Beth ddylwn i wneud os dwi’n gorfod aros adref?

Mae meddwl eich bod chi, neu aelod o’ch teulu, wedi dal y coronafeirws yn amlwg yn rhywbeth sy’n peri pryder.

Os oes gennych chi symptomau haint coronafeirws, pa mor ysgafn bynnag ydynt, mae’n rhaid i chi aros gartref a pheidio â gadael eich tŷ am 7 diwrnod o’r diwrnod pryd mae eich symptomau yn dechrau, ond rhaid i bob aelod arall o'r aelwyd sy'n parhau'n iach aros gartref a pheidio â gadael y tŷ am 14 diwrnod.

Mae'r cyfnod o 14 diwrnod yn dechrau o'r diwrnod pan aeth y person cyntaf yn y tŷ yn sâl. Bydd hyn yn helpu i warchod eich ffrindiau, eich cydweithwyr a’r gymuned ehangach a bydd yn helpu i reoli lledaeniad y feirws. 

Dilynwch  canllawiau ar aros adref.

Gwasanaethau darparu bocsus bwyd a meddyginiaethau

Os ydych chi’n cael eich ystyried yn rhywun sy’n eithriadol o agored i niwed (categori a warchodir), darllenwch y canllawiau.

Os nad oes gennych neb a all eich helpu gyda bwyd neu feddyginiaeth, mae’n bosib y gallwch gael cymorth gan eich awdurdod lleol neu gan grwpiau gwirfoddol.

Awgrymiadau ar gyfer aros adref

• cynllunio ymlaen a meddwl am beth fydd arnoch ei angen er mwyn gallu aros gartref am y 7 neu 14 diwrnod llawn
• siarad gyda’ch cyflogwr, eich ffrindiau a’ch teulu i ofyn am eu help i gael y pethau y bydd arnoch eu hangen er mwyn aros gartref yn llwyddiannus
• meddwl a chynllunio sut gallwch gael bwyd a chyflenwadau eraill fel y meddyginiaethau y bydd arnoch eu hangen yn ystod y cyfnod hwn
• gofyn i ffrindiau neu deulu i helpu i archebu unrhyw beth y mae arnoch ei angen os nad ydych wedi arfer â siopa ar-lein
• gwneud yn siŵr eich bod yn cadw mewn cysylltiad â’ch ffrindiau a’ch teulu dros y ffôn neu ar gyfryngau cymdeithasol       
• meddwl am bethau y gallwch chi eu gwneud yn ystod eich amser gartref. Mae pobl sydd wedi cwblhau cyfnod o aros gartref yn llwyddiannus wedi cadw eu hunain yn brysur gyda gweithgareddau fel coginio, darllen, dysgu ar-lein a gwylio ffilmiau     
• pan rydych yn teimlo yn well, cofiwch y gall ymarfer corfforol fod yn dda i’ch lles. Chwiliwch am ddosbarthiadau neu gyrsiau ar-lein a all eich helpu i wneud ymarfer ysgafn yn eich cartref. Darganfyddwch sut y gallwch chi gadw’n ffit a phrysur yn ddiogel.

Cael help gan eraill

Os oes rhywun nad ydych chi’n ei adnabod yn galw yn eich cartref: 

• gofynnwch am ID bob tro a sicrhewch eich bod yn gyfforddus yn rhannu manylion fel eich rhif ffôn neu'ch cyfeiriad
• dim ond os ydych wedi gweld ID a bod gwir angen yr wybodaeth y dylech ei rhannu
• peidiwch â theimlo dan bwysau i roi gwybodaeth i neb
• os oes gennych amheuon am unrhyw un, ac yn bryderus, peidiwch â siarad gyda nhw o gwbl a rhowch wybod i’r heddlu am unrhyw ymddygiad amheus

Cofiwch fod gwirfoddolwyr dilys wedi cael cyfarwyddyd i beidio â mynd i mewn i’ch tŷ, a dylai pob un ohonynt fod â dogfennaeth i brofi eu statws.