Tanau llosgi bwriadol: Ebrill 2021 i Fawrth 2022

Mae'r dadansoddiad yn y bwletin hwn yn ymwneud â digwyddiadau tân rhwng mis Ebrill 2021 a diwedd mis Mawrth 2022. Gwneir cymariaethau â’r cyfnod Ebrill 2020 i Fawrth 2021, cyfnod a effeithiwyd i raddau helaeth gan y pandemig coronafeirws (COVID-19), pan roedd cyfyngiadau iechyd cyhoeddus mewn grym. Er i gyfyngiadau gael eu llacio yn ystod 2021-22 bu rhai cyfnodau yn ystod y flwyddyn lle'r oedd cyfyngiadau’n parhau i fod mewn grym,  ac mae’n bosibl nad oedd patrymau ymddygiad wedi dychwelyd i batrymau cyn y pandemig.

Tanau

• Ymatebodd Gwasanaethau Tân ac Achub Cymru i gyfanswm o 6,122 o danau bwriadol yn 2021-22. Mae hyn yn gynnydd o 4% o'i gymharu â'r flwyddyn flaenorol, ac mae tua chwarter y nifer yn 2001-02.
• Roedd tua un rhan o bump o danau bwriadol yn 2021-22 yn brif danau.
• Yn 2021-22, roedd 65% o’r tanau bwriadol yn Ne Cymru, dros chwarter yng Nghanolbarth a Gorllewin Cymru, a bron i ddegfed yng Ngogledd Cymru.

Cerbydau

• Yn 2021-22, roedd 499 o brif danau a gafodd eu cynnau’n  fwriadol mewn ceir, gostyngiad o 6% o’i gymharu â’r flwyddyn flaenorol.

Tanau mewn ysgolion

• Yn 2021-22, cafwyd 5 o danau bwriadol mewn ysgolion, sy’n cyfateb i chwarter yr holl danau mewn ysgolion.

Tarddiad a deunyddiau peryglus

• Dros y 5 mlynedd diwethaf, fflam noeth oedd tarddiad y tân mewn 31% o’r prif danau bwriadol.
• O’r holl sylweddau peryglus mewn prif danau bwriadol yn y cyfnod 2017-18 hyd at 2021-22, roedd 82% yn hylifau fflamadwy.

Marwolaethau ac anafiadau

• Yn 2021-22, cafwyd 2 farwolaeth a 42 o anafiadau heb fod yn rhai angheuol o ganlyniad i danau bwriadol.