Datganiad Ysgrifenedig: Penodi Dr Nerys Llewelyn Jones yn Asesydd Interim Diogelu’r Amgylchedd, Cymru

Mae'n bleser gennyf hysbysu Aelodau'r Senedd fy mod wedi penodi Dr Nerys Llewelyn Jones yn Asesydd Interim Diogelu'r Amgylchedd, Cymru. Bydd yn dechrau ar ei rôl ar 1 Mawrth 2021.

Bydd Dr Llewelyn Jones yn goruchwylio'r mesurau interim ar gyfer llywodraethu amgylcheddol am gyfnod o hyd at ddwy flynedd. Bydd ei gwaith yn ategu’r rolau sydd gan gyrff rheoleiddio presennol Cymru.

Mae Dr Llewelyn Jones yn gyfreithiwr amaethyddol medrus sydd â phrofiad helaeth yn y sector a gwybodaeth eang am gyfraith amgylcheddol. A hithau’n bartner rheoli ar ei phractis cyfraith gwledig ei hun, yn aelod o Banel Tirfeddianwyr Cymru ac yn

Is-gadeirydd ar y Gymdeithas Cyfraith Amaethyddol, mae ganddi brofiad helaeth ar draws sectorau amaethyddol ac amgylcheddol Cymru.

Mae'r penodiad hwn yn rhan o fy ymrwymiad i sicrhau nad yw gadael yr Undeb Ewropeaidd yn arwain at erydu’n safonau amgylcheddol. Wrth oruchwylio'r mesurau interim ar gyfer llywodraethu amgylcheddol yng Nghymru, bydd yn ystyried materion a gaiff eu codi gan y cyhoedd ynglŷn â sut y mae cyfraith amgylcheddol yng Nghymru yn cael ei gweithredu, a bydd yn mynd ati, ar ôl ystyried, i roi ei chyngor a chyflwyno'i hargymhellion imi. Byddaf yn gosod ei hadroddiadau gerbron y Senedd, ynghyd â fy ymateb i i’r adroddiadau hynny. 

Rwy'n falch bod Dr Llewelyn Jones yn ymuno â ni ar adeg pan fydd ei harbenigedd a'i phrofiad yn cyfrannu at ein dealltwriaeth wrth inni ddatblygu’r corff goruchwylio parhaol ar gyfer Cymru. Rwy’n dymuno’n dda iddi yn y rôl hon.