Y ddarpariaeth addysg mewn ymateb i COVID-19: asesiad o'r effaith ar hawliau plant

Sut y bydd y cynnig yn effeithio ar fywydau plant, yn gadarnhaol ac yn negyddol?

Bydd y penderfyniadau polisi a nodir yn Adran 1 yn effeithio ar bob plentyn a pherson ifanc a manylwyd ar y rhain yn Adrannau 1 i 5 o'r Asesiad Effaith Integredig hwn, gan gynnwys y camau lliniaru ategol rydym wedi ceisio eu rhoi ar waith. Fodd bynnag, yn gryno, mae'n debygol y bydd yr effeithiau hyn fel a ganlyn:

Tarfu ar ddysgu

Gyda gwyliau'r Pasg yn cael eu symud ymlaen, ysgolion yn cael eu haddasu at ddibenion gwahanol ac felly ar gau i'r mwyafrif o ddysgwyr a chyflwyno dysgu o bell. Mae'n debyg y bydd wedi cymryd rhywfaint o amser i bob dysgwr addasu i'r sefyllfa hon, ni waeth beth fo'i amgylchiadau, ac ni fwriedir i'r rhaglen Parhad Dysgu na'r ddarpariaeth mewn ysgolion a addaswyd at ddibenion gwahanol atgynhyrchu'r addysg a fyddai'n cael ei darparu mewn ysgolion fel arfer. Bydd llawer o ysgolion eisoes wedi bod yn cynllunio trefniadau pontio a gweithgareddau i ddysgwyr blwyddyn 6 sy'n symud i ddarpariaeth uwchradd y flwyddyn nesaf cyn i'r cyfyngiadau symud gael eu rhoi ar waith.

Effaith negyddol bosibl ar iechyd a llesiant dysgwyr

Gall peidio â bod yn yr ysgol effeithio ar arferion dyddiol a rhyngweithio cymdeithasol a all gynyddu teimladau o unigrwydd a phroblemau iechyd meddwl. Gall peidio â bod yn yr ysgol gael effaith andwyol ar faeth plant a'u lefelau o weithgarwch corfforol, ac mae'n bosibl y bydd gorbryder yn cynyddu o ganlyniad i natur y pandemig a phryder am deulu a ffrindiau. Bydd llawer o ddysgwyr wedi dioddef trawma i ryw raddau o ganlyniad i beidio â bod yn yr ysgol. Gall diffyg chwarae hefyd effeithio ar iechyd a datblygiad emosiynol. Er bod yr effeithiau ar ddysgu i'r rhai mewn blynyddoedd pontio yn annhebygol o fod yn sylweddol i'r rhan fwyaf o ddysgwyr, mae'r goblygiadau llesiant i'r rhai sy'n symud o un lleoliad i'r llall, heb gyfle i ffarwelio o bosibl, wedi'u nodi.

Llesiant diwylliannol

Effaith negyddol ar lesiant diwylliannol, gyda llai o gyfleoedd i gymryd rhan mewn gweithgareddau diwylliannol, celfyddydol, chwaraeon a hamdden. I'r rhai mewn cartrefi di-Gymraeg, bydd mwy o heriau o ran datblygu'r Gymraeg.

Llesiant oherwydd eu hamgylchedd cartref

I rai dysgwyr, gall peidio â bod yn amgylchedd yr ysgol fod yn arbennig o niweidiol. Gallai hyn fod oherwydd eu hamgylchedd cartref: problemau alcohol neu gyffuriau; perthnasoedd camdriniol; diffyg goddefgarwch o grefydd, rhywedd neu gyfeiriadedd rhywiol dysgwr, a mwy o risg o gamfanteisio ar-lein; neu am fod angen cymorth ychwanegol ar y dysgwr gyda'i ddysgu neu ei lesiant a ddarperir drwy'r ysgol, er enghraifft cymorth dysgu ychwanegol, offer arbenigol, gwasanaethau cwnsela. Hefyd, bydd peidio â chael trefn ddyddiol yr ysgol a cholli sicrwydd o ran pryd neu sut y bydd pethau'n digwydd yn ystod y dydd yn effeithio ar rai dysgwyr, yn ogystal â pheidio â gweld athrawon a staff cymorth y maent wedi meithrin cydberthynas â nhw. Gall hyn gael mwy o effaith ar y dysgwyr hynny sydd ag Anhwylder ar y Sbectrwm Awtistig, dysgwyr y mae trawma wedi effeithio arnynt neu'r rhai sy'n cael trafferth rheoli eu hemosiynau.

