Mae Electroimpact UK yn buddsoddi £2.8m yn ei gyfleusterau a’i waith yn Ardal Fenter Glannau Dyfrdwy mewn symudiad fydd yn creu 37 o swyddi bras gyda chefnogaeth Llywodraeth Cymru.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Mae’r buddsoddiad mewn ffatri cydosod newydd mawr ym Mharc Technoleg Electroimpact yn Mhenarlâg yn galluogi’r cwmni i fentro i faes cynhyrchu cydrannau ar gyfer y systemau hyn. Bydd yn rhoi’r gallu iddo gynnal prosiectau mwy o faint a mwy cymhleth.
Sicrhawyd y buddsoddiad i Gymru gyda chymorth £282,000 o gyllid busnes gan Lywodraeth Cymru gan gadarnhau lle Penarlâg fel prif swyddfa ranbarthol y cwmni yn Ewrop/Asia. Gallai’r cwmni fod wedi ehangu ei brif gampws ym Mukilteo, Washington neu un o’i ffatrïoedd yn China neu Frasil.
Wrth groesawu’r newyddion, dywedodd Ysgrifennydd yr Economi, Ken Skates:
“Yn y saith mlynedd diwethaf mae Electrimpact UK wedi tyfu o gyflogi dim ond 27 o weithwyr i gyflogi 140 o bobl ac rwy’n hynod falch bod Llywodraeth Cymru wedi gallu helpu’r datblygiad diweddaraf sy’n nodi pennod newydd yn ei gynlluniau i ehangu ei alluoedd a’i gapasiti.
“Mae’r cwmni’n gweithredu yn un o’n sectorau economaidd mwyaf allweddol ac mae’n fuddsoddiad pwysig arall yn Ardal Fenter Glannau Dyfrdwy fydd yn cynnal twf y ffatri yn y dyfodol ac yn creu swyddi o’r ansawdd uchaf.
“Mae cadw’r prosiect yng Nghymru wedi bod yn hwb aruthrol hefyd i’r gadwyn gyflenwi o 94 o gwmnïau lleol sy’n sicrhau bod y buddsoddiad yn cael effaith fawr ar yr economi ehangach.”
Mae Electroimpact yn arweinydd byd ym maes cynhyrchu offer ar gyfer systemau awtomataidd yn y diwydiant awyrofod. Cafodd ei sefydlu gan Peter Zieve yn UDA ym 1986 ac agorwyd ei ffatri yng Nghymru yn 2000.
Electroimpact bellach yw’r integreiddydd llinellau cydosod awyrennau mwyaf yn y byd. Ymhlith ei gwsmeriaid y mae Airbus, Boeing, Kawasaki Heavy Industries, Mitsubishi Heavy Industries, Fuji Heavy Industries, Spirit Aerospace, Vought, Northrop-Grumman, Israeli Aircraft Industries, Xi’an Aircraft of China, Bombardier ac Embraer.
Mae’r cynnydd cyflym a pharhaus ym marchnad awyrofod y byd wedi gweld y galw am offer a systemau awtomataidd yn tyfu’n sylweddol. Mae sectorau rocedi gofod a milwrol America wedi dangos mwy o ddiddordeb yn y blynyddoedd diwethaf a derbyniwyd contractau gan NASA.