Rheolau trwyddedu newydd ar gyfer triniaethau arbennig

O 29 Tachwedd 2024, mae rheolau trwyddedu newydd ar waith ar gyfer y triniaethau arbennig canlynol yng Nghymru:

• aciwbigo (yn cynnwys nodwyddo sych)
• tyllu'r corff (gan gynnwys y glust)
• electrolysis
• tatŵio (gan gynnwys colur lled-barhaol a microlafnu)

Mae'n bwysig bod mesurau atal a rheoli heintiau effeithiol yn cael eu rhoi ar waith ar gyfer y triniaethau hyn. Gall peidio â dilyn mesurau o'r fath gynyddu'r risg o heintiau ar gyfer cleientiaid a deiliaid trwyddedau. Gallai hyn arwain at gymryd camau cyfreithiol.

Pwrpas y cynllun trwyddedu yw:

• gwella safonau hylendid a diogelwch
• sicrhau bod safonau o'r fath yn gyson ar draws Cymru
• helpu i amddiffyn iechyd cleientiaid
• eu cefnogi i ddewis unigolion trwyddedig sy'n gweithredu o fangreoedd a cherbydau cymeradwy

Trwydded triniaeth arbennig

Rhaid i berson sy'n cyflawni unrhyw un o'r 4 triniaeth arbennig ddynodedig, wneud cais am drwydded triniaeth arbennig. Rhaid iddyn nhw wneud cais i'w hawdurdod lleol. Mae hyn yn berthnasol i bob unigolyn sydd wedi'i gofrestru ar hyn o bryd i gyflawni triniaethau o'r fath, a phob ymgeisydd newydd.

Tystysgrif cymeradwyo mangreoedd a cherbydau

Mae'n rhaid i unigolion wneud cais i'w hawdurdod lleol am dystysgrif gymeradwyo os ydynt:

• yn gyfrifol am fangre neu gerbyd a ddefnyddir ar gyfer y triniaethau hyn
• yn rheoli busnes triniaeth arbennig

Y gofynion sy’n gysylltiedig â gwneud cais

Bydd angen i unigolion fodloni meini prawf penodol cyn gwneud cais am drwydded neu dystysgrif gymeradwyo os ydynt:

• yn ymarferydd unigol
• yn gyfrifol am fangre neu gerbydau

Cyfnod pontio ar gyfer ymarferwyr a busnesau sydd wedi cofrestru gyda'u hawdurdod lleol

Bydd cyfnod pontio pan ddaw'r cynllun trwyddedu i rym. Bydd hyn yn caniatáu i ymarferwyr a busnesau sydd wedi cofrestru ar hyn o bryd barhau i ymarfer yn y tymor byr. Bydd awdurdodau lleol yn hysbysu'r unigolion hynny os ydynt yn cael trwydded dybiedig neu dystysgrif gymeradwyo dybiedig.

Bydd angen i unigolion gyflwyno eu ffurflen gais o dan y cynllun newydd erbyn 28 Chwefror 2025. Y rheswm dros hyn yw er mwyn gallu ei hasesu a'i phrosesu. Bydd awdurdodau lleol yn rhoi gwybod i unigolion am y canlyniad.

Os nad yw awdurdodau lleol wedi gwneud penderfyniad ar geisiadau erbyn 28 Chwefror 2025, bydd unigolion yn dal i allu parhau i ymarfer. Gallant barhau i ymarfer nes bod eu hawdurdod lleol yn dod i benderfyniad ar eu cais.

Gallai gymryd sawl mis i awdurdodau lleol asesu'r holl geisiadau wrth symud i'r cynllun trwyddedu newydd. Byddant hefyd yn delio â cheisiadau am drwydded neu dystysgrif gymeradwyaeth gan ymgeiswyr newydd.

Beth am bobl, mangreoedd a cherbydau nad ydynt erioed wedi cael eu cofrestru?

Bydd angen i unigolion nad ydynt erioed wedi cael eu cofrestru:

• wneud cais am drwydded ar gyfer eu hunain
• fod â thystysgrif gymeradwyaeth ar gyfer y safle/cerbyd y byddant yn gweithredu ohono

Ni allant ddechrau ymarfer na defnyddio'r fangre/cerbyd i ddarparu triniaethau arbennig nes bod eu hawdurdod lleol wedi cwblhau prosesu eu cais.

Nid yw'r trefniadau pontio yn berthnasol i unigolion nad ydynt erioed wedi cofrestru.

Dewis deiliad trwydded

Wrth ddewis artist tatŵ, neu ymarferydd aciwbigo, tyllu'r corff neu electrolysis, gwnewch yn siŵr:

• bod ganddynt drwydded triniaeth arbennig ddilys
• bod gan eu mangre neu gerbyd dystysgrif gymeradwyo

Arddangos trwyddedau a thystysgrifau cymeradwyo

Rhaid i ddeiliaid trwydded arddangos eu trwydded yn eu prif le gwaith neu wisgo eu trwydded lanyard. Rhaid i safleoedd a cherbydau cymeradwy hefyd arddangos eu tystysgrif gymeradwyaeth.

Cofrestr genedlaethol

Mae cofrestr genedlaethol wedi'i chreu i roi cyhoeddusrwydd i bob deiliad trwydded ddilys yng Nghymru. Bydd hyn yn cynnwys deiliaid tystysgrif mangre a cherbydau cymeradwy.

Nod y gofrestr yw rhoi hyder i'r cyhoedd y bydd pob unigolyn sy'n ymddangos ar y gofrestr wedi'i drwyddedu neu ei gymeradwyo i weithredu yng Nghymru.

Bydd awdurdodau lleol yn poblogi'r gofrestr hon wrth iddynt roi trwyddedau a thystysgrifau cymeradwyo.

Bydd y broses hon yn cael ei chynnal dros sawl mis. Byddwn yn cyhoeddi'r ddolen i'r gofrestr yma yn y flwyddyn newydd.

Bydd awdurdodau lleol yn diweddaru'r gofrestr wrth i fwy o drwyddedau a thystysgrifau cymeradwyo gael eu rhoi.