Sut i ennill statws athro cymwysedig (SAC) i addysgu mewn ysgol a gynhelir neu ysgol arbennig nas cynhelir yng Nghymru.
Cynnwys
Trosolwg
Mae Statws Athro Cymwysedig yn eich galluogi i addysgu mewn ysgol a gynhelir yng Nghymru. Mae hefyd yn eich galluogi i addysgu mewn ysgol arbennig nas cynhelir.
Er mwyn ennill SAC mae'n rhaid ichi:
- fodloni cyfres o safonau proffesiynol sydd wedi'u nodi mewn deddfwriaeth
- cofrestru yng nghategori athrawon ysgol gyda Chyngor y Gweithlu Addysg.
Cyngor y Gweithlu Addysg sy'n gyfrifol am ddyfarnu SAC. Gallant hefyd ddyfarnu SAC i athrawon o wledydd eraill y DU neu wledydd y tu allan i'r DU.
Cymhwyso fel athro yng Nghymru
Er mwyn ennill Statws Athro Cymwysedig yng Nghymru, rhaid ichi gwblhau cyfnod o Addysg Gychwynnol i Athrawon (AGA). Unwaith y byddwch wedi cymhwyso, bydd eich Partneriaeth AGA yn rhoi eich canlyniadau i Gyngor y Gweithlu Addysg.
Bydd Cyngor y Gweithlu Addysg yn dyfarnu Statws Athro Cymwysedig ichi ac yn darparu eich tystysgrif SAC.
Ar ôl ichi gael hwn, mae angen ichi gofrestru gyda Chyngor y Gweithlu Addysg.
Yna bydd angen ichi gwblhau cyfnod sefydlu.
Pan fyddwch wedi cwblhau eich cyfnod sefydlu, bydd Cyngor y Gweithlu Addysg yn darparu eich tystysgrif sefydlu.
Athrawon a gymhwysodd yn Lloegr
Bydd eich SAC yn cael ei gydnabod yn awtomatig. Mae angen ichi gofrestru gyda Chyngor y Gweithlu Addysg er mwyn addysgu mewn ysgol a gynhelir neu ysgol arbennig nas cynhelir yng Nghymru.
Athrawon a gymhwysodd yng Ngogledd Iwerddon neu’r Alban
Os ydych wedi cwblhau eich AGA yng Ngogledd Iwerddon neu'r Alban, bydd angen ichi wneud cais yn uniongyrchol i Gyngor y Gweithlu Addysg er mwyn i'ch SAC gael ei gydnabod a chofrestru.
Athrawon a gymhwysodd y tu allan i’r DU
Os ydych wedi cwblhau eich AGA y tu allan i'r DU, bydd angen ichi wneud cais yn uniongyrchol i Gyngor y Gweithlu Addysg er mwyn i'ch SAC gael ei gydnabod a chofrestru.
Os ydych wedi cymhwyso y tu allan i'r DU ac wedi derbyn SAC yn Lloegr, Gogledd Iwerddon neu'r Alban
Ni fyddwch yn cael cydnabyddiaeth awtomatig i addysgu yng Nghymru. Rhaid ichi wneud cais yn uniongyrchol i Gyngor y Gweithlu Addysg er mwyn i'ch SAC gael ei gydnabod a chofrestru.
Rhagor o wybodaeth
Am ragor o wybodaeth am y broses o wneud cais am SAC ac i gael ffurflenni cais, ewch i wefan Cyngor y Gweithlu Addysg.
Mae rhagor o wybodaeth am fod yn athro yng Nghymru hefyd ar gael. Mae gennym ardal benodol ar sianel YouTube Addysg Cymru ar gyfer Ymgyrch Addysgu Cymru.