Cyfleoedd cynnydd yn y dyfodol

Mae canslo arholiadau wedi peri gorbryder ymhlith llawer o ddysgwyr, o ran effaith bosibl ar eu cyfleoedd cynnydd yn y dyfodol, amcangyfrif graddau a ph'un a fydd hyn yn adlewyrchiad cywir a theg o'u perfformiad tebygol pe baent wedi sefyll arholiadau, ac effaith y tarfu ar y rhai y disgwylir iddynt sefyll eu harholiadau yn 2021.

Effaith ar ymgeiswyr preifat

Bydd effaith ychwanegol ar rai dysgwyr sy'n ymgeiswyr preifat, a all gynnwys y rhai sy'n cael eu haddysgu gartref, y rhai sy'n ymgymryd â dysgu o bell (er enghraifft dysgwyr mwy aeddfed neu'r rhai sy'n paratoi i ailsefyll) a'r rhai sy'n cael gwasanaethau tiwtora preifat a ddarperir drwy'r awdurdod lleol (rhai cyfleusterau addysg heblaw yn yr ysgol neu Unedau Cyfeirio Disgyblion er enghraifft), oherwydd os na fydd gan ganolfan arholiadau ddigon o wybodaeth am ddysgwr er mwyn gwneud dyfarniad, efallai na fydd yn bosibl i'r dysgwr gael gradd amcangyfrifedig.

Er y cydnabyddir y bydd y mwyafrif o'r effeithiau hyn yn cael effaith negyddol ar ddysgwyr, mae rhai effeithiau cadarnhaol posibl yn ystod y cyfnod hwn o gyfyngiadau hefyd pan fydd ysgolion a lleoliadau ar gau i'r mwyafrif o ddysgwyr. Mae peidio â bod yn yr ysgol neu mewn lleoliad addysgol arall wedi bod yn brofiad cadarnhaol i rai dysgwyr a gwyddom, er enghraifft, fod diddordeb rhai dysgwyr yn yr hyn y maent yn ei ddysgu wedi cael ei ailennyn drwy'r ffordd newydd hon o weithio. 

Gall manteision posibl eraill gynnwys:

• mwy o amser i'w dreulio â'u teulu agos, gan gynnwys teuluoedd yn agosáu at ei gilydd ar ôl treulio mwy o amser gyda'i gilydd
• mwy o amser i ganolbwyntio ar hobïau, diddordebau a chyfleoedd i chwarae
• teimlo'n fwy diogel yn eu lleoliadau maethu
• lleihad mewn gorbryder os oeddent yn cael eu bwlio yn yr ysgol
• lleihad mewn gorbryder am nad oes rhaid sefyll arholiadau pwysig yn yr haf

Bydd yn bwysig casglu'r straeon cadarnhaol hyn ac adeiladu arnynt.

O ran y penderfyniad i ohirio gwaith ar y cynigion addysg yn y cartref, er ein bod yn ymwybodol o effaith y penderfyniad hwn ar addysgu plant yn y cartref, mae dyletswydd eisoes ar awdurdodau lleol i nodi plant yn eu hardal nad ydynt yn cael addysg addas. Diben y cynigion ar gyfer y canllawiau statudol a'r rheoliadau cronfa ddata oedd atgyfnerthu a chynorthwyo awdurdodau lleol i gydymffurfio â'r ddyletswydd gyfredol honno. Mae eu cyfrifoldebau o ran sicrhau bod plant yn cael addysg addas, ni waeth ble y caiff ei darparu, yn gyfredol o hyd.

