Clybiau Ffermwyr Ifanc Ynys Môn

Gwnaed gwaith gwych gan yr aelodau yn trefnu Eisteddfod Môn lwyddiannus tu hwnt, ar fyr rybudd.

Roeddent yn greadigol tu hwnt, gan gyflwyno categorïau newydd o gystadlaethau, fel dawns a cherddoriaeth, er mwyn apelio i grwpiau oedran iau. Trefnwyd digwyddiadau codi arian a oedd yn denu gwahanol gynulleidfaoedd, gan gynnwys noson bingo, cwis am Gymru a’r Gymraeg, a gig gydag un o fandiau mwyaf poblogaidd Cymru, Gwilym, i hyrwyddo cerddoriaeth Gymraeg a rhoi cyfle i bobl ifanc fynd i gig cyfrwng Cymraeg.

Cysylltwyd â chwmnïau i gael noddwyr a gwobrau, trefnwyd lleoliad a lluniaeth i’r cannoedd a fyddai’n bresennol, dewiswyd beirniaid ac fe hyrwyddwyd yr Eisteddfod yn Gymraeg ar draws y cyfryngau cymdeithasol.  Hefyd roeddent yn gyfrifol am y cofnodion ariannol, gan lwyddo i wneud digon o elw i’w roi naill ochr ar gyfer yr Eisteddfod nesaf.

Dywedodd y beirniaid ei bod yn ardderchog gweld Ffermwyr Ifanc Ynys Môn yn hyrwyddo diwylliant Cymraeg ac yn cynnal y Gymraeg a’i hybu mewn ffyrdd newydd a gwahanol.