Mae gwaith pwysig i leihau effaith sŵn o’r A55 ar gyfer trigolion Abergele i ddechrau ar 15 Ionawr.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Mae’r ardal, i’r gorllewin o Sea Bridge Road, wedi ei nodi fel ardal o flaenoriaeth yng nghynllun Atal Sŵn Llywodraeth Cymru.
Er mwyn tarfu cyn lleied â phosib ar y cyhoedd sy’n teithio, gan sicrhau diogelwch ar yr un pryd, bydd system rheoli traffig ar ffurf ffordd ddeuol gul yn cael ei threfnu yn ogystal â therfyn amser dros dro o 40 mya. Mae hyn yn cadarnhau ymrwymiad Llywodraeth Cymru i beidio â gwneud unrhyw waith cynnal a chadw yn ystod y dydd sy’n golygu cau ffyrdd yr A55 rhwng Cyffordd 11 a’r ffin â Lloegr tan o leiaf Medi 2018.
Bydd gwaith yn cael ei wneud 7 niwrnod yr wythnos i sicrhau bod y cynllun yn cael ei gwblhau cyn gynted â phosib cyn cyfnod y Pasg.
Meddai Ken Skates, yr Ysgrifennydd Trafnidiaeth:
“Cyhoeddais y llynedd bod y gwaith pwysig hwn i fynd ymlaen, a bellach mae popeth yn barod er mwyn iddo ddechrau.
“Mae’n cael ei gynnal yn ystod y gaeaf, sef y cyfnod tawelaf ar yr A55, er mwyn tarfu cyn lleied â phosib. Mae system ffordd ddeuol gul yn dangos ein bod wedi ymrwymo i beidio â gwneud unrhyw waith cynnal a chadw yn ystod y dydd sy’n golygu cau ffyrdd ar yr A55 ar y rhan benodol hon, tan o leiaf Medi eleni.
“Mae lefelau sŵn yn fater difrifol, ac rwy’n falch bod camau’n cael eu cymryd i fynd i’r afael â hyn yn ardal Abergele.”
Mae bwriad i gadw y system ffordd ddeuol gul tan Mawrth 12 rhwng Cyffordd 24 a 23 i’r gorllewin. Mae’r manylion llawn, gan gynnwys manylion y gwaith dros dro ar wefan Traffig Cymru (dolen allanol).