Cafodd Ysgrifennydd Cabinet Cymru dros Faterion Gwledig a’r Amgylchedd a Gweinidog Amaeth, Amgylchedd a Materion Gwledig Gogledd Iwerddon, gyfarfod i drafod goblygiadau canlyniad refferendwm yr UE.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Mae polisïau’r amgylchedd ac amaethyddiaeth bron iawn wedi’u datganoli’n llwyr. Yn y cyfarfod, cytunodd y Gweinidogion ei bod yn hanfodol bwysig bod y gwledydd datganoledig yn cael cymryd rhan lawn yn y trafodaethau ar delerau’r DU ar gyfer gadael yr UE ac na ddylai gadael arwain at leihau’u cyfrifoldebau datganoledig am greu rhaglenni a pholisïau yn y dyfodol.
Gwnaeth y ddwy alw ar Lywodraeth y Deyrnas Unedig i anrhydeddu’i haddewid y caiff y ddwy wlad gyllid domestig yn gyfnewid am golli cyllid yr UE, gan bwysleisio hefyd bwysigrwydd cadw’r mynediad at y Farchnad Sengl.
Meddai Lesley Griffiths:
“Mae canlyniad y refferendwm wedi creu ansicrwydd yn yr holl wledydd datganoledig. Roedd y cyfarfod heddiw’n gyfle i drafod ein blaenoriaethau ar ôl Brexit a sut y gallwn weithio gyda’n gilydd i sicrhau bod y blaenoriaethau hynny’n ystyriaeth yn nhrafodaethau Llywodraeth y DU ar delerau ac amseriad gadael yr UE.
“Yr UE sydd wedi rhoi’r fframwaith ar gyfer cyllido a rheoleiddio amaethyddiaeth a’r amgylchedd ar draws y DU gyfan, yn ogystal â bod yn bwysig i’n cysylltiadau masnachu. Mae’n hanfodol felly ein bod yn chwarae ein rhan lawn fel gweinyddiaethau datganoledig i benderfynu ar sylfaen ein polisïau, rhaglenni a rheoliadau yn y dyfodol.”
Meddai Gweinidog McIlveen:
“Rwy’n falch iawn o gael bod yma yn y Sioe Fawr ar wahoddiad Lesley Griffiths ac i gael gweld â’m llygaid fy hun gryfder ac amrywiaeth y diwydiant bwyd-amaeth yng Nghymru.
“Rydym oll bellach yn gweithio yng nghyd-destun pleidlais y DU i adael yr Undeb Ewropeaidd a’m prif flaenoriaeth yw sicrhau bod diwydiant bwyd-amaeth, cymunedau gwledig a rhanddeiliaid amgylcheddol Gogledd Iwerddon yn manteisio’n llawn ar y cyfle newydd hwn.
“Ond dw i ddim am wneud yn fach o’r cyfleoedd. Dyna pam dw i wedi ymrwymo i weithio gyda fy nghyd-weinidogion yn holl weinyddiaethau datganoledig y DU i sicrhau bod y sectorau da byw a chnydau yn parhau i gael eu helpu. Yn wir, gwnes i bwysleisio hynny wrth Weinidog DEFRA George Eustice pan gwnaethom gwrdd ym Mrwsel ddechrau’r wythnos.”