Mae rhaglen Cartrefi Clyd Llywodraeth Cymru yn darparu cyllid ar gyfer gwelliannau er mwyn arbed ynni mewn cartrefi incwm isel a chartrefi mewn cymunedau difreintiedig ledled Cymru.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Mae rhaglen Cartrefi Clyd Llywodraeth Cymru, sy'n cynnwys cynlluniau Nyth ac Arbed, yn darparu cyllid ar gyfer gwelliannau er mwyn arbed ynni mewn cartrefi incwm isel a chartrefi mewn cymunedau difreintiedig ledled Cymru.
Mae'r swm o £104 miliwn yn cynnwys £32 miliwn o'r £40 miliwn ychwanegol a gyhoeddwyd yn y Gyllideb Derfynol fis diwethaf. Bydd yr £8 miliwn sy'n weddill yn cael eu buddsoddi mewn mentrau twf gwyrdd eraill.
Bydd y cyllid hwn oddi wrth Lywodraeth Cymru hefyd yn ysgogi rhyw £24 miliwn o gyllid Ewropeaidd, yn ogystal â chyllid o dan y Rhwymedigaeth Cwmnïau Ynni (ECO).
Cyhoeddodd Lesley Griffiths, Ysgrifennydd y Cabinet dros yr Amgylchedd a Materion Gwledig, y cyllid yn ystod ymweliad â Trowbridge i weld sut y mae aelwydydd yno wedi elwa ar gyllid a gafwyd o dan gynllun Arbed yn y gorffennol.
Llwyddodd Cyngor Sir Caerdydd i ddenu rhagor o gyllid grant Arbed yn ddiweddar ac mae'r niferoedd sydd wedi manteisio arno wedi bod yn hynod gadarnhaol. Roedd dros 75% o’r trigolion wedi cofrestru i gael arolwg ymhen pythefnos i'r diwrnod yr agorodd y cynllun ar gyfer ceisiadau.
Erbyn hyn, mae dros 300 o gartrefi yn yr ardal yn rhan o gynllun Arbed, a bydd 100 arall yn ymuno ag ef yn ystod y misoedd nesaf.
Dywedodd Ysgrifennydd y Cabinet:
“Yn ystod misoedd y gaeaf, mae sut i gadw'n gynnes a thalu biliau ynni uchel yn achosi pryder gwirioneddol i nifer o aelwydydd incwm isel ledled Cymru. Dw i'n hynod falch, felly, ein bod yn ymrwymo £140 miliwn i'n rhaglen Cartrefi Clyd dros y pedair blynedd nesaf.
“Nod y Rhaglen Cartrefi Clyd yw gwella cartrefi, er enghraifft, drwy uwchraddio boeleri a systemau gwresogi a thrwy inswleiddio llofftydd, er mwyn sicrhau eu bod yn defnyddio ynni'n fwy effeithlon. Mae hynny, yn ei dro, yn golygu bod biliau'n is a bod llai o ynni'n cael ei ddefnyddio, gan leihau'r newid yn yr hinsawdd.
"Mae pwyslais hefyd ar ddefnyddio'r gadwyn gyflenwi leol i wneud y newidiadau hyn, gan greu swyddi, datblygu sgiliau a rhoi hwb i'r economi leol."
Yn ôl Mr a Mrs Foley, sydd wedi elwa ar waith i inswleiddio waliau allanol eu cartref yn ystod ail gam cynllun effeithlonrwydd ynni Trowbridge:
"Mae'n cartref yn edrych yn hyfryd erbyn hyn, ond rydyn ni hefyd wedi arbed £200 ar ein biliau ynni mewn cwta 6 mis! Mae'r cyngor gawson ni am ynni wedi bod yn ddefnyddiol tu hwnt. Rydyn ni wedi cael cynghorion syml ar gyfer ein bywydau bob dydd. Rydyn ni’n ddiolchgar iawn bod y cynllun hwn ar gael."