Gwerthusiad o wasanaethau ysgol Techniquest a Techniquest Glyndŵr

Mae'r adroddiad hwn yn darparu canfyddiadau o gwerthusiad o wasanaethau ysgolion Techniquest (TQ) a Techniquest Glyndŵr (TQG) i ysgolion sy'n cael eu cyllido o dan gyllid grant craidd Llywodraeth Cymru.

Prif bwyntiau

• Mae’r ddwy ganolfan wedi cyflawni eu nodau a’u hamcanion i raddau helaeth, er nad ydynt wedi cyflawni’n gyson yn erbyn targedau’r grant craidd bob tro.
• Yn gyffredinol mae TQ a TQG yn uchel eu parch ymhlith rhanddeiliaid ac athrawon fel ei gilydd; mae cydnabyddiaeth eang i’r brand TQ ac mae’n cael ei gysylltu ag ansawdd uchel.
• Mae athrawon yn gweld bod gwasanaethau TQ a TQG yn berthnasol i feysydd cwricwlwm STEM ac yn eu hatgyfnerthu, maent yn diwallu eu hanghenion yn y mwyafrif o achosion, ac o ran y disgyblion sydd yn cyfranogi mae gwasanaethau priodol yn arwain at draweffeithiau y gellir eu hadnabod.
• Er bod y defnydd presennol o gyllid Llywodraeth Cymru i dalu am ddigwyddiadau gyda disgyblion cynradd yn bennaf yn briodol o ystyried yr hyn a wyddom ynghylch manteision ymgysylltu gyda disgyblion yn gynnar, mae’r adroddiad hefyd yn nodi bod angen ymwneud mwy gydag ysgolion uwchradd.
• Y tu hwnt i’r gofynion ar y ddwy ganolfan o ran brandio a rheoli enw da yn bennaf, sydd yn cael eu gweithredu drwy’r Cytundeb Lefel Gwasanaeth rhyngddynt, mae’r adroddiad yn tynnu sylw at y ffaith bod y cydweithio dwy ffordd rhwng TQ a TQG yn gyfyngedig ond yn gwella. Mae’n dod i’r casgliad y gallai mwy o weithio ar y cyd ddod â nifer o fanteision.
• Mae TQ a TQG fel ei gilydd wedi adeiladu rhwydweithiau partneriaid  cryf gyda darparwyr STEM eraill a phrifysgolion, ac maent wedi bod yn llwyddiannus yn denu cyllid ychwanegol o amrywiaeth eang o ffynonellau. Mae adeiladu rhwydweithiau o’r fath mewn ymgais i sicrhau ffynonellau nawdd newydd a chaniatáu darpariaeth ar y cyd yn arwydd o ddull gweithredu pwysig tuag at y dyfodol, ac mae cyfleoedd ar gael i ddatblygu hyn ymhellach.

Argymhellion

• Mae’r adroddiad yn cyflwyno tri deg un o argymhellion ar draws amrywiaeth o faterion. Mae deuddeg o’r rhain yn uniongyrchol berthnasol i Lywodraeth Cymru.