Cylch gorchwyl

Diben y grŵp yw meithrin dealltwriaeth o'r dulliau posibl o ddarparu seilwaith trydan, creu sylfaen dystiolaeth gyhoeddus a llunio cyfres o egwyddorion y cytunwyd arnynt ar gyfer penderfynu ar yr atebion mwyaf priodol i Gymru.

Bydd y grŵp yn gwneud y canlynol:

• Adolygu seilwaith a chapasiti'r grid trydan presennol yng Nghymru.
• Ystyried yr heriau a'r cyfleoedd lefel uchel sy'n gysylltiedig â grid trydan y dyfodol a chyflymder y ddarpariaeth sydd ei hangen i gyrraedd targedau sero net Llywodraeth Cymru.
• Ymgysylltu ag arbenigwyr technegol i ledaenu gwybodaeth berthnasol i aelodau o amrywiaeth o randdeiliaid ledled Cymru.
• Adolygu gwybodaeth a chyflwyno'r wybodaeth bresennol i'w hadolygu, sy'n berthnasol i ddiben y grŵp.
• Creu sylfaen dystiolaeth hygyrch am anghenion Cymru yn y dyfodol, gan gynnwys cost, effeithiau a manteision gwahanol ddulliau o adeiladu seilwaith grid.  
• Adeiladu consensws ar set o egwyddorion ymarferol sy'n seiliedig ar dystiolaeth, ar gyfer datblygu grid trydan yng Nghymru, gan ystyried persbectif y cyhoedd a'r gymuned, y ddyletswydd economaidd-gymdeithasol, yr amgylchedd a llesiant cenedlaethau'r dyfodol.

Bydd canfyddiadau'r grŵp yn cael eu defnyddio fel sylfaen gyfeirio i lywio polisi a chanllawiau Llywodraeth Cymru ar gyfer seilwaith cludo trydan. Byddant yn cael eu cyhoeddi a'u cyfleu'n rhagweithiol i gynulleidfa eang. Bydd y gwaith yn sylfaen gyfeirio ar gyfer polisi a chynllunio mewn perthynas â seilwaith trydan derbyniol yng Nghymru.

Bydd y Grŵp yn cynnwys arbenigwyr o wahanol feysydd gan gynnwys ynni, peirianneg, gwyddor amgylcheddol, economeg, buddiant cymunedol a pholisi. Cadeirydd annibynnol fydd yn cadeirio'r cyfarfodydd, gyda swyddogion Llywodraeth Cymru yn darparu ysgrifenyddiaeth. Gwahoddwyd aelodau yn seiliedig ar eu harbenigedd, cysylltiadau cymunedol neu fuddiant. Ni ddylid dirprwyo presenoldeb heb gytundeb y cadeirydd.

Bydd y grŵp yn cyfarfod yn fisol gan ddechrau ym mis Mehefin 2024 a bydd yn cyflwyno ei ganfyddiadau i Lywodraeth Cymru ym mis Rhagfyr 2024. 

The group will be a collaborative enabling forum.

Bydd y grŵp yn fforwm galluogi cydweithredol.

Caiff y cyfarfodydd eu trefnu gan Lywodraeth Cymru. Mae hyn yn cynnwys paratoi agendâu, casglu papurau ategol a pharatoi nodiadau cyfarfod. Bydd aelodau'r grŵp yn cytuno ar agenda a phynciau ffocws. Bydd unrhyw wybodaeth a anfonir fel papurau trafod yn cael ei rhannu'n gyfrinachol ac ni ddylid ei rhannu ag eraill heb gytundeb ymlaen llaw gan y cadeirydd a'r ysgrifenyddiaeth. 

Dylid darparu diweddariadau a chyfraniadau at ddogfennau cyfarfodydd mewn pryd er mwyn caniatáu i bapurau gael eu dosbarthu wythnos cyn y cyfarfod perthnasol.

Mae'r aelodau'n cytuno i fynychu cyfarfodydd misol, a fydd yn rhithiol hyd nes y cytunir yn wahanol. Bydd rheoleidd-dra cyfarfodydd yn cael ei adolygu wrth i'r gwaith fynd rhagddo. Bydd cyfarfodydd ychwanegol i drafod pynciau penodol hefyd yn opsiwn. 

Gellir ffurfio is-grwpiau i gefnogi gwaith y grŵp hwn. 

Gellir gwahodd sefydliadau neu unigolion perthnasol i ymuno â chyfarfodydd penodol i ddarparu gwybodaeth dechnegol arbenigol. Gwneir hyn drwy gytundeb y grŵp hwn neu drwy argymhelliad y Cadeirydd. 

Diben yr adolygiad yw darparu sylfaen dystiolaeth hygyrch i gefnogi'r broses o ymgysylltu â'r cyhoedd a gwneud penderfyniadau gan Lywodraeth Cymru. Felly, bydd tystiolaeth, papurau a chyflwyniadau arbenigol a ddaw i law'r grŵp, yn amodol ar eu cwblhau'n derfynol gan y ffynhonnell, yn cael eu cyhoeddi ar wefan Llywodraeth Cymru. Bydd modd priodoli'r dystiolaeth, fel sail ar gyfer casgliadau ac argymhellion, i'w ffynhonnell.

Fodd bynnag, bydd trafodaethau yn y grŵp yn cael eu cynnal yn gyfrinachol. Bydd canlyniad terfynol y trafodaethau yn cael ei gytuno gyda Llywodraeth Cymru cyn ei gyhoeddi. 

Caniateir i'r Cylch Gorchwyl hwn gael ei ddiwygio, ei amrywio neu ei addasu yn ysgrifenedig ar ôl ymgynghori, fel y cytunwyd gan yr aelodau. Gall y cynrychiolwyr a enwir o sefydliadau newid.