Swyddi a sgiliau o’r radd flaenaf; gwasanaethau cyhoeddus gwell a’r grym yn nwylo cymunedau lleol.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Dyna dair thema Ein Cymoedd, Ein Dyfodol - cynllun lefel uchel y Tasglu Gweinidogol ar gyfer Cymoedd y De, a lansiwyd heddiw gan Alun Davies, Gweinidog y Gymraeg a Dysgu Gydol Oes.
Ymunodd y Gweinidog â Ken Skates, Ysgrifennydd y Cabinet dros yr Economi a’r Seilwaith, ac aelodau eraill o’r tasglu i lansio’r cynllun wrth agor cynllun cyffrous arall yn y Cymoedd – canolfan chwarae ar ei newydd wedd ‘FuZe’, ar y cyd â Fern Partnership.
O fewn y tri phrif faes blaenoriaeth, nod y tasglu yw:
- cau’r bwlch cyflogaeth rhwng Cymoedd y De a gweddill Cymru trwy gael 7,000 yn fwy o bobl i waith erbyn 2021, a chreu miloedd o swyddi newydd, teg, diogel a chynaliadwy
- lansio tri phrosiect braenaru i weld sut mae modd cydgysylltu gwasanaethau a darpariaeth leol yn well yn y cymunedau hyn
- gwella iechyd, llesiant a thwristiaeth trwy archwilio’r syniad o ddatblygu Parc Tirweddau’r Cymoedd.
“Nid cynllun ar gyfer y Cymoedd yn unig yw Ein Cymoedd, Ein Dyfodol. Mae’n gynllun o’r Cymoedd.
“O’r dechrau, rwyf wedi pwysleisio’n glir nad achos arall o lywodraeth yn penderfynu beth sydd orau i’r cymoedd yw’r tasglu hwn. Os ydym i lwyddo, rhaid i gymunedau a phobl leol fod wrth galon ein gwaith.
“Mae FuZe yn enghraifft wych o hyn; prosiect dan law’r gymuned sydd wedi newid y gymuned y mae’n ei gwasanaethu. Un o brif amcanion y tasglu yw grymuso cymunedau ac mae’n rhaid i ni barhau i wrando a dysgu.”
Sefydlwyd y tasglu flwyddyn yn ôl i weithio gyda chymunedau a busnesau lleol ledled Cymoedd y De i gyflawni newidiadau economaidd parhaus yn y rhanbarth; creu swyddi o safon yn nes at gartrefi pobl, gwella lefelau sgiliau a dod â ffyniant i bawb.
Bydd y tasglu’n ceisio sicrhau’r cyfleoedd gwaith mwyaf yn yr economi leol – busnesau fel manwerthu, gofal a’r diwydiant bwyd. Hefyd, bydd yn annog ac yn darparu cymorth i entrepreneuriaid hen a newydd.
Byddant hefyd yn ystyried y cydsyniad o sefydlu Parc Tirweddau’r Cymoedd er mwyn helpu cymunedau lleol i adeiladu ar eu hasedau naturiol niferus, gan gynnwys y potensial i gynhyrchu ynni cymunedol a’r diwydiant ymwelwyr.