Talu Treth Trafodiadau Tir

Unwaith y bydd ffurflen dreth wedi’i chyflwyno, mae angen i'r trethdalwr neu gyfreithiwr neu drawsgludydd ar eu rhan dalu unrhyw dreth sy'n ddyledus.

Mae TTT yn dreth a hunanasesir. Cyfrifoldeb y trethdalwr yw cwblhau a chyflwyno ffurflen dreth gywir a thalu unrhyw dreth sy'n ddyledus.

Rhaid i chi dalu o fewn 30 diwrnod i'r diwrnod ar ôl y dyddiad y daw'r trafodiad i rym. Y dyddiad cwblhau yw’r dyddiad y daw’r trafodiad i rym fel arfer.

Os ydych yn ffeilio TTT ar-lein

Unwaith y byddwch wedi cyflwyno ffurflen dreth, mae angen i chi drefnu bod y dreth sy’n ddyledus yn cael ei thalu.

Pan fyddwch yn talu, defnyddiwch y Cyfeirnod Unigryw Trafodiad (CUT) 12 digid o'ch cyfrif ar-lein fel y cyfeirnod talu.

Dylech:

• wirio fod y taliad yr union swm a ddangosir fel y swm sy'n ddyledus ar y ffurflen dreth
• gwneud taliad ar wahân ar gyfer pob ffurflen dreth

Ni ddylech dalgrynnu i fyny nac i lawr i'r £ agosaf.

Os ydych yn cyflwyno ffurflen dreth bapur

Bydd angen i chi gyfrifo'r dreth er mwyn llenwi'ch ffurflen bapur a gwneud taliad.

Ni fydd gennych gyfeirnod unigryw trafodiad (CUT) hyd nes y bydd eich ffurflen bapur wedi cael ei chyflwyno a'i phrosesu â llaw. Defnyddiwch un o'r canlynol fel eich cyfeirnod talu:

• cod post y tir\cyfenw'r prynwr
• cod post y tir\enw sefydliad y prynwr

Er enghraifft - CF379EH\Jones

Os cewch gosb

Defnyddiwch y CUT ar yr hysbysiad cosb wrth wneud taliadau.

Taliadau digidol

Gallwch dalu drwy:

• drosglwyddo cyllid electronig
• CHAPS
• BACS (rhaid anfon y taliad 4 diwrnod gwaith cyn y dyddiad y mae’n ddyledus)

Rhaid i'ch cyfeirnod taliad banc fod yn:

• CUT (dim bylchau, llythrennau, ‘CUT’, ‘UTRN’ nac unrhyw beth arall cyn y nodau)
• cyfeirnod talu ar gyfer ffurflen dreth bapur, er enghraifft CF379EH\Bloggs

Os oes gennych unrhyw ymholiadau am dalu neu os oes angen help arnoch, cysylltwch â ni.