Sut y bydd y cynnig yn effeithio ar wahanol grwpiau o blant (e.e. plant sydd wedi dioddef profiad niweidiol yn ystod plentyndod, plant sy'n byw mewn tlodi, plant ag anabledd, plant sy'n byw mewn cartrefi Cymraeg eu hiaith a phlant mewn addysg Gymraeg ac ati.)

Bydd y penderfyniadau polisi a nodir yn Adran 1 yn cael effaith niweidiol ar bob grŵp o blant a phobl ifanc fel y trafodir yn Adrannau 1 i 5. Fodd bynnag, mae'n debygol y bydd rhai o'r effeithiau hyn yn cael effaith anghymesur ar grwpiau penodol o ddysgwyr:

Addasu ysgolion at ddibenion gwahanol

• Dysgwyr agored i niwed a dan anfantais, gan gynnwys y rhai sy'n cael prydau ysgol am ddim, y mae Cymraeg neu Saesneg yn iaith ychwanegol iddynt a'r rhai o gymunedau Sipsiwn, Roma a Theithwyr, sy'n tueddu i gael llai o gyfleoedd addysgol y tu allan i'r ysgol. Mae'n bosibl bod eu rhieni'n llai tebygol o fod yn barod ar gyfer dysgu o bell, yn enwedig os oes ganddynt addysg ac adnoddau cyfyngedig eu hunain.
• Gall fod diffyg gallu i gymryd rhan mewn dysgu o bell oherwydd diffyg mynediad digidol, dim cyfrifiaduron, problemau wrth gysylltu â'r rhyngrwyd ac ati. Yn ôl adroddiad gan Ymddiriedolaeth Sutton, yn yr ysgolion mwyaf difreintiedig nododd 15% o athrawon na fyddai gan fwy na thraean o'u myfyrwyr fynediad digonol at ddyfais electronig er mwyn dysgu o gartref, o gymharu â dim ond 2% yn yr ysgolion gwladol mwyaf cefnog. Mae nifer o astudiaethau yn dangos bod y dysgwyr hynny nad oes ganddynt fynediad at y rhyngrwyd gartref dan anfantais addysgol. Mae mynediad digidol yn bwysig ar gyfer llesiant ac iechyd meddwl hefyd, gan fod yr angen i hunanynysu'n gorfforol yn hybu gweithgareddau cymdeithasol ar-lein.
• Cyn yr argyfwng presennol, roedd bwlch cyrhaeddiad nodedig eisoes yn amlwg rhwng y dysgwyr tlotaf a'r rhai cyfoethocaf, gyda'r rhai o gefndiroedd difreintiedig eisoes ddwywaith mor debygol o adael addysg ffurfiol heb gymwysterau TGAU mewn Cymraeg, Saesneg a Mathemateg o gymharu â'u cyd-ddisgyblion mwy cefnog. 
• Mae risg felly y bydd treulio amser i ffwrdd o'r ysgol yn lledaenu'r bwlch cyrhaeddiad hwn, gyda gwaith ymchwil helaeth yn dangos bod y myfyrwyr tlotaf yn mynd hyd yn oed yn fwy ar ei hôl hi yn ystod seibiannau o'r ysgol, megis gwyliau'r haf. Mae hefyd yn debygol y bydd yr effaith ar ganlyniadau ehangach y dysgwyr hyn yn fwy na'r effaith ar eu cyfoedion, a fydd yn debygol o gael mwy o gymorth gartref gyda'u datblygiad a'u dysgu, a hefyd mae'n bosibl y bydd ganddynt lefelau uwch o lesiant oherwydd eu hamgylchiadau gartref.

