Mae'r Gweinidog Iechyd, Vaughan Gething wedi ymateb i ystadegau perfformiad diweddaraf y GIG, a gyhoeddwyd heddiw.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Dywedodd y Gweinidog Iechyd a Gwasanaethau Cymdeithasol, Vaughan Gething:
"Mae ffigurau diweddaraf GIG Cymru ar berfformiad yn dangos gwelliannau yn gyffredinol mewn amseroedd aros am ofal wedi'i drefnu, sef rhai o'r gorau rydym wedi'u gweld am nifer o flynyddoedd. Rwy'n falch o weld bod ein buddsoddiad i leihau rhai o'r amseroedd aros hiraf yn sicrhau canlyniadau da.
Y perfformiad o ran atgyfeiriadau at driniaeth ar gyfer mis Mawrth oedd y gorau am chwe blynedd, ac mewn tri bwrdd iechyd ni chafwyd unrhyw gleifion yn aros mwy na 36 wythnos. Roedd y nifer o gleifion a arhosodd fwy na 14 wythnos am therapi ar ei isaf am 10 mlynedd, a dywedodd chwe bwrdd iechyd nad oedd neb yn aros dros 14 wythnos. Mewn tri bwrdd iechyd, ni chafwyd neb yn aros mwy nag 8 wythnos am brofion diagnosteg, a gwelwyd gwelliannau hefyd yng Ngwasanaethau Iechyd Meddwl Plant a'r Glasoed.
Rwy'n falch o weld gostyngiad o 10% mewn achosion o oedi wrth drosglwyddo gofal o gymharu â mis diwethaf a 8.5% o gymharu â blwyddyn ddiwethaf. Ond mae mwy i'w wneud yn y maes hwn, ac rydym yn datblygu ffyrdd newydd o gefnogi pobl i adael yr ysbyty a mynd nôl i'r gymuned pan fônt yn barod.
Bu'n fis arall prysur iawn i staff yr Adrannau Brys - y mis Ebrill prysuraf erioed - gyda chynnydd o 6% mewn gweithgarwch o gymharu â mis Ebrill 2018. Arhosodd mwy o bobl lai na 4 awr yn yr adrannau o gymharu â mis Ebrill y llynedd, ond cawsom ein siomi gan y perfformiad mewn nifer o leoliadau, ac rydym wedi cymryd camau ar unwaith i sicrhau gwelliannau. Unwaith eto, rhagorodd Gwasanaeth Ambiwlans Cymru ar y targed, er gwaethaf cynnydd mewn galwadau brys o gymharu â mis diwethaf.
Rydym yn buddsoddi mwy nag erioed yn ein Gwasanaeth Iechyd Gwladol, ac wedi bod yn glir â
’r byrddau iechyd bod angen iddyn nhw wneud gwelliannau yn eu perfformiad ar unwaith."