Kirsty Williams AS Y Gweinidog Addysg

Mae Kirsty Williams wedi bod yn Weinidog Addysg Cymru ers mis Mai 2016. Ymunodd â’r llywodraeth yn sgil cytundeb gyda’r cyn-Brif Weinidog, gan arwain “ymgyrch genedlaethol i ddiwygio addysg” ar bob lefel.

Cadarnhaodd y Prif Weinidog presennol a’r Gweinidog Addysg eu hymrwymiad i’r cytundeb blaengar hwn ym mis Rhagfyr 2018, a’i ddiweddaru i gynnwys blaenoriaethau a chyfrifoldebau addysg ychwanegol, gan gynnwys addysg bellach, gwyddoniaeth, ymchwil ac arloesi. 

Ms Williams sy’n arwain rhaglen addysg y Llywodraeth, sy’n cynnwys lleihau maint dosbarthiadau babanod, cyflwyno’r system cymorth i fyfyrwyr fwyaf teg a blaengar yn Ewrop, a thrawsnewid y cwricwlwm ysgol. 

Mae wedi bod yn cynrychioli Brycheiniog a Sir Faesyfed fel Aelod o’r Senedd ers 1999, a hi oedd arweinydd Democratiaid Rhyddfrydol Cymru o 2008 i 2016. Hi oedd y fenyw gyntaf i arwain plaid wleidyddol yng Nghymru. Mae‘n briod â ffermwr ac mae ganddynt dair o ferched. Maent yn byw ar fferm y teulu y tu allan i Aberhonddu.

• Llywodraethu ysgolion, trefniadaeth ysgolion a derbyniadau i ysgolion
• Safonau ysgolion, gwelliannau a chyrhaeddiad disgyblion, gan gynnwys y System Genedlaethol ar gyfer Categoreiddio Ysgolion
• Cylch gwaith Estyn
• Cyllido ysgolion
• Y cwricwlwm ac asesu hyd at a chan gynnwys Safon Uwch
• Addysg cyfrwng Cymraeg a dwyieithog
• Y Cyfnod Sylfaen
• Anghenion dysgu ychwanegol, gan gynnwys anghenion disgyblion sydd ag anawsterau dysgu difrifol, cymhleth a/neu benodol, disgyblion anabl, a disgyblion abl a thalentog
• Cymorth i bobl â Dyslecsia
• Diogelwch a chynhwysiant plant a phobl ifanc mewn ysgolion, gan gynnwys diogelwch ar y rhyngrwyd
• Cwynion ynghylch Awdurdodau Addysg Lleol a chyrff llywodraethu ysgolion
• Cyflwyno a rheoli'r rhaglen addysg ac Ysgolion yr 21ain Ganrif
• Noddi Cymwysterau Cymru
• Hyfforddi a datblygu'r gweithlu addysg, gan gynnwys hyfforddiant cychwynnol athrawon
• Cyflogau ac Amodau Athrawon
• Addysg Bellach
• Cymorth i fyfyrwyr Addysg Bellach: y Lwfans Cynhaliaeth Addysg a Grant Dysgu Llywodraeth Cymru
• Polisi gwaith ieuenctid
• Dysgu Oedolion yn y Gymuned
• Y Fframwaith Credydau a Chymwysterau gan gynnwys cymwysterau sgiliau galwedigaethol, allweddol a hanfodol
• Cyrsiau dysgu ar gyfer carcharorion
• Polisi, strategaeth a chyllido addysg uwch
• Addysg Feddygol (ac eithrio hyfforddiant ôl-radd)
• Gwyddoniaeth: datblygu polisi gwyddoniaeth, gan gynnwys cyswllt o ddydd i ddydd â Phrif Gynghorydd Gwyddonol Cymru a'r Academi Wyddoniaeth Genedlaethol 
• Gwyddorau Bywyd
• Ymchwil ac Arloesi, gan gynnwys ymchwil a datblygu, trosglwyddo gwybodaeth a masnacheiddio; sicrhau bod yr incwm mwyaf posibl yn deillio o waith ymchwil ac arloesi; a Chanolfannau Rhagoriaeth Ymchwil
• Denu myfyrwyr ymchwil lefel uwch i Gymru, eu datblygu a’u cadw