Systemau llethu tân awtomatig mewn cartrefi gofal i blant (WGC 010/2024)

Rhif y cylchlythyr:    WGC 010/2024

Dyddiad cyhoeddi:   23/07/2024

Statws:    Er gwybodaeth

Teitl:    Systemau llethu tân awtomatig mewn cartrefi gofal i blant

Cyhoeddwyd gan:    Colin Blick, Polisi Rheoliadau Adeiladu

Ar gyfer:    

Prif Weithredwyr Awdurdodau Lleol
Cymdeithas Llywodraeth Leol Cymru 
Cymdeithas Cymeradwywyr Rheolaeth Adeiladu
Fforwm Personau Cymwys

I'w anfon ymlaen at:

Rheolwyr Rheoli Adeiladu yr Awdurdodau Lleol 
Aelodau'r Senedd
 Arolygiaeth Gofal Cymru

Crynodeb:

Yn unol â gofynion Rheoliadau Adeiladu 2010 mae'r cylchlythyr hwn yn hysbysu rhanddeiliaid o'r rheoliadau ar gyfer systemau llethu tân awtomatig mewn cartrefi gofal i blant yng Nghymru.

I gael rhagor o wybodaeth, cysylltwch â:

Tîm Rheoliadau Adeiladu
Swyddfeydd Llywodraeth Cymru
Rhyd-y-car 
Merthyr Tudful
CF48 1UZ  

Llinell uniongyrchol:   0300 060 4400
E-bost:    enquiries.brconstruction@llyw.cymru
Gwefan:   adeiladu a chynllunio

Deddf Adeiladu 1984 

Rheoliadau Adeiladu 2010 ("Rheoliadau 2010")

1. Ar ran Gweinidogion Cymru rwy'n tynnu'ch sylw at Reoliadau Adeiladu (Diwygio) (Cymru) 2024 ("y Rheoliadau Diwygio") a wnaed ar 07 Mehefin 2024. Bydd y Rheoliadau Diwygio'n dod i rym ar 17 Rhagfyr 2024.
    
2. Yn unol ag adran 14(7) o Ddeddf Adeiladu 1984, gwnaed y Rheoliadau Diwygio ar ôl ymgynghori â Phwyllgor Cynghori Cymru ar Reoliadau Adeiladu.
    
3. Diben y Cylchlythyr hwn yw gwneud y canlynol:

• tynnu sylw at y gwelliannau ac egluro'r newidiadau y maent yn eu gwneud i Reoliadau 2010

4. Nid yw'r cylchlythyr yn rhoi cyngor ar ofynion technegol Rheoliadau Adeiladu 2010 gan fod Dogfennau Cymeradwy yn mynd i'r afael â'r materion hyn.
    
5. Mae'r Cylchlythyr hwn yn nodi'r newidiadau i Reoliad 2 (Dehongli) a Rheoliad 37A (Darparu systemau llethu tân awtomatig) o Reoliadau 2010 fel y'u diwygiwyd. Dolenni i'r rheoliadau: Rheoliadau Adeiladu (Diwygio) (Cymru) 2024 (legislation.gov.uk); Rheoliadau Adeiladu (Diwygio) (Cymru) 2024 (legislation.gov.uk)
    
6. Bydd y cyfeiriadau at Reoliad 37A o Reoliadau 2010 yn y Dogfennau Cymeradwy yn cael eu diweddaru maes o law. 

7. Mae'r Rheoliadau Diwygio yn gymwys i adeiladau a gwaith adeiladu yng Nghymru yn unig.
    
8. Mae'r Rheoliadau Diwygio yn diwygio Rheoliadau 2010 i atgynhyrchu darpariaethau a gynhwysir ym Mesur Diogelwch Tân Domestig (Cymru) 2011. Er mwyn cyflawni hyn, mae'r darpariaethau yn Rheoliadau 2010 bellach yn ei gwneud yn ofynnol:

• i systemau llethu tân awtomatig o dan Reoliad 37A o Reoliadau 2010 fod yn gymwys i gartrefi gofal i blant
• i systemau llethu tân awtomatig o dan Reoliad 37A o Reoliadau 2010 fod yn gymwys pan fo newid defnydd o gartref gofal i blant i gartref gofal i oedolion ac fel arall o gartref gofal i oedolion i gartref gofal i blant

9. Mae rheoliad 2(2) o'r Rheoliadau Diwygio yn diwygio'r diffiniad o "sefydliad" yn Rheoliad 2 (dehongli) o Reoliadau 2010. Mae'r newid yn rhoi mwy o eglurder ynghylch yr adeiladau sy'n cael eu cwmpasu gan y diffiniad. Y prif newid yw dileu'r cyfeiriad at blant o dan bump oed, a nodi "o dan 18 oed" yn lle hynny. Bydd hyn yn sicrhau bod cartrefi plant yn cael eu cynnwys yn y dehongliad hwn.

10. Mae rheoliad 2(3)(a) o'r Rheoliadau Diwygio yn diwygio Rheoliad 37A (darparu systemau llethu tân awtomatig) o Reoliadau 2010 i gynnwys cartrefi gofal i blant yn benodol mewn is-baragraff newydd (aa). Mae is-baragraff (a) yn cynnwys cartrefi gofal i oedolion. Felly, mae'r gwelliant hwn yn sicrhau cydraddoldeb rhwng cartrefi gofal i blant a chartrefi gofal i oedolion.
     
11. Mae rheoliad 2(3)(b) o'r Rheoliadau Diwygio yn rhoi paragraff newydd yn lle paragraff (2) fel bod newid defnydd sylweddol mewn adeilad, at ddibenion rheoliad 37A, yn cynnwys newid defnydd sylweddol o gartref gofal i blant i gartref gofal i oedolion neu o gartref gofal i oedolion i gartref gofal i blant. 
     
12. Mae paragraff (2A) sydd newydd ei fewnosod yn cadarnhau na fydd y gofynion a osodir gan Reoliad 6 o Reoliadau 2010 yn gymwys i newid defnydd sylweddol a ddisgrifir ym mharagraff (2)(b) o'r rheoliadau diwygio.

13. Nid yw'r Rheoliadau Diwygio yn gymwys mewn unrhyw achos pan fo hysbysiad adeiladu neu hysbysiad cychwynnol wedi ei roi i awdurdod lleol, neu pan fo cynlluniau llawn wedi eu hadneuo gydag awdurdod lleol cyn 17 Rhagfyr 2024. 
     
14. Pwysig: Bydd y gofyniad am systemau llethu tân awtomatig mewn cartrefi plant yn parhau i fod yn gymwys mewn perthynas â Mesur Diogelwch Tân Domestig (Cymru) 2011 cyn y dyddiad hwn.

Dylid anfon unrhyw ymholiadau mewn perthynas â'r Cylchlythyr hwn i'r cyfeiriad canlynol:

Y Tîm Rheoliadau Adeiladu, Llywodraeth Cymru‌, Rhyd-y-car Merthyr Tudful, CF48 1UZ.

E-bost: enquiries.brconstruction@llyw.cymru

Yn gywir

Mark Tambini

Pennaeth Polisi Rheoliadau Adeiladu