Darpariaeth llety digartrefedd a chysgu allan: Mehefin 2022

Mae'r casgliad misol hwn yn disodli'r casgliad wythnosol o wybodaeth yn ystod pandemig y coronafeirws (COVID-19).

Mae’r wybodaeth yn cynnwys llety dros dro a’r llety hirdymor a ddarperir i bobl sy’n wneud cais i’r awdurdodau lleol am gymorth tai gan eu bod mewn perygl o fod yn ddigartref.

Nid yw’r data hyn wedi cael yr un lefel o sicrwydd ansawdd ag ystadegau swyddogol, a gellir diwygio'r data yn y dyfodol.

Dylid trin y ffigurau ar gyfer y mis diweddaraf fel rhai dros dro. Nid yw pob awdurdod lleol wedi gallu darparu data cynhwysfawr ac adlewyrchir hynny, os yw’n berthnasol, yn y troednodiadau.

Ar gyfer yr amcangyfrifon o gysgu allan, rydym yn cyhoeddi dadansoddiad yn ôl awdurdod lleol (o fis Tachwedd 2020). Ar gyfer data ar ddefnydd llety, i ddechrau rydym yn cyhoeddi data ar lefel Cymru yn unig.

Y gallu i gymharu’r data ag ystadegau ar ddigartrefedd statudol ac y cyfrif o gysgu allan

Mae'n bwysig nodi'r gwahaniaethau dilynol rhwng y casgliad misol newydd hwn a'n casgliadau data a chyhoeddiadau presennol ar ddigartrefedd statudol:

• Mae'r data misol hwn yn ymwneud â nifer yr unigolion sy'n profi digartrefedd ac sy'n cael eu cefnogi gan awdurdodau lleol i lety dros dro neu lety hirdymor addas.
• Mae ein casgliadau chwarterol a blynyddol ar ddigartrefedd statudol yn casglu data ar nifer yr aelwydydd, nid unigolion. Mae'r data hynny’n ymwneud â digartrefedd fel y'i diffinnir gan Ddeddf Tai (Cymru) 2014.

Yn ogystal, nid ydym yn argymell cymariaethau rhwng yr amcangyfrifon cysgu allan o'r casgliad misol hwn a'r cyfrif blynyddol o gysgu allan (hyd at fis Tachwedd 2019). Yn y casgliad misol hwn, gofynnir i awdurdodau lleol seilio eu hamcangyfrifon ar ddeallusrwydd lleol. Mae gan y cyfrif blynyddol o gysgu allan fethodoleg wahanol: ymarfer casglu gwybodaeth dwy wythnos, ac yna cyfrif ciplun un noson.

Prif bwyntiau

Cymariaethau dros amser

Ar hyn o bryd, mae'n bwysig peidio â rhoi gormod o bwyslais ar ddata ar gyfer mis unigol neu gymariaethau â misoedd blaenorol. Mae'r casgliad misol hwn o wybodaeth reoli a'r canllawiau a ddarperir yn parhau i gael eu mireinio a'u gwella.

Defnyddio llety dros dro

• Ledled Cymru, cafodd 1,397 o bobl ddigartref eu rhoi mewn llety dros dro yn ystod y mis, 166 yn llai nag ym mis Mai 2022. O’r rhain, roedd 462 yn blant dibynnol o dan 16 oed, gostyngiad o 74 o fis Mai 2022. ^{[troednodyn 1] [troednodyn 2]}
• Ar 30 Mehefin 2022, roedd 8,268 o unigolion mewn llety dros dro, cynnydd o 134 ers 31 Mai 2022. Roedd 2,380 o’r rhain yn blant dibynnol o dan 16 oed, cynnydd o 44 ers 31 Mai 2022. ^{[troednodyn 3]}
• Rhwng dechrau’r pandemig COVID-19 a diwedd Mehefin 2022, mae dros 24,200 o bobl a oedd yn ddigartref ynghynt wedi cael cymorth i lety brys dros dro. ^{[troednodyn 1] [troednodyn 2]}

Unigolion digartref sydd wedi cael eu symud i lety hirdymor addas

• Symudwyd 574 o unigolion digartref i lety hirdymor addas, 61 yn llai nag ym mis Mai 2022. O’r unigolion digartref a symudwyd i lety hirdymor addas, roedd 171 yn blant dibynnol o dan 16 oed, 69 yn llai nag ym mis Mai 2022. ^{[troednodyn 2]}

Cysgu allan

• Ar 30 Mehefin 2022, amcangyfrifwyd bod 117 o unigolion yn cysgu allan ledled Cymru. Mae hyn yn gynnydd o 16 o’r 101 unigolion sy’n cysgu allan ar 31 Mai 2022. ^{[troednodyn 4]}
• Ar 3o Mehefin 2022, Casnewydd (24), Sir Benfro (16), Caerdydd (14), a Abertawe (11) oedd yr awdurdodau lleol a nododd y niferau uchaf o  unigolion yn cysgu allan. Nododd pob awdurdod lleol arall fod 7 neu lai unigolyn yn cysgu allan, gyda wyth awdurdod lleol yn adrodd sero. ^{[troednodyn 4]}

Troednodiadau

[1] Nid oedd un awdurdod lleol wedi cynnwys y rheini sy’n ‘ddigartref mewn cartref’.
[2] Roedd un awdurdod lleol wedi adrodd am aelwydydd, nid unigolion. Felly, bydd tangyfrif bach yng nghyfanswm y ffigur a gyflwynir.
[3] Nid oedd dau awdurdodau lleol wedi gallu cael data o lochesi menywod yn eu awdurdod lleol.
[4] Gofynnir i awdurdodau lleol seilio'r amcangyfrifon hyn ar wybodaeth leol, nid cyfrif un noson.