Safonau interim anstatudol ar gyfer draenio cynaliadwy (SuDS) yng Nghymru - dylunio, adeiladu, gweithredu a chynnal a chadw systemau draenio dŵr wyneb

Mae SuDS yn cynnig ffordd amgen o ddraenio dŵr wyneb sy’n wahanol i’r systemau confensiynol o ddraenio drwy bibellau. Fel rheol mae’n defnyddio cyfuniad o ddulliau megis palmentydd athraidd ffosydd cerrig toeon gwyrdd pantiau a phyllau dŵr. Gellir eu defnyddio mewn ardaloedd gwledig a threfol i gefnogi datblygiad newydd.

Gall system o’r fath arafu llif dŵr gan leihau’r perygl o lifogydd a diogelu ansawdd dŵr. Trwy leihau llif y dŵr ffo i garthffosydd cynyddir capasiti’r carthffosydd hynny heb waith peirianyddol drud tra bo systemau mwy naturiol yn gwella ansawdd y dŵr a’r amgylchedd.

Mae’n hanfodol cytuno â’r awdurdod lleol neu’r ymgymerwr carthffosydd ar drefniadau mabwysiadu a rheoli seilwaith y system SuDS a’r holl elfennau draenio a hynny yn y cyfnod cynllunio i sicrhau bod seilwaith yr SuDS yn cael ei gynnal a’i gadw’n briodol a’i fod yn gweithio’n effeithiol am ei oes.

Yn ôl Deddf Rheoli Llifogydd a dŵr 2014 (Atodlen 3) sydd heb ei gychwyn rhaid i ddatblygiadau newydd gynnwys nodweddion SuDS sy’n bodloni’r safonau cenedlaethol. Mae Llywodraeth Cymru’n cynnig cyhoeddi’r safonau interim hyn at ddibenion cynghori tan y daw Atodlen 3 i rym.

Bydd hyn yn galluogi dylunwyr datblygwyr eiddo awdurdodau lleol a phartïon eraill sydd â buddiant i ddangos eu bod wedi ystyried cyngor cynllunio Llywodraeth Cymru ar Ddatblygu a Pherygl Llifogydd a phrofi’r safonau fel bod modd eu hadolygu os oes angen cyn iddynt gael grym statudol.