Gwerthusiad o'r Gronfa Integreiddio Rhanbarthol ar gyfer Iechyd a Gofal Cymdeithasol: Chwefror 2023 i Hydref 2024

Fframwaith ar gyfer newid

Mae'r adroddiad yn rhoi trosolwg o'r gwerthoedd, y syniadau a'r dyheadau ar gyfer newid a ddisgrifir yn y Gronfa, yn erbyn cefndir o'r amrywiol ffactorau cyd-destunol a allai effeithio ar sut mae'n cael ei gweithredu a'i heffeithiolrwydd ledled Cymru. 

Mae'n disgrifio nodau ac amcanion y Gronfa ac yn ystyried sut y bydd mentrau'r Gronfa yn cael eu gweithredu. Mae hefyd yn disgrifio sylfeini, gweithgareddau a chanlyniadau arfaethedig y Gronfa.

Mae'r adroddiad yn canfod bod y Gronfa yn lasbrint arweiniol, yn fecanwaith cynllunio a chyrchu adnoddau integreiddiol, ac yn ffordd o ddarparu dysgu i alluogi'r gwaith o ddatblygu modelau cenedlaethol cynaliadwy ar gyfer iechyd a gofal cymdeithasol integredig ac effeithiol. Mae'n dod i'r casgliad bod y modelau integredig hyn yn eu tro yn gweithio i gefnogi canlyniadau iechyd a lles unigolion, canlyniadau'r systemau, a chanlyniadau'r gweithlu.

Adolygiad ymarferoldeb

Yr adroddiad hwn yw cam cyntaf yr adolygiad ymarferoldeb – sef yr elfen adolygu llenyddiaeth - sy'n rhan o werthusiad y Gronfa Integreiddio Rhanbarthol. Bydd yr adolygiad yn parhau i ehangu ar draws Blwyddyn 2 y gwerthusiad er mwyn darparu dealltwriaeth fwy cynhwysfawr o'r llenyddiaeth berthnasol sy'n ymwneud â gofal integredig.

Mae canfyddiadau o'r cam hwn o'r adolygiad ymarferoldeb yn nodi ac yn pwysleisio llawer o elfennau pwysig rhaglenni gofal integredig llwyddiannus, yn ogystal â rhai o'r rhwystrau sy’n atal llwyddiant.

Mapio cysyniad grŵp

Gan ddefnyddio dull consensws ar-lein o'r enw Mapio Cysyniadau Grŵp, bu'r astudiaeth hon yn edrych ar safbwyntiau'r cyfranogwyr o ran y syniadau a'r cysyniadau y tu ôl i'r Gronfa Integreiddio Rhanbarthol. Roedd y cyfranogwyr yn cynrychioli pob rhanbarth ledled Cymru ac amrywiaeth o sefydliadau rhanddeiliaid. 

Mae casgliadau'r astudiaeth fapio hon yn cynnwys y canlynol:

• eu bod yn adlewyrchu cyfranogiad gan drawstoriad eang iawn o randdeiliaid – roedd y cyfranogwyr yn cynrychioli'r holl ranbarthau yng Nghymru a safbwyntiau cenedlaethol, ac amrywiaeth o wahanol sefydliadau
• bod dau grŵp gwahanol o gysyniadau wedi dod i’r amlwg – y cysyniadau 'strategol' sy'n sail i'r Gronfa sy'n cael eu graddio'n gymharol gadarnhaol (uchelgais i newid, cyfathrebu, cysylltiadau a rhwydweithio, ac integreiddio a chydweithio), a bod y rhain yn cael eu gwrthbwyso gan y cysyniadau 'gweithredol' sy'n sail i'r Gronfa sy'n cael eu graddio'n gymharol negyddol (cymhlethdod a chyfyngiadau, rheoli cyllid a galw, a llywodraethu)

Cyfweliadau cwmpasu

Mae'r adroddiad ymchwil ansoddol hwn yn tynnu ar gyfweliadau cwmpasu manwl a gynhaliwyd gyda 24 o randdeiliaid allweddol rhwng mis Hydref a mis Tachwedd 2023.

Mae'r adroddiad yn canfod y canlynol yn ei gasgliadau:

• bod ymateb cadarnhaol i fwriad ac uchelgais y Gronfa Integreiddio Rhanbarthol
• bod cefnogaeth i weledigaeth ac uchelgais integreiddiol a chydweithredol y Gronfa, ac ar gyfer gweithredu ei phrif egwyddorion
• bod y Byrddau Partneriaeth Rhanbarthol wedi defnyddio blwyddyn gyntaf y Gronfa i brofi cydnawsedd prosiectau a ariennir ag amcanion ehangach y Gronfa
• mae'r Cymunedau Ymarfer yn rhannu dysgu ac yn creu cysylltiadau pwysig â rhaglenni cenedlaethol perthnasol