Darpariaeth llety digartrefedd a chysgu allan: Mawrth 2023

Cyflwynwyd y casgliad data misol hwn yn ystod y pandemig coronafeirws (COVID-19).

Mae’r wybodaeth yn cynnwys llety dros dro a’r llety hirdymor a ddarperir i bobl sy’n wneud cais i’r awdurdodau lleol am gymorth tai gan eu bod mewn perygl o fod yn ddigartref.

Nid yw’r data hyn wedi cael yr un lefel o sicrwydd ansawdd ag ystadegau swyddogol, a gellir diwygio'r data yn y dyfodol.

Dylid trin y ffigurau ar gyfer y mis diweddaraf fel rhai dros dro. Nid yw pob awdurdod lleol wedi gallu darparu data cynhwysfawr ac adlewyrchir hynny, os yw’n berthnasol, yn y troednodiadau.

Ar gyfer yr amcangyfrifon o gysgu allan, rydym yn cyhoeddi dadansoddiad yn ôl awdurdod lleol. Ar gyfer data ar ddefnydd llety, i ddechrau rydym yn cyhoeddi data ar lefel Cymru yn unig.

Y gallu i gymharu’r data ag ystadegau ar ddigartrefedd statudol ac y cyfrif o gysgu allan

Mae'n bwysig nodi'r gwahaniaethau dilynol rhwng y casgliad data rheoli misol hwn a'n casgliadau data a chyhoeddiadau presennol ar ddigartrefedd statudol:

• Mae'r data misol hwn yn ymwneud â nifer yr unigolion sy'n profi digartrefedd ac sy'n cael eu cefnogi gan awdurdodau lleol i lety dros dro neu lety hirdymor addas.
• Mae ein casgliadau chwarterol a blynyddol ar ddigartrefedd statudol yn casglu data ar nifer yr aelwydydd, nid unigolion. Mae'r data hynny’n ymwneud â digartrefedd fel y'i diffinnir gan Ddeddf Tai (Cymru) 2014.

Yn ogystal, nid ydym yn argymell cymariaethau rhwng yr amcangyfrifon cysgu allan o'r casgliad misol hwn a'r cyfrif blynyddol o gysgu allan (hyd at fis Tachwedd 2019). Yn y casgliad misol hwn, gofynnir i awdurdodau lleol seilio eu hamcangyfrifon ar ddeallusrwydd lleol. Mae gan y cyfrif blynyddol o gysgu allan fethodoleg wahanol: ymarfer casglu gwybodaeth dwy wythnos, ac yna cyfrif ciplun un noson.

Y prif bwyntiau

Cymariaethau dros amser

Ar hyn o bryd, mae'n bwysig peidio â rhoi gormod o bwyslais ar ddata ar gyfer mis unigol neu gymariaethau â misoedd blaenorol. Mae'r casgliad misol hwn o wybodaeth reoli a'r canllawiau a ddarperir yn parhau i gael eu mireinio a'u gwella.

Defnyddio llety dros dro

• Ledled Cymru, cafodd 1,757 o bobl ddigartref eu rhoi mewn llety dros dro yn ystod y mis,  248 yn fwy nag ym mis Chwefror 2023. O’r rhain, roedd 546 yn blant dibynnol o dan 16 oed, cynnydd o 95 o fis Chwefror 2023. ^{[troednodyn 1] [troednodyn 4]}
• Ar 31 Mawrth 2023, roedd 10,221 o unigolion mewn llety dros dro, cynnydd o 493 ers 28 Chwefror 2023. Roedd 3,121 o’r rhain yn blant dibynnol o dan 16 oed, cynnydd o 114 ers 28 Chwefror 2023. ^{[troednodyn 2] [troednodyn 4]} 
• Rhwng dechrau’r pandemig COVID-19 a diwedd Chwefror 2023, mae dros 35,000 o bobl a oedd yn ddigartref ynghynt wedi cael cymorth i lety brys dros dro. ^{[troednodyn 1]}                                 

Unigolion digartref sydd wedi cael eu symud i lety hirdymor addas

• Ym mis Mawrth 2023, symudwyd 823 o unigolion digartref i lety hirdymor addas, 173 yn fwy nag ym mis Chwefror 2023. O’r unigolion digartref a symudwyd i lety hirdymor addas, roedd 271 yn blant dibynnol o dan 16 oed, 35 yn fwy nag ym mis Chwefror 2023.

Cysgu allan

• Ar 31 Mawrth 2023, amcangyfrifwyd bod 135 o unigolion yn cysgu allan ledled Cymru. Mae hyn yn gostyngiad o 26 o’r 161 unigolion sy’n cysgu allan ar 28 Chwefror 2023. ^{[troednodyn 3]}   
• Ar 31 Mawrth 2023, Casnewydd (33), Caerdydd (25), Sir Benfro (13), Pen-y-bont ar Ogwr (10) a Gywnedd (9)  oedd yr awdurdodau lleol a nododd y niferau uchaf o unigolion yn cysgu allan. Nododd pob awdurdod lleol arall fod 7 neu lai unigolyn yn cysgu allan, gyda pump awdurdod lleol yn adrodd sero. ^{[troednodyn 3]}

Troednodiadau

[1] Nid oedd un awdurdod lleol wedi cynnwys y rheini sy’n ‘ddigartref mewn cartref’.
[2] Nid oedd dau awdurdodau lleol wedi gallu cael data o lochesi menywod yn eu awdurdod lleol.
[3] Gofynnir i awdurdodau lleol seilio'r amcangyfrifon hyn ar wybodaeth leol, nid cyfrif un noson.
[4] Cyn mis Mawrth 2023 roedd un awdurdod lleol wedi adrodd am aelwydydd, nid unigolion. Gellir priodoli rhan o'r cynnydd o fis Chwefror 2023 i fis Mawrth 2023 i hyn.