Mae busnes awyrofod ym Mrychdyn, a gafodd ei sefydlu yn dilyn cau Marshall Aviation Services, yn dathlu ar ôl ennill contract newydd gyda chwmni blaengar.
![Gweinidog yr Economi, Ken Skates](/sites/default/files/styles/600x400/public/announcements/2019-03/growing-success-for-flintshire-phoenix-aerospace-company.jpg?itok=Fhvwxg4a)
Mae Aerocare Aviation Services, sydd wedi’u lleoli yn Ardal Fenter Glannau Dyfrdwy, wedi cael eu penodi'n asiant ar gyfer y DU, a'r gosodwr a ffefrir yn y DU a rhannau o Ogledd Ewrop ar gyfer caban peilot gwydr modern Bendix King, sy'n hwb arall ar gyfer y cwmni a gafodd ei sefydlu yn 2017.
Busnes craidd Aerocare yw cynnal a chadw, atgyweirio, addasu ac ailwampio awyrennau busnes. Maent yn cynnig pecyn cyflawn gan gynnwys afioneg a chwistrellu paent, ac mae ailwampio tu mewn awyrennau yn cael ei gynnal i safonau uchel iawn ar gyfer y rhan o'r busnes sy'n ymdrin ag awyrennau moethus.
Cafodd y gwaith o sefydlu’r cwmni ei arwain gan Gyn-Reolwr Cyffredinol Marshall, gan gyflogi 28 cyn aelod o staff. Derbyniodd llawer o'r rhain gymorth gan Raglen ReAct Llywodraeth Cymru. Aeth y cwmni yn ei flaen i gyflogi cyfanswm o 40 cyn-gyflogai Marshall, ac mae'r cwmni bellach yn cyflogi 60 o staff gyda throsiant o £7 miliwn.
Yn ogystal â chymorth drwy raglen ReAct mae Aerocare hefyd wedi elwa ar y rhaglen Cymorth Sgiliau Hyblyg a’r Cynllun Rhyddhad Ardrethi Busnes, ac mae wedi rhannu stondin Llywodraeth Cymru mewn nifer o ddigwyddiadau awyrofod allweddol.
I ddathlu'r contract diweddaraf ymwelodd Gweinidog yr Economi, Ken Skates, â'r cwmni wrth iddynt gynnal diwrnod agored gyda gweithredwyr posibl.
Dywedodd Ken Skates:
"Heb os mae Aerocare yn gwmni ffenics. Maen nhw wedi codi o'r siom o Marshall yn cau ac wedi cadw rhai o'r staff medrus gyda chymorth Llywodraeth Cymru. Maen nhw’n enghraifft o lwyddiant gwirioneddol.
"Mae Brexit yn her fawr i bob un ohonon ni, ac mae'n dda gweld bod Aerocare wedi ennill hyder Bendix King fel ei asiant yn y DU, a'r gosodwr a ffefrir gyda gwaith posibl yng Ngogledd Ewrop, er yr heriau hyn.
"Mae'r diwydiant awyrofod yn hanfodol bwysig yn yr ardal hon, gydag amrywiaeth o fusnesau'n dewis ymsefydlu yma, gan ddod â swyddi ar gyfer pobl fedrus gyda nhw.
"Bydd Llywodraeth Cymru yn parhau i wneud popeth yn ei gallu i gefnogi'r diwydiant wrth inni wynebu'r heriau sydd o'n blaenau ni. Mae ein hymrwymiad i'r diwydiant yn amlwg wrth ein buddsoddiad yn y Ganolfan Gweithgynhyrchu ac Ymchwil Uwch gyfagos, a'r ffordd rydyn ni'n cefnogi busnesau drwy'r Gronfa Cydnerthedd Busnes.
"Hoffwn longyfarch Aerocare am eu newyddion da diweddaraf, ac rwy'n gobeithio y byddan nhw'n parhau i ffynnu."