Gwerthusiad proses o’r rhaglen Cymraeg i Blant: canfyddiadau cychwynnol

Ei hamcanion yw cefnogi rhieni, darpar rieni ac aelodau teulu eraill wrth ddefnyddio’r Gymraeg yn y cartref, trosglwyddo’r Gymraeg i’w plant, a chefnogi datblygiad ieithyddol plant, mewn cyd-destun cymdeithasol ac addysgol.

Mae’r adroddiad hwn yn cynnig trosolwg o’r canfyddiadau cychwynnol o ran gweithredu’r rhaglen.

Cyflwynir y canfyddiadau hyn, sy’n seiliedig ar waith maes a gwblhawyd rhwng mis Ebrill a mis Mehefin 2018, dan chwe thema:

• nodau ac amcanion y rhaglen
• y gynulleidfa darged
• gweithgareddau’r rhaglen
• ardaloedd daearyddol
• strwythurau a phrosesau
• cynllunio strategol.

Mae cynulleidfa darged y rhaglen yn eang, ac yn cynnwys pob math o deuluoedd, waeth beth fo’u cefndir ieithyddol a’u bwriadau o ran trosglwyddo a defnyddio’r Gymraeg. Yn ôl y dystiolaeth sydd wedi ei chasglu hyd yma, mae’r gynulleidfa a gyrhaeddwyd yn amrywio o ardal i ardal, a gall amrywio o wythnos i wythnos wrth i deuluoedd newydd ymuno a gadael.

Mae adborth gan rieni ar y gweithgareddau a gynigir wedi bod yn gadarnhaol iawn o ran lleoliadau, amseru a natur y gweithgareddau. Mae’r adroddiad yn cynnig peth gwybodaeth ynghylch sut mae’r rhaglen yn datblygu ei waith ar y cyd gydag amrywiaeth o bartneriaid. Roedd canfyddiad ymhlith staff y rhaglen bod rhai heriau a rhwystrau’n bodoli a oedd yn cyfyngu ar weithio mewn partneriaeth mewn rhai ardaloedd – sef yr amser sydd ar gael i staff, a chapasiti a hefyd parodrwydd sefydliadau partner i weithio mewn partneriaeth.