Prentisiaethau: Stori John

Fel cyflogwr mawr, mae Bwrdd Iechyd Prifysgol Caerdydd a'r Fro yn gwybod pa mor bwysig yw cael ystod eang o dalentau ymhlith ei staff. Mae'n annog pobl sy'n niwroamrywiol ac unigolion sy’n dysgu mewn ffyrdd gwahanol i wneud cais am rolau.

Mae John yn 18 oed, ac yn byw gyda'i fam yng Nghaerdydd. Mae John yn cofio ei flynyddoedd cynnar, ac yntau'n fachgen naturiol swil:

Roeddwn i'n lwcus iawn fy mod wedi mwynhau fy addysg. Roeddwn i'n hoffi ieithoedd, mathemateg a chwaraeon. Roeddwn i'n teimlo fy mod yn cael cefnogaeth, roedd gen i gynorthwywyr addysgu da a oedd yn fy annog i ymuno â chlybiau ar ôl ysgol, ac i gymryd rhan mewn pêl-fasged a pŵl yn ystod amser cinio.

Wrth dyfu i fyny, roedd John yn ei chael hi'n anodd integreiddio â grwpiau o fewn neu y tu allan i'w ysgol a fyddai'n ei helpu i wneud ffrindiau ac roedd yn cael trafferth dod o hyd i bethau yr oedd yn teimlo'n angerddol amdanynt. 

Fe wnes i ffrindiau yn yr ysgol breswyl ac er i ni golli cysylltiad am gyfnod, ar ôl i mi adael y coleg fe wnes i ailgysylltu â nhw ar Facebook. Ni'n cadw mewn cysylltiad nawr - dwi'n teimlo mod i wedi dod yn well am gadw mewn cysylltiad gyda phobl.

Wrth chwilio am swydd ar ôl y coleg, cofrestrodd John gyda gwasanaeth o'r enw Project Search i gael profiad a dod o hyd i waith. 

Dywedodd: 

Cefais interniaeth ac ar ôl chwe mis cefais gynnig swydd. Catherine oedd fy mentor, hi wnaeth fy nghynnig ar gyfer y swydd ac mae hi'n dal i fy helpu i symud ymlaen.

Fe aethon ni i ffair swyddi yng Ngwesty'r Hilton yng Nghaerdydd a chael sgwrs ag Emma o Fwrdd Iechyd Prifysgol Caerdydd a'r Fro. Dywedodd wrtha i ei bod yn chwilio am brentisiaid a dywedodd y byddai ganddi ddiddordeb mewn gweithio gyda mi. Dechreuais fy mhrentisiaeth gyda hi, ac ym mis Chwefror es ymlaen i swydd lawn amser ym Mand 2. Hoffwn ddatblygu fy sgiliau a symud ymlaen i frig y band.

Mae cydweithwyr John yn gwerthfawrogi ei waith, yn enwedig y gofal mae'n ei gymryd ym mhob tasg. 

Dywedodd ei reolwr Tarig Azouz:

Mae John yn mynd o nerth i nerth yn ei rôl o fewn tîm datblygu Cofnodion Iechyd Ddigidol. Mae ei sylw i fanylion yn arbennig o drawiadol ac mae ei waith manwl yn helpu i gynnig gofal i gleifion mewn ffordd amserol ac yn llyfnhau'r llif gwaith ar gyfer y timau meddygol. Mae John yn benderfynol o ddatblygu ei yrfa. Gweithiodd yn galed ar ddysgu sut i drin cofnodion o wahanol arbenigeddau meddygol ac, yn fwy diweddar, ysgwyddodd gyfrifoldeb sganio brys i'r Arholwr Meddygol.

Trwy ddeialog agored am wahanol anghenion ac arddulliau o weithio, mae'r tîm wedi datblygu arferion mwy cynhwysol sy'n helpu John a holl aelodau'r tîm i weithio'n effeithiol".

Mae'r tîm wedi creu amgylchedd cynhwysol trwy roi egwyddorion dylunio cyffredinol ar waith wrth hyfforddi, gan gynnwys arweiniad strwythuredig ac amseru hyblyg. Mae'r addasiadau hyn yn y gweithle wedi gwella effeithiolrwydd y tîm cyfan gan sicrhau y gall pawb weithio yn ôl eu cryfderau.

Ychwanegodd Tarig:

Rwy'n falch o'i gynnydd a'r effaith gadarnhaol y mae wedi'i chael o fewn y tîm Cofnodion Iechyd Digidol.

Mae'r Cydlynydd Prentisiaethau ac Ehangu Mynediad ym Mwrdd Iechyd Prifysgol Caerdydd a'r Fro, Emma Bendle wedi gweld manteision cyflogi pobl ifanc niwroamrywiol, a phobl ag anableddau dysgu. Mae hi eisiau annog cyflogwyr eraill yng Nghymru i recriwtio o'r gronfa dalent hon hefyd:

Yn y byd amrywiol sydd ohoni mae'n bwysig bod yn gyflogwr cyfle cyfartal. Rydym am sicrhau bod ein gweithlu presennol a'n gweithlu yn y dyfodol yn teimlo eu bod yn cael eu trin yn deg a heb ragfarn. I ni, rhaid i'n gweithlu fod yn gynrychiolaeth o'n poblogaeth leol ac mae cynnwys pobl o bob cefndir yn allweddol i hyn.

Mae gan bawb rywbeth arbennig i'w roi. Rydym yn creu cyfleoedd lle gall pawb gyfrannu at gymdeithas a sicrhau rôl a fydd yn rhoi boddhad yn eu bywydau ac yn cyflawni eu nodau eu hunain. Mae gan bawb sgiliau sy’n cynnig safbwyntiau gwahanol a gwerthfawr. 

Pe bawn i'n cynnig unrhyw gyngor i gyflogwyr eraill, byddwn yn eu hannog i recriwtio o'r gronfa dalent hon. Dechreuwch nawr, crëwch weithlu amrywiol a gadewch i ymgeiswyr y dyfodol wybod mai dyma lle maen nhw eisiau gweithio, gan eu sicrhau y byddan nhw'n cael eu trin yn deg waeth beth fo'u cefndir.

Gan weithio mewn tîm cefnogol, mae John yn mynd o nerth i nerth. Mae'n cadw ei hun ar y trywydd iawn drwy gadw cyngor pwysig mewn cof:

Pe bawn i'n gallu siarad â fy hun pan oeddwn yn iau, byddwn i'n dweud paid ag ofni gofyn cwestiynau, bydd yn hyderus yn dy waith ac yn dy hun. Yn gyffredinol, bydd yn garedig i eraill, hyd yn oed os mai pethau bach yn unig ydyn nhw.