Mae £60,000 o arian Llywodraeth Cymru wedi’i neilltuo i bysgotwyr a chymunedau glan môr Cymru i’w helpu i ymgeisio am filiynau o bunnau o gyllid Ewropeaidd.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Cafodd Cronfa’r Môr a Physgodfeydd Ewrop (EMFF) ei sefydlu i roi help ar gyfer addasu i’r Polisi Pysgodfeydd Cyffredin, gan gynnwys rheoli a gorfodi ac ymrwymo i gasglu data. Mae’r EMFF yn cefnogi’r sectorau pysgota a dyframaethu i ddatblygu’n gynaliadwy ac yn helpu i warchod amgylchedd y môr ynghyd â chynnal twf a swyddi mewn cymunedau arfordirol.
Er mwyn helpu busnesau pysgodfeydd bach gyda’r broses ymgeisio, mae Ysgrifennydd y Cabinet wedi neilltuo arian ychwanegol. Bydd pob busnes bach sydd am ymgeisio am arian yr EMFF yn gallu cael hyd at £3,000 i dalu am gynghorydd o’i ddewis i’w helpu i ddatblygu’i syniadau yn brosiectau ymarferol.
Dywedodd Ysgrifennydd y Cabinet:
“Mae Cronfa’r Môr a Physgodfeydd Ewrop yn werth rhwng £14m - £16m i’r diwydiannau pysgota a dyframaethu yng Nghymru. Mae’n gaffaeliad sy’n ein helpu i wireddu’n nod o ddatblygu sector pysgota byrlymus, cystadleuol a chynaliadwy.
“Mae canlyniad refferendwm yr UE llynedd a’r addewid ers hynny gan y Trysorlys i anrhydeddu unrhyw ymrwymiadau tan y bydd y DU yn gadael yr UE yn golygu ei bod yn bwysig bod Cymru’n gallu manteisio’n llawn ar yr arian sydd ar gael yn y Gronfa.
“Rwyf felly wedi penderfynu neilltuo arian o nghyllideb i helpu busnesau pysgota bach sy’n ystyried gwneud cais am nawdd o’r EMFF.
“Mae yna lawer o syniadau da ar gyfer prosiectau, ond nid oes gennym y fantais o flwyddyn i droi’r syniadau hyn yn brosiectau y gellir eu cefnogi. Nod yr help fydd gwneud hynny, sef sicrhau bod y syniadau sy’n cael eu cynnig yn barod i gael eu rhoi ar waith yn syth i dyfu’n brosiectau ymarferol”.