Bydd cymorth ariannol ar unwaith yn cael ei ddarparu i bobl y mae eu cartrefi wedi dioddef llifogydd yn ystod Storm Bert.
Bydd Llywodraeth Cymru yn ariannu awdurdodau lleol i ddarparu grantiau o £1000 i aelwydydd heb yswiriant, neu £500 i aelwydydd yr effeithir arnynt sydd â sicrwydd yswiriant presennol.
Cadarnhawyd y newyddion yn y Senedd heddiw gan y Prif Weinidog Eluned Morgan a'r Dirprwy Brif Weinidog Huw Irranca-Davies ar ôl dyddiau o ymweliadau â chymunedau a effeithiwyd arnynt gan Storm Bert ledled Cymru.
Wrth annerch ASau yn y Senedd, dywedodd y Dirprwy Brif Weinidog Huw Irranca-Davies:
"Y peth cyntaf rydw i am ei wneud heddiw yw estyn fy nghydymdeimlad i'r bobl yr effeithiodd Storm Bert ar eu cartrefi a'u busnesau dros y penwythnos.
"Mae effeithiau llifogydd yn ddinistriol, a gwn y bydd pobl ledled Cymru yn teimlo'n ofidus ac yn bryderus drostynt eu hunain, eu hanwyliaid yr effeithir arnynt, a'u bywoliaeth.
"Mae Storm Bert wedi ein hwynebu unwaith eto gyda'r realiti o beth fydd digwyddiadau tywydd eithafol amlach yn ei olygu i gymunedau ledled Cymru."
Aeth y Dirprwy Brif Weinidog, a oedd wedi ymweld â Phontypridd, Ynysgynwraidd a Chwmtyleri cyn annerch y Senedd, ymlaen i ddiolch i'r gwasanaethau brys, Cyfoeth Naturiol Cymru, awdurdodau lleol ac eraill sydd wedi bod yn gweithio ar yr ymateb i Storm Bert.
"Rwy'n gwybod bod llawer o gymunedau ledled y wlad wedi dod at ei gilydd i weithio ochr yn ochr ag asiantaethau allweddol ac i gefnogi ei gilydd yn yr ymateb ar y cyd," meddai.
"Mae'r gwaith hwn, dan yr amgylchiadau anoddaf un, i leihau'r effeithiau ar gymunedau ble bynnag y bo modd, o'r pwys mwyaf."
O ganol dydd heddiw, mae awdurdodau lleol wedi adrodd am lifogydd mewnol i gyfanswm o 433 eiddo -
- 125 yn RhCT,
- 90 ym Merthyr,
- 75 ym Mlaenau Gwent,
- o leiaf 50 yn Nhrefynwy,
- 50 yng Nghaerffili,
- 15 yn Nhorfaen,
- 6 ym Mhowys,
- 6 yn Sir Gaerfyrddin,
- 3 ym Mhen-y-bont ar Ogwr,
- 3 yn Sir y Fflint,
- 2 yng Nghaerdydd ac
- 1 yng Nghastell-nedd Port Talbot.
Ers 2021, mae Llywodraeth Cymru wedi darparu bron i £300 miliwn i awdurdodau rheoli risg i'w fuddsoddi mewn rheoli perygl llifogydd.
Eleni, mae wedi cynnal y lefelau uchaf erioed o gyllid ac wedi darparu mwy na £75 miliwn i awdurdodau Rheoli Perygl Llifogydd ledled Cymru.
Mae hyn yn cynnwys £9.7 miliwn o gyfalaf a £4.95 miliwn o gyllid refeniw ar gyfer awdurdodau lleol, a £22 miliwn o gyfalaf a refeniw o £24.5 miliwn i Cyfoeth Naturiol Cymru.