Rebecca Evans AC, Y Gweinidog Cyllid a’r Trefnydd
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Heddiw rwy’n cyhoeddi cynllun gwaith polisi trethi 2019, gan amlinellu’r rhaglen ymchwil, adolygiadau a gweithgareddau eraill y bydd Llywodraeth Cymru yn ei dilyn yn ystod y flwyddyn.
Mae’r cynllun gwaith yn adeiladu ar yr hyn rydym wedi’i ddysgu hyd yn hyn, ac mae’n unol â’r egwyddorion a amlinellwyd yn Fframwaith Polisi Trethi Llywodraeth Cymru. Yn fwyaf arbennig, mae’n rhan o’n dull agored a chynhwysol o ddatblygu polisi trethi.
Mae’r materion y rhoddir sylw iddynt yn cael eu grwpio dan dri phrif bennawd:
A. Datblygu polisi trethi sy’n codi refeniw i gyllido gwasanaethau cyhoeddus mor deg ag sy’n bosibl, yn gyson â blaenoriaethau polisi Llywodraeth Cymru – gan gynnwys ein cynlluniau hwy i adeiladu sylfaen drethu Cymru.
B. Adeiladu agwedd fwy effeithiol a chydgysylltiedig at drethi ar draws y trethi Cymreig presennol ac ar draws y dirwedd drethi ehangach – gan gynnwys opsiynau i wella trefniadau rhannu data a chryfhau’r sail dystiolaeth fel sail i benderfyniadau trethi.
C. Ymgysylltu, cyfathrebu a meithrin gallu – gan gynnwys ein nod o ymgysylltu’n ehangach â dinasyddion.
Rwy’n croesawu cyfraniadau tuag at unrhyw agwedd ar y cynllun gwaith. Wrth i’r rhaglen fynd yn ei blaen, byddaf yn chwilio am gyfleoedd i drafod rhai o’r materion mwy strategol yn y Cynulliad, er mwyn galluogi’r Aelodau i gyfrannu at yr agenda bwysig hon.
Byddaf yn cyhoeddi adroddiad yn crynhoi’r hyn y byddwn wedi’i ddysgu yn yr hydref.
Mae cynllun gwaith polisi trethi 2019 ar gael yma: