Grant Cymorth Profedigaeth Cenedlaethol 2025 i 2028

Mae Llywodraeth Cymru wedi datblygu fframwaith cenedlaethol ar gyfer darparu gofal profedigaeth yng Nghymru.

Mae'r fframwaith profedigaeth cenedlaethol yn cynnwys:

• yr egwyddorion craidd
• y safonau sylfaenol
• amrywiaeth o gamau gweithredu i gynorthwyo cynllunio rhanbarthol a lleol

Mae’r fframwaith yn cydnabod y bydd effeithiau’r pandemig yn para am amser hir. Mae'n cynnwys adran am ddysgu gwersi o COVID-19. Cynhaliwyd ymgynghoriad cyhoeddus gennym ar y fframwaith hwn.

Mae Grant Cymorth Profedigaeth gwerth £927,000 y flwyddyn (2025 i 2028) ar gael i helpu i weithredu'r fframwaith.

Gall sefydliadau'r trydydd sector wneud cais am y grant. Hoffem gefnogi prosiectau sy'n helpu i ddarparu gofal a chymorth profedigaeth. Mae angen i brosiectau gyd-fynd â 3 elfen y cymorth profedigaeth a ddisgrifir gan y Sefydliad Cenedlaethol dros Ragoriaeth mewn Iechyd a Gofal (NICE). Dylid trafod pob prosiect gydag arweinydd profedigaeth y bwrdd iechyd lleol ar gyfer yr ardal lle mae'r prosiect yn gweithredu, cyn i'r cais gael ei gyflwyno.

Croesewir cynigion gan sefydliadau unigol neu gan sefydliadau ar y cyd.

O ran y prosiect:

• rhaid iddo gael ei gyflawni yng Nghymru (yn lleol, yn rhanbarthol neu ar lefel Cymru gyfan) a rhaid i'r holl wasanaethau fod ar gael yn Gymraeg a rhaid iddynt gefnogi'r iaith a'i diwylliant
• rhaid iddo ychwanegu gwerth at ddarpariaeth gwasanaethau profedigaeth presennol ac ategu'r rhai a ddarperir eisoes gan y GIG, y sector cyhoeddus neu'r trydydd sector yng Nghymru
• dylai ddangos sut y bydd yn mynd i'r afael ag anghenion profedigaeth cymunedau Du, Asiaidd ac Ethnig Leiafrifol a grwpiau eraill nad ydynt yn cael eu gwasanaethu'n ddigonol ac sy'n agored i niwed, a sut y bydd hyn yn cael ei dystiolaethu
• dylai gynnwys darparu gwasanaethau i sicrhau mynediad teg i bawb, ni waeth beth fo'u statws economaidd-gymdeithasol neu unrhyw nodweddion gwarchodedig, gan hefyd fodloni nodau Dyletswydd Cydraddoldeb y Sector Cyhoeddus

Rhaid i brosiectau fynd i'r afael â chymaint â phosibl o'r meysydd blaenoriaeth a ganlyn:

• mynd i'r afael â bylchau o ran darparu gwasanaethau profedigaeth megis y rhai a amlygwyd yn y fframwaith cenedlaethol ar gyfer darparu gofal profedigaeth yng Nghymru
• bodloni gofynion y Llwybrau Profedigaeth Cenedlaethol yng Nghymru
• helpu i leihau amseroedd aros ar gyfer gwasanaethau profedigaeth yng Nghymru
• uwchsgilio arweinwyr cymunedol i ddatblygu sgiliau i helpu eu hunain ac eraill
• helpu anghenion pobl mewn profedigaeth mewn ieithoedd eraill, gan gynnwys Iaith Arwyddion Prydain
• helpu'r rhai yng Nghymru sy'n cyrraedd o dan y cynlluniau adsefydlu o Affganistan, a ffoaduriaid eraill y mae arnynt angen cymorth profedigaeth
• helpu'r rhai yr effeithir arnynt gan wrthdaro rhyngwladol megis y rhyfeloedd yn Wcráin a Phalesteina
• rhaid i’r sefydliad(au) sy’n gwneud cais am gyllid roi manylion eu profiadau blaenorol o weithio ym maes gofal a chymorth profedigaeth

Llenwch y ffurflen gais. Y dyddiad cau ar gyfer ceisiadau yw 27 Medi 2024.

Ceisiadau gan sefydliadau ar y cyd

Pan gyflwynir ceisiadau gan sefydliadau ar y cyd, mae angen yr wybodaeth a ganlyn:

• y sefydliad arweiniol
• tystiolaeth o femorandwm cyd-ddealltwriaeth

Rydym yn chwilio am gynigion ar gyfer mathau penodol o wasanaethau profedigaeth a/neu wasanaethau profedigaeth cyffredinol.

Byddwn yn ystyried ceisiadau ar sail gystadleuol. Byddwn yn dyfarnu cyllid i’r sefydliadau sy’n gallu dangos orau sut y mae eu cynigion yn cefnogi meini prawf y grant. Byddwn yn cynnal gwiriadau diwydrwydd dyladwy gyda'r ymgeiswyr llwyddiannus cyn cadarnhau'r dyfarniad grant.

Darllenwch wybodaeth ar sut rydym yn ymdrin ag unrhyw ddata personol rydych yn eu darparu mewn perthynas â’ch cais am grant neu eich cais am gyllid grant.