Datganiad Ysgrifenedig - Adroddiad Datblygu Cynaliadwy a’r Newid yn yr Hinsawdd 2015

Rwyf heddiw’n gosod gerbron Adroddiad Blynyddol Llywodraeth Cymru ar Ddatblygu Cynaliadwy a’r Newid yn yr Hinsawdd. Trwy baratoi’r adroddiad, rydym wedi gwneud ein dyletswyddau o dan adran 79(6) Deddf Llywodraeth Cymru 2006 ac Adran 80 Deddf Newid yn yr Hinsawdd 2008. Mae’n disgrifio’r hyn rydym wedi’i wneud ym meysydd datblygu cynaliadwy a newid hinsawdd ers mis Ebrill 2014.

Gan fod Deddf Llesiant Cenedlaethau’r Dyfodol (Cymru) 2015 yn gofyn inni newid y ffordd y byddwn yn paratoi adroddiadau yn nhymor y Cynulliad nesaf, hwn fydd yr adroddiad olaf o’i fath. Mae hefyd yn cynnwys am y tro olaf sylwebaeth gan Peter Davies sy’n gadael ei swyddi fel y Comisiynydd Dyfodol Cynaliadwy a Chadeirydd Comisiwn Cymru ar y Newid yn yr Hinsawdd. Mae’n ddiwedd pennod yn y rhan hon o hanes datganoli. Rwy’n estyn fy niolch didwyll i Peter am ei waith dros y blynyddoedd a fu’n allweddol i’n cynnydd yma yng Nghymru.

Gan edrych tua’r dyfodol a symud tuag at y trefniadau newydd o dan Ddeddf Llesiant Cenedlaethau’r Dyfodol (Cymru) 2015 a Bil yr Amgylchedd (Cymru) sy’n rhoi lle canolog i ddatblygu cynaliadwy a’r newid yn yr hinsawdd yn holl waith llywodraeth yng Nghymru, rwy’n disgwyl ymlaen at weithio gyda Sophie Howe, Comisiynydd statudol cyntaf Cenedlaethau’r Dyfodol, i’n helpu i roi’n huchelgais yn realiti.