I'r 24,000 o blant agored i niwed yng Nghymru, daw'r cyfnod hwn â rhagor o ansicrwydd. Mae'n debygol y bydd y bwlch mewn dysgu yn cael mwy o effaith arnynt a gallai anghydraddoldeb posibl yn y cymorth maent yn ei gael gartref eu rhoi dan fwy o anfantais os bydd, er enghraifft, eu gofalwyr maeth, eu perthnasau neu staff mewn cartrefi gofal yn mynd yn sâl. Yn yr un modd, efallai y bydd anawsterau i ofalwyr ifanc wrth gydbwyso dysgu parhaus o gartref â gofalu am aelodau o'r teulu.

Efallai fod dysgwyr sy'n agored i niwed a dan anfantais wedi bod yn cael cymorth ychwanegol yn yr ysgol. Gallai hyn fod wedi cynnwys, er enghraifft, gwasanaeth cwnsela yn yr ysgol, THRIVE, coetsio emosiynol, Therapi Lego, defnydd o offer arbenigol neu hyd yn oed gymorth un i un. Er y byddem yn disgwyl i hyn barhau o bell i ryw raddau; mae'n annhebygol y byddai modd darparu'r un cymorth yn yr un ffordd o bell. 

Gall hyn fod wedi cael effaith negyddol ar ddysgu a llesiant y dysgwyr hyn; ond dylid lliniaru'r effaith hirdymor drwy'r cymorth a roddir ar waith wrth inni symud ymlaen i'r cam nesaf ar gyfer y system addysg.

Yn ogystal, i rai plant sy'n agored i niwed, athrawon oedd y gweithwyr proffesiynol oedd mewn cysylltiad mwyaf rheolaidd â'r plant a, thrwy gyswllt dyddiol, roeddent mewn sefyllfa i nodi plant a oedd yn wynebu risg a gwneud atgyfeiriadau at asiantaethau eraill. I rai plant, gallai'r diffyg cyswllt ag athrawon arwain at oedi wrth nodi risg. Fodd bynnag, er mwyn lliniaru hyn, cyn i ysgolion gael eu haddasu, gofynnwyd iddynt nodi eu plant mwyaf agored i niwed, gan gynnwys y rhai nad oedd gwasanaethau yn gwybod amdanynt, a chadw mewn cysylltiad rheolaidd â nhw. Yn ogystal, rhoddodd y gwasanaethau plant statws 'Coch, Melyn, Gwyrdd' i bob plentyn â gweithiwr cymdeithasol er mwyn asesu lefel y cyswllt a'r cymorth roedd ei angen arno. Mae'r gwaith o fonitro ac adolygu plant sy'n agored i niwed wedi parhau drwy gydol y cyfnod hwn.

Mae'r costau ychwanegol i deuluoedd yn sgil newidiadau ehangach o ganlyniad i'r cyfyngiadau symud wedi arwain at gynnydd sylweddol yn nifer y teuluoedd sy'n cael credyd cynhwysol. Mae'n debygol y bydd llawer o'r rhain yn gweld gostyngiad sylweddol yn eu hincwm – mae'r lefelau cynyddol o ddiweithdra yn fwy cyffredinol yn golygu bod risg y bydd mwy o achosion o ddyledusrwydd, diymgeledd a thlodi plant.

Mae yna hefyd risgiau nad ydynt mor hawdd eu mesur gan nad yw'r holl blant sy'n byw mewn tlodi yn ‘gymwys’ i gael prydau ysgol am ddim, ac felly maent yn llithro drwy'r bylchau yn y cymorth ychwanegol a gynigiwyd hyd yn hyn, megis talebau bwyd.

Mae cau ysgolion i'r mwyafrif o ddysgwyr hefyd yn golygu y bydd dysgwyr sy'n agored i niwed a dan anfantais gartref yn amlach ac yn fwy agored i straen canlyniadol, a all gynnwys y canlynol:

Dysgwyr ag anghenion dysgu ychwanegol

Gall aros gartref darfu mwy ar fywydau a threfn feunyddiol dysgwyr ag anghenion addysgol ychwanegol ac anableddau, yn arbennig o ganlyniad i'w hanghenion addysgol arbenigol. Mae'r effaith hefyd yn debygol o fod yn fwy sylweddol ar eu teuluoedd a'u gofalwyr, am nad yw'r gofal seibiant a'r cyfleusterau y maent yn dibynnu arnynt ar gael, neu am fod y ddarpariaeth yn gyfyngedig iawn.

