Capasiti'r rhwydwaith (cynllun rheoli draenio a gwastraff dŵr): cynllun gweithredu

Er mwyn deall maint y gwelliant sydd ei angen, mae angen i ni asesu capasiti’r rhwydweithiau draenio a charthffosiaeth yn yr hir dymor.  

Mae Cynllun Rheoli Draenio a Gwastraff Dŵr wedi'i ddatblygu er mwyn gwneud hyn, a bydd cwmnïau dŵr yn ymgynghori arno gyda chwsmeriaid, rhanddeiliaid, rheoleiddwyr ac awdurdodau lleol.

Bydd y Cynllun Rheoli Draenio a Gwastraff Dŵr yn gynhwysfawr, yn seiliedig ar dystiolaeth ac yn dryloyw wrth asesu, cyn belled ag y bo modd, y capasiti presennol a'r camau gweithredu sydd eu hangen mewn cyfnodau 5 mlynedd, 10 mlynedd a 25 mlynedd, gan ystyried risgiau a materion megis newid yn yr hinsawdd.  Bydd yn cyd-fynd, cyn belled ag y bo modd, â chynlluniau a pholisïau strategol eraill.  Bydd yn anelu at ddarparu rhwydweithiau draenio a charthffosiaeth gwydn sy'n ateb y galw gweithredol yn ogystal â phwysau eraill ac sy'n lleihau methiannau'r system.

Wrth ddatblygu'r cynllun, ystyrir effaith systemau draenio ar yr amgylchedd yn uniongyrchol ac yn ehangach gan gynnwys cynefinoedd, ac wrth i ni ddatblygu atebion byddwn yn ystyried cynnydd a gwelliannau amgylcheddol net.

Bydd y Cynllun Rheoli Draenio a Gwastraff Dŵr yn gydweithredol ac  yn cydnabod pwysigrwydd sectorau'n cydweithio i ymateb i risgiau i ansawdd dŵr a gwasanaeth cwsmeriaid nawr ac i’r dyfodol yn ogystal â'r angen i ddarparu atebion effeithiol, gan nodi sut y byddant yn gwneud hyn, a sut  y mae rhanddeiliaid wedi ymgysylltu ac ymateb iddynt.  Bydd y cynllun yn gwella canlyniadau i gwsmeriaid ac yn codi ymwybyddiaeth o'r atebion angenrheidiol i ddiogelu'r amgylchedd, yn ogystal â dealltwriaeth y bydd y camau gweithredu yn cynnig gwerth am arian a buddion i’r gymdeithas gyfan.

Dylai'r cynllun ddangos arweiniad gan ystyried capasiti gweithredol pob sefydliad i ddatblygu a chyflawni'r cynllun a bod yn ymwybodol o gysylltiadau â fframweithiau cynllunio strategol eraill.  Yn olaf, caiff y cynllun ei ddatblygu yn unol â'r ymddygiadau a nodir yn Neddf Llesiant Cenedlaethau'r Dyfodol 2015 a bydd yn egluro sut y bydd yn cyfrannu at y canlyniadau llesiant. Bydd Cynlluniau Rheoli Draenio a Gwastraff Dŵr hefyd yn helpu cwmnïau dŵr a'u rhanddeiliaid i gyflawni eu rhwymedigaethau o dan Ddeddf yr Amgylchedd (Cymru) 2016.

Gan ddibynnu ar yr ymateb i’r ymgynghoriad, canlyniad y Cynllun Rheoli Draenio a Gwastraff Dŵr fydd creu cynllun a fydd yn rhoi gorlifoedd storm yn yr ardaloedd a wasanaethir gan Dŵr Cymru a Hafren Dyfrdwy ar drywydd gwell dealltwriaeth o’u heffaith, gyda’r nod o ddileu niwed ecolegol i’r amgylchedd.

Bydd y canlyniadau tymor byr yn canolbwyntio ar wella dealltwriaeth, dulliau cefnogi penderfyniadau a datblygu llwybr addasol i ddangos sut y gallai’r cynllun newid dros amser - mewn ymateb i heriau twf, newid yn yr hinsawdd, ehangu trefol a newidiadau mewn rheoleiddio.  Yn ddibynnol ar ymatebion rhanddeiliaid a chwsmeriaid i’r ymgynghoriad, bydd y cynllun yn cynnwys cynigion buddsoddi ar gyfer lleihau gollyngiadau o orlifoedd storm yn AMP8, pennu'r amserlenni ar gyfer sicrhau lleihad yng ngollyngiadau’r gorlifoedd storm, ynghyd â lleihau'r perygl o lifogydd, a nodi ardaloedd lle mae Awdurdodau Rheoli Risg yn hanfodol i gyflawni'r canlyniadau hyn.

Mae'r camau sy'n cael eu cymryd o fewn y ffrwd waith hon yn cyd-fynd â Rhaglen Lywodraethu Llywodraeth Cymru  2021-26 a’r nodau'r canlynol:

• Adeiladu economi gryfach a gwyrddach wrth i ni wneud y cynnydd mwyaf posibl tuag at ddatgarboneiddio.
• Gwneud ein dinasoedd, ein trefi a'n pentrefi yn lleoedd gwell i fyw a gweithio ynddynt.
• Ymgorffori ein hymateb i'r argyfwng hinsawdd a natur ym mhopeth a wnawn.
• Dechrau dynodi dyfroedd mewndirol Cymru ar gyfer hamdden, gan gryfhau'r gwaith o fonitro ansawdd dŵr.