Cymhorthdal Costau Byw ar gyfer Hosbisau

Os ydych yn defnyddio’r cynllun hwn i ddyfarnu cymorthdaliadau, rhaid ichi roi gwybod i’r Uned Rheoli Cymorthdaliadau drwy anfon e-bost i: scu@gov.wales.

Bydd y cynllun ar waith ledled Cymru.

Teitl y Cynllun Cymhorthdal yw Cymhorthdal Costau Byw ar gyfer Hosbisau.

Mae adran 60(1) o Ddeddf Llywodraeth Cymru 2006 yn darparu y caniateir i Weinidogion Cymru wneud unrhyw beth y maent yn ei ystyried yn briodol er mwyn hyrwyddo neu wella llesiant cymdeithasol, economaidd neu amgylcheddol Cymru. Caniateir arfer y pŵer hwn er budd neu mewn perthynas â Chymru gyfan, neu unrhyw ran ohoni, neu â phawb neu unrhyw rai sy'n byw neu sy'n bresennol yng Nghymru.

Ystyrir bod y gweithgarwch sy'n cael ei gefnogi o dan y cynllun hwn yn 'Wasanaeth o Fudd Economaidd Cyhoeddus' ar y sail:

• bod y gwasanaeth yn cael ei ddarparu er budd y cyhoedd, ac
• na fyddai'r gwasanaeth yn cael ei ddarparu, neu na fyddai'n cael ei ddarparu ar y telerau gofynnol, gan fenter o dan amodau arferol y farchnad.

Yr amcan polisi penodol yw darparu cymorth tymor byr i gynnal gwasanaethau clinigol a ddarperir gan hosbisau yng Nghymru ar y lefelau presennol a helpu i gadw eu gweithluoedd. O ganlyniad, dylai gwasanaethau clinigol craidd a ddarperir gan hosbisau gael eu diogelu.

Llywodraeth Cymru

Hosbisau sy'n darparu gwasanaethau craidd y GIG.

Y sector gweithgareddau iechyd pobl a gwaith cymdeithasol yw'r sector a fydd yn cael ei gefnogi gan y cynllun hwn. Yn benodol, y sector hosbisau.

Hyd y Cynllun yw rhwng 1 Ebrill 2023 a 31 Mawrth 2024.

Cyfanswm y gyllideb ar gyfer y cynllun hwn yw £4 miliwn.

Bydd yr holl gymhorthdal a ddyfernir o dan y Cynllun yn cael ei ddyfarnu drwy grantiau.

Bydd hosbisau a gomisiynir gan fyrddau iechyd yng Nghymru i ddarparu gwasanaethau clinigol yn gymwys i wneud cais am y cymhorthdal hwn.

Cyfrifir y cymhorthdal ar sail y costau cyflog a ysgwyddir o ran darparu gwasanaethau clinigol yn 2023/2024.

Ni fydd unrhyw hosbis yn gymwys i gael mwy nag £1.1 miliwn.