Mae Llywodraeth Cymru wedi cyhoeddi newidiadau i gyfraddau’r Dreth Trafodiadau Tir (TTT) a'r Dreth Gwarediadau Tirlenwi (TGT) fel rhan o'r Gyllideb ddrafft ar gyfer 2025 i 2026.
Llywodraeth Cymru sy'n gosod y newidiadau hyn. Fe’u cyhoeddwyd mewn Datganiad Ysgrifenedig ar 10 Rhagfyr 2024.
Treth Trafodiadau Tir
Mae'r newidiadau canlynol wedi'u gwneud i TTT:
Newidiadau ar gyfer trafodiadau eiddo preswyl cyfraddau uwch yng Nghymru
Y cyfraddau newydd yw:
| Band | Cyfradd |
|---|---|
| Y gyfran hyd at ac yn cynnwys £180,000 | 5% |
| Y gyfran dros £180,000 hyd at ac yn cynnwys £250,000 | 8.5% |
| Y gyfran dros £250,000 hyd at ac yn cynnwys £400,000 | 10% |
| Y gyfran dros £400,000 hyd at ac yn cynnwys £750,000 | 12.5% |
| Y gyfran dros £750,000 hyd at ac yn cynnwys £1,500,000 | 15% |
| Y gyfran dros £1,500,000 | 17% |
Nid yw'r cyfraddau a'r bandiau treth ar gyfer y brif gyfraddau breswyl a thrafodiadau amhreswyl wedi newid o'r rhai a ddaeth i rym o 22 Rhagfyr 2020.
Cyfraddau a bandiau
Rydym wedi diweddaru'r dudalen ar gyfraddau a bandiau a osodwyd gan Lywodraeth Cymru, a'n cyfrifianellau digidol.
Gallwch ddefnyddio ein cyfrifiannell TTT i’ch helpu i gyfrifo faint o dreth i’w thalu. Bydd y gyfrifiannell yn defnyddio'r dyddiad y byddwch yn ei nodi i gyfrifo pa gyfraddau a bandiau sy'n berthnasol.
Rheolau trosiannol
Os yw'r prynwr yn cwblhau pryniant eiddo:
- cyn 11 Rhagfyr, rydych yn talu'r cyfraddau treth blaenorol
- ar neu ar ôl 11 Rhagfyr, byddwch yn talu'r cyfraddau treth newydd
Yn y rhan fwyaf o achosion, gellir defnyddio’r cyfraddau blaenorol pan fydd contractau’n cael eu cyfnewid ar neu cyn 10 Rhagfyr 2024, ond nad yw’r pryniant wedi’i gwblhau tan ar neu ar ôl y dyddiad hwn.
Mae gennym ganllawiau trosiannol ar gyfer y newid i gyfraddau preswyl uwch Rhagfyr 2024. Mae hyn yn ymhelaethu ar y rheoliadau ac yn cwmpasu pa gyfraddau fydd yn berthnasol i drafodiad.
Sut i ffeilio ffurflen dreth gan ddefnyddio’r rheolau trosiannol
Os ydych chi'n ffeilio ffurflen dreth bapur, dylech:
- Anghytuno â'r cyfrifiad treth a gaiff ei gynhyrchu.
- Nodi’r dreth sy’n ddyledus a gyfrifiwyd gan ddefnyddio'r cyfraddau a'r bandiau blaenorol. Gallwch ddefnyddio ein cyfrifiannell dreth i’ch helpu i gyfrifo'r dreth sy'n ddyledus. Ond dylech ddefnyddio'r dyddiad cyfnewid fel y dyddiad y daeth y trafodiad i rym fel bod y cyfrifiad yn cael ei wneud gan ddefnyddio'r cyfraddau a'r bandiau cywir.
- Dewiswch ‘rheolau trawsnewidiol yn berthnasol' fel y rheswm dros anghytuno â'r cyfrifiad treth ac eglurwch sut y daethoch i'ch cyfrifiad.
Os ydych yn ffeilio ffurflen dreth bapur dan gwestiwn 100, dewiswch 'rheolau trosiannol yn berthnasol' os ydych wedi defnyddio'r rheolau trosiannol i gyfrifo'r dreth yn seiliedig ar y cyfraddau ar gyfer TTT cyn 11 Rhagfyr 2024.
Treth Gwarediadau Tirlenwi
Newidiadau i gyfraddau Treth Gwarediadau Tirlenwi yng Nghymru
O 1 Ebrill 2025 ymlaen, mae cyfraddau Treth Gwarediadau Tirlenwi yn newid. Y cyfraddau newydd yw:
| Cyfraddau’r Dreth Tirlenwi | Cyfradd o 1 Ebrill 2025 |
|---|---|
| Cyfraddau safonol (fesul tunnell) | £126.15 |
| Cyfraddau is (fesul tunnell) | £6.30 |
| Cyfradd Gwarediad heb ei Awdurdodi (fesul tunnell) | £189.25 |
Rydym wedi diweddaru'r dudalen ar y cyfraddau TGT sydd wedi’u gosod gan Lywodraeth Cymru.
Cymorth a gwybodaeth
Os oes gennych ymholiad ynglŷn â thrafodiad, cysylltwch â ni os gwelwch yn dda.