Darpariaeth llety digartrefedd a chysgu allan: Mehefin 2021

Mae'r casgliad misol hwn yn disodli'r casgliad wythnosol o wybodaeth yn ystod pandemig y coronafeirws (COVID-19).

Mae’r wybodaeth yn cynnwys llety dros dro a’r llety hirdymor a ddarperir i bobl sy’n wneud cais i’r awdurdodau lleol am gymorth tai gan eu bod mewn perygl o fod yn ddigartref.

Nid yw’r data hyn wedi cael yr un lefel o sicrwydd ansawdd ag ystadegau swyddogol, a gellir diwygio'r data yn y dyfodol.

Dylid trin y ffigurau ar gyfer y mis diweddaraf fel rhai dros dro. Nid yw pob awdurdod lleol wedi gallu darparu data cynhwysfawr ac adlewyrchir hynny, os yw’n berthnasol, yn y troednodiadau.

Ar gyfer yr amcangyfrifon o gysgu allan, rydym yn cyhoeddi dadansoddiad yn ôl awdurdod lleol (o fis Tachwedd 2020). Ar gyfer data ar ddefnydd llety, i ddechrau rydym yn cyhoeddi data ar lefel Cymru yn unig.

Y gallu i gymharu’r data ag ystadegau ar ddigartrefedd statudol ac y cyfrif o gysgu allan

Mae'n bwysig nodi'r gwahaniaethau dilynol rhwng y casgliad misol newydd hwn a'n casgliadau data a chyhoeddiadau presennol ar ddigartrefedd statudol:

• Mae'r data misol hwn yn ymwneud â nifer yr unigolion sy'n profi digartrefedd ac sy'n cael eu cefnogi gan awdurdodau lleol i lety dros dro neu lety hirdymor addas.
• Mae ein casgliadau chwarterol a blynyddol ar ddigartrefedd statudol yn casglu data ar nifer yr aelwydydd, nid unigolion. Mae'r data hynny’n ymwneud â digartrefedd fel y'i diffinnir gan Ddeddf Tai (Cymru) 2014.

Yn ogystal, nid ydym yn argymell cymariaethau rhwng yr amcangyfrifon cysgu allan o'r casgliad misol hwn a'r cyfrif blynyddol o gysgu allan (hyd at fis Tachwedd 2019). Yn y casgliad misol hwn, gofynnir i awdurdodau lleol seilio eu hamcangyfrifon ar ddeallusrwydd lleol. Mae gan y cyfrif blynyddol o gysgu allan fethodoleg wahanol: ymarfer casglu gwybodaeth dwy wythnos, ac yna cyfrif ciplun un noson.

Prif bwyntiau

Cymariaethau dros amser

Ar hyn o bryd, mae'n bwysig peidio â rhoi gormod o bwyslais ar ddata ar gyfer mis unigol neu gymariaethau â misoedd blaenorol. Mae'r casgliad misol hwn o wybodaeth reoli a'r canllawiau a ddarperir yn parhau i gael eu mireinio a'u gwella.

Defnyddio llety dros dro

• Ledled Cymru, cafodd 1,213 o bobl ddigartref eu rhoi mewn llety dros dro yn ystod y mis, 119 yn fwy nag ym mis Mai 2021. O’r rhain, roedd 243 yn blant dibynnol o dan 16 oed, cynnydd o 20 o fis Mai 2021. (a) (b)
• Ar 30 Mehefin 2021, roedd 6,452 o unigolion mewn llety dros dro, cynnydd o 69 ers 31 Mai 2021. Roedd 1,525 o’r rhain yn blant dibynnol o dan 16 oed, cynnydd o 131 ers 31 Mai 2021. (b) (c)
• Rhwng dechrau’r pandemig COVID-19 a diwedd Mehefin 2021, mae dros 12,400 o bobl a oedd yn ddigartref ynghynt wedi cael cymorth i lety brys dros dro. (a) (b)

(a) Nid oedd un awdurdod lleol wedi cynnwys y rheini sy’n ‘ddigartref mewn cartref’.
(b) Roedd un awdurdod lleol wedi adrodd am aelwydydd, nid unigolion. Felly, bydd tangyfrif bach yng nghyfanswm y ffigur a gyflwynir.
(c) Nid oedd dau awdurdodau lleol wedi gallu cael data o lochesi menywod yn eu awdurdodau lleol.

Unigolion digartref sydd wedi cael eu symud i lety hirdymor addas

• Symudwyd 517 o unigolion digartref i lety hirdymor addas, 34 yn fwy nag ym mis Mai 2021. O’r unigolion digartref a symudwyd i lety hirdymor addas, roedd 160 yn blant dibynnol o dan 16 oed, 16 yn fwy nag ym mis Mai 2021. (d)

(d) Roedd un awdurdodau lleol wedi adrodd am aelwydydd, nid unigolion. Felly, bydd tan gyfrif bach yng nghyfanswm y ffigur a gyflwynir.

Cysgu allan

• Ar 30 Mehefin 2021, amcangyfrifwyd bod 106 o unigolion yn cysgu allan ledled Cymru. Mae hyn yn gynnydd o 30 o’r 76 unigolion a oedd yn cysgu allan ar 31 Mai 2021. (e)
• Ar 30 Mehefin 2021, Casnewydd (24), Caerffili (14), Ceredigion (11) Caerdydd (9), Sir Ddinbych (8) a Sir Benfro (7) oedd yr awdurdodau lleol a nododd y niferau uchaf o unigolion yn cysgu allan. Nododd pob awdurdod lleol arall fod 5 neu lai unigolyn yn cysgu allan, gyda chwech awdurdod lleol yn adrodd sero. (e)

(e) Gofynnir i awdurdodau lleol seilio'r amcangyfrifon hyn ar wybodaeth leol, nid cyfrif un noson.