Ken Skates, Gweinidog yr Economi, Trafnidiaeth a Gogledd Cymru
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Yn gyntaf, rwyf am nodi fy niolchiadau i’r Arglwydd Burns, ei grŵp o Gomisiynwyr, a swyddogion Llywodraeth Cymru a gefnogodd Gomisiwn Trafnidiaeth De-ddwyrain Cymru am adroddiad rhagorol sy’n procio’r meddwl.
Bydd Llywodraeth Cymru yn ystyried yr argymhellion yn fanwl, a byddaf yn gwneud datganiad manylach i’r Senedd ym mis Rhagfyr.
Gan ddod mor fuan wedi cyhoeddi Llwybr Newydd – Strategaeth newydd Trafnidiaeth Cymru ar gyfer ymgynghoriad, rwy’n falch o weld tebygrwydd agos y ddwy ddogfen, a fydd gyda’i gilydd yn newid ein meddylfryd ynghylch sut y mae pobl yn symud o amgylch Cymru, a thu hwnt.
Rwy’n croesawu’n fawr gyfeiriad yr adroddiad, ac rwy’n edrych ymlaen at ddatblygu ein syniadau, ochr yn ochr â’n partneriaid yng Nghasnewydd ac awdurdodau lleol eraill, Trafnidiaeth Cymru, a Llywodraeth y DU.
Mae’r Comisiwn wedi amlinellu cyfres uchelgeisiol o gynigion. Os caiff ei weithredu’n llwyddiannus byddant yn rhoi dewisiadau trafnidiaeth newydd I bobl sy’n byw yn Ne-ddwyrain Cymru a’r ardaloedd cyfagos, gan alluogi’r rhanbarth I symud I ffwrdd o ddibynnu ar y car preifat a thagfeydd ar y ffyrdd, gyda chyfleoedd I gael cydbwysedd rhwng defnyddio ceir a thrafnidiaeth gyhoeddus o safon uchel a theithio llesol. Yno gystal â mynd I’r afael â thagfeydd lleol, byddai hyn yn cael effaith gwirioneddol ar ansawdd yr aer a mynd I’r afael â’r newid yn yr hinsawdd.
Mae rhai o’r cynigion hyn o fewn ein cymhwysedd datganoledig, ond nid yw eraill.
Rwyf wedi dechrau ar drafodaethau positif gydag Arweinydd Cyngor Casnewydd ynghylch sut y gallwn gydweithio ar y mesurau teithio ar fysiau a theithio llesol.
Mae’r argymhellion i’r rheilffyrdd yn galw ar Lywodraeth y DU i gymryd camau ac i weithredu y gwelliannau angenrheidiol i’r seilwaith rheilffyrdd ar draws y rhanbarth ar fyrder.
Fel a nodwyd gennyf yn gynharach yr wythnos hon, mae Llywodraeth y DU wedi bod araf iawn wrth fuddsoddi yn seilwaith rheilffyrdd Cymru.
Mae hwn yn gyfle positif i Lywodraeth y DU fuddsoddi i sicrhau tegwch o ran buddsoddi ac rwy’n edrych ymlaen at weithio mewn partneriaeth â hwy i gyflawni gweledigaeth Burns.
Rwy’n croesawu canfyddiadau’r adroddiad hwn ac wedi gofyn i Trafnidiaeth Cymru gydweithio’n agos gyda’n partneriaid yng Nghyngor Casnewydd i’m cefnogi i ddatblygu ymateb mwy manwl y byddaf yn ei gyflwyno i’r Senedd ar 8fed Rhagfyr 2020.
Comisiwn Trafnidiaeth De-ddwyrain Cymru: argymhellion terfynol