Dysgwyr o leiafrifoedd ethnig

Gall fod effaith anghymesur ar ddysgwyr o leiafrifoedd ethnig, yn enwedig y rhai y mae Cymraeg neu Saesneg yn iaith ychwanegol iddynt, yn debyg i'r problemau a nodir ar gyfer disgyblion cyfrwng Cymraeg (isod), oherwydd bod llai o gymorth gan rieni i barhau i ddysgu gartref os nad ydynt yn siarad Cymraeg na Saesneg.

Dysgwyr cyfrwng Cymraeg

Efallai y bydd llai o adnoddau ar gael i gefnogi dysgu parhaus drwy gyfrwng y Gymraeg. Er enghraifft, mae amrywiaeth o wersi ar-lein ar gael i ddysgwyr cyfrwng Saesneg ond efallai fod yr ystod i ddysgwyr cyfrwng Cymraeg yn fwy cyfyngedig gyda llai o opsiynau neu amrywiaeth ar gael i ennyn diddordeb dysgwyr. Mae risg felly y gallai ysgolion cyfrwng Cymraeg ei chael yn anos ailennyn diddordeb dysgwyr ar ôl y cyfnod o ddysgu o bell na'u cymheiriaid mewn ysgolion cyfrwng Saesneg, a gall hyn effeithio ar ganlyniadau TGAU yng Nghymru yn y dyfodol. Efallai fod y cymorth y gall rhieni dysgwyr cyfrwng Cymraeg nad ydynt yn siarad Cymraeg eu hunain ei roi er mwyn helpu'r dysgwyr i barhau i ddysgu gartref yn gyfyngedig hefyd. Gallai hyn waethygu'r effeithiau uchod gan olygu y bydd dysgwyr cyfrwng Cymraeg yn cael mwy o anawsterau na'u cyfoedion cyfrwng Saesneg.

Pa dystiolaeth y gwnaethoch ei defnyddio i lywio eich asesiad, gan gynnwys tystiolaeth gan blant neu eu cynrychiolwyr?

Defnyddiwyd amrywiaeth o wybodaeth i lywio'r asesiad hwn, gan gynnwys:

• cyngor gwyddonol a chyngor iechyd gan Ystafell Friffio Swyddfa'r Cabinet a'r Grŵp Cynghori Gwyddonol ar Argyfyngau, yn ogystal â gwybodaeth a chyngor gan Iechyd Cyhoeddus Cymru
• data a gasglwyd ac a gyhoeddwyd gan Lywodraeth Cymru a'i phartneriaid allweddol
• ymchwil flaenorol y gellir ei defnyddio i ddod i gasgliadau
• trafodaethau ag ymarferwyr a chynrychiolwyr eraill, a all roi adborth o safbwyntiau dysgwyr
• adborth ar faterion a godir gyda'r Comisiynydd Plant, Comisiynydd Cenedlaethau'r Dyfodol a Chomisiynydd y Gymraeg
• canlyniadau ymgyngoriadau a gynhaliwyd â rhanddeiliaid allweddol ar y penderfyniadau polisi hyn, er enghraifft ymgynghoriad Cymwysterau Cymru ar yr egwyddorion ar gyfer cyfrifo graddau a oedd hefyd yn cynnwys fersiwn i blant a phobl ifanc
• adroddiadau gwrando cymdeithasol dyddiol sydd wedi tynnu sylw at y pynciau allweddol sy'n trendio ar y cyfryngau cymdeithasol a chrynodebau o'r materion allweddol sy'n cael eu codi drwy ohebiaeth, y Ganolfan Pwynt Cyswllt Cyntaf a'r Uned Gwynion yn Llywodraeth Cymru
• profiad a chamau gweithredu gwledydd eraill y mae rhai ohonynt ar gam pellach yn yr ymateb i'r pandemig neu wedi gwneud dewisiadau gwahanol o ran polisïau
• adborth gan randdeiliaid allweddol a chyrff cynrychioliadol, gan gynnwys y rhai sy'n gweithio ar y rheng flaen ym myd addysg
• amrywiaeth o adroddiadau ymchwil sydd ar gael yn genedlaethol ac yn rhyngwladol a gwybodaeth am effeithiau COVID-19 a chlefydau pandemig tebyg

