Heddiw ymwelodd Ysgrifennydd y Cabinet dros Iechyd a Lles Vaughan Gething â chanolfan gofal sylfaenol arloesol newydd ym Mhrestatyn.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
A hithau wedi’i hagor yn Ebrill eleni, mae canolfan Healthy Prestatyn Iach yn cyfuno tri phractis Meddygon Teulu a oedd yn gweithredu gynt yn yr ardal.
Dywedodd Vaughan Gething AC:
“Mae Healthy Prestatyn Iach yn tynnu ar sgiliau lawer o weithwyr iechyd proffesiynol sy’n gallu cynnig cyngor arbenigol, tra’n rhyddhau Meddygon Teulu i drin pobl sydd â’r cyflyrau mwyaf cymhleth. Dyma’r model cyntaf o’i fath yn y Gogledd a gall y staff yma ymfalchïo yn yr hyn y maent wedi’i gyflawni.
“Gwn fod Dr Chris Stockport a’i dîm wedi gweithio’n galed, ynghyd â’r bwrdd iechyd a’r awdurdod lleol, i wella’r gwasanaeth sydd ar gael. Rwyf am inni ddefnyddio’r hyn y byddwn yn ei ddysgu o’r model hwn ledled Cymru.”
Mae pum tîm amlddisgyblaeth, gan gynnwys Meddygon Teulu, ymarferwyr nyrsio, fferyllwyr, ffisiotherapyddion, therapyddion galwedigaethol a gweithwyr iechyd cymunedol, wedi ysgwyddo’r cyfrifoldeb dros ofalu am grwpiau penodol o gleifion. Mae hyn yn golygu y caiff cleifion eu gweld yn uniongyrchol gan y gweithiwr proffesiynol mwyaf priodol i’w hanghenion gan sicrhau y gall Meddygon Teulu neilltuo eu hamser ar gyfer y cleifion hynny sydd â’r cyflyrau mwyaf cymhleth.
Dywedodd y tri phractis blaenorol wrth y Bwrdd Iechyd y byddent yn tynnu’n ôl o’u contractau i ddarparu gwasanaethau gofal sylfaenol yr hydref diwethaf. Mae’r gwasanaeth newydd eisoes wedi recriwtio o leiaf naw o Feddygon Teulu ac fe’i canmolwyd yr wythnos diwethaf gan gynghorwyr Sir Ddinbych fel esiampl i weddill y Gogledd.