Aeth Ysgrifennydd yr Economi a Gweinidog y Gymraeg a Dysgu Gydol Oes i Flaenau Gwent i drafod cynlluniau ar gyfer parc technoleg gwerth £100 miliwn a ariennir gan Lywodraeth Cymru.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Dywedodd Ken Skates, Ysgrifennydd yr Economi:
"Mae'n bleser bod ym Mlaenau Gwent heddiw i drafod y cynlluniau ar gyfer ein parc technoleg newydd. Mae ganddo'r potensial i greu mwy na 1500 o swyddi amser llawn newydd, ac i gefnogi datblygiad economaidd ledled rhanbarth blaenau'r cymoedd.
"Dw i'n sylweddoli bod y penderfyniad yr wythnos ddiwethaf i beidio â gwarantu Cylchffordd Cymru wedi siomi llawer o bobl yn yr ardal. Fodd bynnag, roedd y dystiolaeth yn dangos mai busnesau eraill a fyddai wedi dod â'r budd mwyaf i'r economi leol yn hytrach na'r gylchffordd ei hun, yn enwedig felly wrth i'r sectorau modurol a pheirianneg greu clwstwr o fusnesau yn yr ardal.
"Dyna pam rydyn ni wedi neilltuo £100 miliwn dros gyfnod o 10 mlynedd i gefnogi'r prosiect hwn. Y cam cyntaf fydd codi cyfleuster 40,000 troedfedd sgwâr ar gyfer gweithgynhyrchu ar dir sydd ar hyn o bryd yn eiddo cyhoeddus.
"Roeddwn yn meddwl ei bod yn bwysig fy mod yn rhoi o'm hamser i ddod i Flaenau Gwent heddiw i ddechrau trafodaethau cynnar â phartneriaid lleol ac i gadarnhau i bobl yr ardal fod Llywodraeth Cymru wedi ymroi'n llwyr i sicrhau bod y parc technoleg fodurol newydd hwn yn llwyddo.
" Rydym yn awyddus i roi hyn ar waith ar unwaith a byddaf yn trefnu digwyddiad bord gron yn yr ardal yn ystod yr wythnosau nesaf gydag amrywiaeth ehangach o randdeiliaid a phartneriaid o'r sector preifat i drafod ein cynlluniau'n fanylach."