Mae gwybodaeth wedi cael ei chasglu gan blant a phobl ifanc drwy amrywiaeth o sianeli a, lle y bo'n bosibl, mae hyn wedi bwydo i mewn i'r Asesiad Effaith Integredig hwn. Mae hyn yn cynnwys:

• yr adroddiadau gwrando cymdeithasol dyddiol a gaiff eu llunio
• y Gweinidog Addysg yn cynnal sesiynau Holi ac Ateb ar y cyfryngau cymdeithasol gyda phobl ifanc
• y Gweinidog Addysg yn mynychu'r Senedd Ieuenctid
• yr ymateb i negeseuon fideo ar gyfer grwpiau penodol o ddysgwyr neu eu rhieni
• monitro pynciau'n ddyddiol sy'n codi mewn gohebiaeth, ymholiadau i'r ganolfan Pwynt Cyswllt Cyntaf neu'r Uned Gwynion – mae'r rhain hefyd wedi cael eu defnyddio i fireinio a diweddaru'r adran Cwestiynau Cyffredin ar wefan Coronafeirws Llywodraeth Cymru

Sut rydych wedi ymgynghori â phlant a phobl ifanc? Os nad ydych wedi, esboniwch pam.

Oherwydd natur ddigynsail yr argyfwng iechyd y cyhoedd rydym yn ei wynebu a pha mor gyflym y bu'n rhaid gwneud rhai o'r penderfyniadau polisi cychwynnol a'u rhoi ar waith, nid oedd yn bosibl ymgynghori â phlant a phobl ifanc cyn gwneud y penderfyniadau hyn.

Rydym yn cydnabod hyn ac rydym wedi cymryd camau er mwyn helpu i roi cyfle i ddysgwyr fynegi eu barn am y ffordd y mae'r penderfyniadau hyn wedi effeithio arnynt. Defnyddir y wybodaeth hon i'n helpu i ystyried a oes angen unrhyw gamau lliniaru pellach ac i roi sylfaen dystiolaeth ar gyfer penderfyniadau polisi pellach, yn enwedig y rhai hynny am gynllunio adferiad.

Mewn prosiect ar y cyd â Chomisiynydd Plant Cymru a Plant yng Nghymru, a chyda chymorth y Senedd Ieuenctid, lansiodd Llywodraeth Cymru arolwg ymgynghori ar-lein er mwyn rhoi cyfle i ddysgwyr fynegi eu barn am COVID-19. Rhoddodd yr arolwg gipolwg ar farn plant a phobl ifanc yn ystod pythefnos ym mis Mai. Cafwyd dros 23,000 o ymatebion i'r arolwg a chawsom farn plant a phobl ifanc am amrywiaeth o faterion, gan gynnwys cau ysgolion a chanslo arholiadau. Gan mai dewis yr ymatebwyr oedd ymateb i'r arolwg, efallai na fydd y canlyniadau yn gynrychioliadol, ond gwnaethom ymdrech arbennig i geisio mewnbwn gan amrywiaeth eang o oedrannau a grwpiau gwahanol o blant.

Yn seiliedig ar yr Erthyglau yng Nghonfensiwn y Cenhedloedd Unedig ar Hawliau'r Plentyn, crëwyd yr arolwg mewn partneriaeth â phlant a phobl ifanc. Roedd yr arolwg yn ceisio:

• dangos ymrwymiad Llywodraeth Cymru i gefnogi hawliau plant
• helpu i sicrhau bod y Llywodraeth yn gwrando ar farn plant
• darparu dolenni i ffynonellau gwybodaeth dibynadwy
• rhoi cyngor ar gymorth sydd ar gael i blant a phobl ifanc

Bydd Llywodraeth Cymru hefyd yn defnyddio canfyddiadau'r arolwg i sicrhau ein bod yn myfyrio ar hawliau a barn plant yn ystod argyfwng COVID-19 ac ar ei ôl.

