Mae Prif Swyddog Meddygol newydd Cymru, Dr Frank Atherton, yn dechrau ar ei waith heddiw.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Fel Prif Swyddog Meddygol Cymru, bydd Dr Atherton yn gyfrifol am ddarparu cyngor proffesiynol annibynnol i'r Prif Weinidog, Ysgrifennydd y Cabinet dros Iechyd, Llesiant a Chwaraeon, y Gweinidog Iechyd y Cyhoedd a Gwasanaethau Cymdeithasol a’r Cabinet ynglŷn â materion yn ymwneud ag iechyd ac iechyd y cyhoedd. Bydd hefyd yn gweithio gyda sefydliadau trwy Gymru i leihau anghydraddoldeb ym maes iechyd, ac i wella iechyd.
Bydd hefyd, yn ei rôl fel Cyfarwyddwr Meddygol GIG Cymru, yn arwain y proffesiwn meddygol yng Nghymru er mwyn gwella ansawdd gofal iechyd a chanlyniadau i gleifion.
Daw Dr Atherton yn wreiddiol o Swydd Gaerhirfryn ac mae wedi bod yn gweithio fel Dirprwy Brif Swyddog Meddygol Iechyd yn yr Adran Iechyd a Lles yn Nova Scotia, Canada. Bu hefyd yn Gyfarwyddwr Iechyd y Cyhoedd yng Ngogledd Swydd Gaerhirfryn ac yn Llywydd Cymdeithas Cyfarwyddwyr Iechyd y Cyhoedd y DU.
Dywedodd Ysgrifennydd y Cabinet dros Iechyd, Llesiant a Chwaraeon, Vaughan Gething AC:
“Mae gan Dr Atherton brofiad helaeth o weithio ar lefel uchel ym maes iechyd y cyhoedd yn y Deyrnas Unedig a thramor ac rwy'n edrych ymlaen at gydweithio ag ef. Rwy’n falch iawn ei fod wedi ymuno â ni wrth inni weithio i wella iechyd a llesiant a hoffwn estyn croeso cynnes iddo i Gymru.”
Dywedodd Dr Atherton:
“Mae bod yn Brif Swyddog Meddygol yng Nghymru yn rhoi cyfle gwych imi weithio gyda phobl a sefydliadau drwy’r wlad i greu’r amodau a fydd y galluogi pobl i fyw bywydau iachach, gan adeiladu ar seiliau’r Ddeddf Teithio Llesol a Deddf Llesiant Cenedlaethau’r Dyfodol. Rwy’n edrych ymlaen at fynd ati i roi’r polisïau blaengar ac arloesol hyn ar waith.”
Mae Dr Atherton yn cymryd lle Dr Ruth Hussey, a ymddeolodd yn gynharach eleni.