Mae Awdurdod Cyllid Cymru wedi cyhoeddi Ein Siarter heddiw, gan nodi sut bydd yn ceisio rhannu gwerthoedd ac ymddygiadau gyda threthdalwyr, cyrff cynrychioliadol, sefydliadau partner a'r cyhoedd yng Nghymru i helpu i gyflwyno system dreth deg i Gymru.
Cafodd Awdurdod Cyllid Cymru fwy na 120 o ymatebion i'w siarter drafft, gan gynnwys gan sefydliadau fel Ffederasiwn Busnesau Bach Cymru, sy'n cynrychioli 10,000 o fusnesau bach yng Nghymru.
Dywedodd Ben Cottam, pennaeth materion allanol Ffederasiwn Busnesau Bach Cymru:
“Mae Ffederasiwn Busnesau Bach Cymru yn croesawu cyhoeddi Ein Siarter cyn i Awdurdod Cyllid Cymru ddechrau casglu trethi ar 1 Ebrill. Bydd yr ymagwedd gefnogol, yn ogystal â rhannu gwerthoedd a safonau, yn cael ei groesawu gan gwmnïau llai sy'n trosglwyddo i drethi datganoledig Cymru. Bydd hyn yn allweddol o ran y ffordd mae Awdurdod Cyllid Cymru yn bwriadu gweithredu mewn ffordd hygyrch a helpu cwmnïau i gydymffurfio â'u rhwymedigaethau treth.”
Dywedodd Mark Drakeford, yr Ysgrifennydd Cyllid:
“Mae cyflwyno'r ddwy dreth newydd hyn yn garreg filltir arwyddocaol i Gymru. Bydd trethdalwyr Cymru eisiau arweiniad a sicrwydd ynghylch sut caiff eu trethi eu casglu.
“Mae siarter Awdurdod Cyllid Cymru yn datgan cyfrifoldebau ar y cyd rhwng yr Awdurdod, cwsmeriaid a’r cyhoedd yng Nghymru ar gyfer creu system dreth deg yng Nghymru.”
Dywedodd Dyfed Alsop, prif weithredwr Awdurdod Cyllid Cymru:
“Rydym yn ymwybodol o'r cyfrifoldebau a'r cyfleoedd pwysig sydd gennym fel awdurdod treth newydd i Gymru. Roeddem eisiau i ddogfen Ein Siarter ddechrau adlewyrchu sut rydym eisiau rhannu cyfrifoldebau, gwerthoedd ac ymddygiadau, wrth i ni weithio gyda phawb i helpu i gyflwyno system dreth deg i Gymru.
“Rydym wedi gweithio gyda threthdalwyr, cyrff cynrychioliadol a sefydliadau partner i'w helpu drwy'r broses o drosglwyddo i'r system dreth newydd. Mae'n hanfodol bod y gwaith hwn yn parhau a bod pawb yn cael eu hannog i ddweud eu dweud am y siarter newydd hon, a fydd yn cefnogi pawb.”
Bydd Awdurdod Cyllid Cymru yn parhau i ymgysylltu wrth iddynt ymgorffori Ein Siarter; cofrestrwch os ydych eisiau rhoi eich barn.