Nid ymgynghorwyd â phlant a phobl ifanc mewn perthynas â phenderfyniadau a wnaed er mwyn sicrhau bod prydau ysgol am ddim yn parhau i gael eu darparu yn ystod pandemig COVID-19. Nid yw llawer o blant, yn enwedig plant iau, yn sylweddoli eu bod yn cael prydau ysgol am ddim a gall tynnu sylw at hyn beri trallod a chynyddu stigma. Mae'r Mesur Bwyta'n Iach mewn Ysgolion (Cymru) 2009 yn rhoi dyletswydd ar ysgolion ac awdurdodau lleol i ddiogelu hunaniaeth dysgwyr sy'n cael prydau ysgol am ddim. Mae hyn yn golygu y byddai ymgynghori â'r rhai dan sylw yn arbennig o anodd, a byddai risg y byddem yn torri'r gyfraith.

Pa dystiolaeth arall fyddai'n llywio'r asesiad?

Mae Llywodraeth Cymru yn gwneud ac yn defnyddio amrywiaeth o ymchwil ac arolygon er mwyn monitro effeithiau ar ddysgwyr a'u teuluoedd. Ceir manylion llawn y rhain yn Adran 7.4 ac maent yn cynnwys:

• adolygiad cyflym o dystiolaeth ymchwil yn y DU ac ymchwil ryngwladol sy'n canolbwyntio ar effeithiau argyfyngau ar iechyd meddwl a llesiant dysgwyr, a dulliau o gefnogi adferiad. Bwriedir cynnal rhagor o adolygiadau, a fydd yn helpu i ddatblygu'r cynllun Parhau Dysgu
• dadansoddiad ymchwiliol o gyfranogiad mewn dysgu o bell, drwy ddadansoddi data ar weithgarwch mewngofnodi
• cymorth cynllunio ar gyfer cyfres o weithgareddau ymchwil i'w cynnal gan sefydliadau addysg uwch ac ymarferwyr ysgol ar effaith y pandemig. Bydd y gwaith yn canolbwyntio ar addysg gychwynnol i athrawon yn y dyfodol ac ar ddarpariaeth mewn grwpiau o ysgolion
• ystyried opsiynau ar gyfer comisiynu arolwg o ymarferwyr ysgol er mwyn ein galluogi i feithrin dealltwriaeth fanylach o'u profiadau o ddarparu addysg, drwy ddulliau gwahanol, i ddysgwyr, er mwyn deall beth oedd yn fwy neu’n llai effeithiol a pham, yn ogystal â'r effeithiau ar lwyth gwaith a llesiant staff
• cynnwys cwestiynau a gaiff eu hadolygu bob mis yn Arolwg Cenedlaethol Cymru am brofiadau teuluoedd o ddarparu addysg
• ad-drefnu'r gweithgarwch a oedd eisoes yn mynd rhagddo cyn yr argyfwng, er mwyn casglu gwybodaeth am ei effeithiau, gan gynnwys:
  • gwerthuso rhaglen beilot fewngymorth Gwasanaethau Iechyd Meddwl Plant a'r Glasoed (CAMHS) 
  • adolygu gwasanaethau cwnsela mewn ysgolion ac yn y gymuned a threialu gwasanaethau i ddysgwyr iau
  • ymchwil i gefnogi'r gwaith o ddatblygu cynlluniau gweithredu ar gyfer y Strategaeth Gwaith Ieuenctid.

Isod ceir tabl o erthyglau Confensiwn y Cenhedloedd Unedig ar Hawliau Plant (CCUHP) yr ystyrir eu bod fwyaf perthnasol i'r polisïau a nodir yn Erthygl 1.