Mesurau perfformiad cyson ar gyfer dysgu ôl-16 (cyrchfannau dysgwyr): Awst 2015 i Gorffennaf 2016

Er bod y mesurau'n parhau i gael eu datblygu, gan ein bod yn dal i weithio i ddatrys problemau o ran methodoleg ac ansawdd data, rydym yn gallu darparu'r set gyntaf o ystadegau arbrofol.

Mae'r adroddiad hwn yn edrych ar gyrchfannau dysgwyr (hynny yw, yr hyn y mae dysgwyr yn ei wneud ar ôl iddynt gwblhau eu rhaglen ddysgu), gan gynnwys y dysgwyr hynny sy'n ymgymryd â dysgu seiliedig ar waith. Mae rhifyn ar wahân yn rhoi gwybodaeth am gyflawniad disgyblion. Data arbrofol sydd yma, a byddwn yn cynnal ymgynghoriad pellach â darparwyr dysgu ar y fethodoleg.

Prif bwyntiau

O'r 116,080 o ddysgwyr a orffennodd raglen ddysgu yn 2015/16:

• roedd gan 81% gyrchfan barhaus gadarnhaol i naill ai cyflogaeth neu ddysgu, 1 pwynt canran yn is na 2014/15
• roedd 55% mewn cyflogaeth barhaus, a 22% o'r rheini hefyd yn dysgu'n barhaus
• roedd 48% yn dysgu'n barhaus, a 22% o'r rheini hefyd mewn cyflogaeth barhaus.

Dysgwyr ôl-16 yw'r rheini sy'n astudio mewn sefydliadau addysg bellach, chweched dosbarth ysgolion a dysgu seiliedig ar waith (prentisiaethau, hyfforddeiaethau a rhaglenni cyflogadwyedd eraill). Nid yw gorffen rhaglen ddysgu o anghenraid yn golygu ‘rhywun sy'n gadael’. Er enghraifft, bydd y dysgwyr sy'n chwblhau Safon Uwch wedi cwblhau rhaglen astudio UG cyn hynny, cyn symud i raglen A2.