Gangen Arbennig, fel y nodir ym mharagraff 4.8 o Adroddiad Grant yr Heddlu.