Teitlau ar LLYW.CYMRU

Dylai'r teitl (ynghyd â'r crynodeb) ddweud wrth y defnyddwyr os mai'r cynnwys ar y dudalen yw'r cynnwys y maent yn chwilio amdano.

Defnyddiwch iaith y bydd defnyddwyr yn ei deall. Efallai na fydd y cyhoedd yn gwybod ein henw swyddogol ni am rywbeth.

Defnyddiwch declynnau allweddeiriau fel Google Trends i ddod o hyd i'r iaith y mae defnyddwyr yn ei defnyddio i chwilio.

Cadwch deitlau yn fyr. Anelwch i gael 65 nod neu'n llai oherwydd:

• nad yw peiriannau chwilio yn dangos unrhyw beth ar ôl 65 nod
• bod teitlau hirach yn anos eu deall

Dylai teitlau fod fel a ganlyn:

• â phriflythyren ar ddechrau'r teitl yn unig
• heb gysylltnod na blaenslaes
• heb atalnod llawn ar y diwedd

Defnyddiwch deitlau gweithredol pan fyddwch yn gofyn i ddefnyddwyr wneud rhywbeth, er enghraifft:

• gwnewch gais am
• gwiriwch
• tanysgrifiwch i
• dewch o hyd i
• cofrestrwch ar gyfer
• mewngofnodwch

Defnyddiwch declynnau allweddeiriau fel Google Trends i ddod o hyd i'r iaith y mae defnyddwyr yn ei defnyddio i chwilio.

Gwnewch yn siŵr bod teitlau yn unigryw ac yn gwneud synnwyr heb gyd-destun. Dyw hi ddim yn ddefnyddiol i ddefnyddwyr i weld nifer o dudalennau gyda'r un teitl, er enghraifft 'ffurflen gais'. Gwnewch hyn yn fwy penodol, er enghraifft 'Ffurflen gais grant cyfleusterau cludo nwyddau ar y rheilffyrdd'.

Ceisiwch osgoi gorsymleiddio. Er enghraifft, 'Cysylltwch â'r Arolygaeth Gynllunio' yn hytrach na 'Cysylltwch â ni'.

Dylai'r geiriau pwysicaf fod ar ddechrau'r teitlau bob tro.

Ystyriwch ddefnyddio colon:

• i helpu defnyddwyr i gysylltu grwpiau bychain o gynnwys sy'n berthnasol i'w gilydd
• i roi'r geiriau pwysicaf ar ddechrau teitlau

Os oes nifer o dudalennau yn cynnwys yr un frawddeg, newidiwch y teitl fel bod y brif eitem yn dod yn gyntaf. Er enghraifft, mae 'Safonau lles defaid' a 'Safonau lles buchod' yn newid yn 'Defaid: safonau lles', a 'Buchod: safonau lles'.

Gall teitlau fod yn wahanol i deitl swyddogol y ddogfen. Gallwch ddefnyddio'r teitl swyddogol ar gyfer yr atodiad neu sôn amdano yn y crynodeb neu gopi'r dudalen os ydych chi'n meddwl bydd defnyddwyr yn chwilio am y term yma.

Defnyddiwch y flwyddyn yn y teitl os yw'n rhan o gyfres gyda'r un teitl. Er enghraifft:

•  Glastir Organig 2017: llyfryn rheolau
•  Glastir Organig 2016: llyfryn rheolau  

Wrth ychwanegu cofnodion cyfarfodydd, dylech ddefnyddio enw'r sefydliad a'r manylion. Er enghraifft 'Cyfarfod bwrdd Awdurdod Cyllid Cymru'. Bydd dyddiad y cyfarfod yn cael ei gynnwys yn awtomatig yn y teitl, o'r maes dyddiad y cyfarfod.

Mae tagiau teitlau yn rhan o god gwefan ac yn disgrifio tudalen we.

Nid yw tag teitl tudalen yn cael ei ddangos fel pennawd ar y dudalen. Mae’n ymddangos:

• ym mar teitl neu dab tudalen y porwr
• fel dolen at y dudalen yng nghanlyniadau peiriannau chwilio

Dylai tag teitl tudalen fod wedi’i seilio ar brif bennawd y dudalen (<h1>) a dilyn y ffurf hon:

• Disgrifiad ar sail prif bennawd y dudalen | enw’r wefan

Er enghraifft:

• Sut mae’r cyfraddau treth incwm Cymru a delir gennych yn cael eu gwario | LLYW.CYMRU
• Tyfu busnes | Busnes Cymru

Caiff tagiau teitl ar gyfer tudalennau yng nghraidd LLYW.CYMRU (www.llyw.cymru a www.gov.wales) eu creu’n awtomatig yn seiliedig ar deitl y dudalen.