Estyniadau Glastir – Tir Comin: gwybodaeth ychwanegol

Sicrhewch eich bod yn darllen eich contract adnewyddedig yn ofalus. Bydd hefyd angen ichi ddarllen yr wybodaeth isod.

Os oes gennych unrhyw gwestiynau neu ymholiadau pellach, cysylltwch â Taliadau Gwledig Cymru.

Rydym am sicrhau bod y budd amgylcheddol gwerthfawr a ddarperir gan ddeiliaid y contractau presennol yn parhau.

Cyhoeddodd y Gweinidog Materion Gwledig ym mis Medi y byddai contractau Glastir yn cael eu hestyn tan ddiwedd 2023.

Bydd contractau Tir Comin Glastir a fydd yn dod i ben ar 31 Rhagfyr 2021 yn cael eu hestyn am flwyddyn. Byddant yn dod i ben ar 31 Rhagfyr 2022.

Bydd estyniad pellach o flwyddyn yn cael ei gynnig y flwyddyn nesaf, gan ddechrau ar 1 Ionawr 2023 ac yn dod i ben ar 31 Rhagfyr 2023.

Bydd y contract estynedig yr un peth â’ch contract presennol sy’n dod i ben ar 31 Rhagfyr 2021.

Bydd y contract yn cael ei gynnig drwy Taliadau Gwledig Cymru. Yna bydd angen ichi dderbyn y contract hwn drwy RPW ar-lein o fewn 21 diwrnod o ddyddiad cynnig y contract.

Bydd eich contract Glastir presennol yn dod i ben os nad ydych yn derbyn yr estyniad erbyn y terfyn amser.

Nid oes angen ichi gymryd unrhyw gamau os ydych yn dymuno gwrthod yr estyniad. Ni fydd y contract ar gael i’w dderbyn ar ôl i’r 21 diwrnod fynd heibio.

Os ydych yn penderfynu estyn eich contract, bydd angen ichi ad-dalu unrhyw daliadau a wnaed o dan:

• y contract gwreiddiol, neu’r
• contract adnewyddedig presennol, ac
• unrhyw gontract(au) estynedig neu adnewyddedig dilynol.

Nid oes unrhyw ymrwymiadau contract sy’n parhau, ond cofiwch:

• barhau i gadw llygad ar yr holl ofynion rheoleiddiol priodol, er enghraifft, Asesiad o’r Effaith Amgylcheddol (EIA) ar dir sy’n cael ei ddisgrifio’n gynefin
• y bydd angen ichi o bosib gael penderfyniad sgrinio EIA cyn ymgymryd ag unrhyw waith gwella amgylcheddol

Rhaid ichi barhau i hawlio eich taliad blynyddol drwy’r Elfen Tir Comin yn unol â’ch contract gwreiddiol.

Rhaid ichi hefyd sicrhau bod y cnydau a’r ardaloedd a ddatganwyd yn adlewyrchu’n glir y gofynion ar gyfer unrhyw opsiwn rheoli.

Mae eich contract adnewyddedig yn gontract newydd ac yn un ar wahân i’ch contract 5 mlynedd gwreiddiol.

Os bydd rheolau yn cael eu torri yn ystod cyfnod yr estyniad, byddwn yn eich cosbi drwy hawliadau yn ystod cyfnod eich contract adnewyddedig.

Os bydd y dystiolaeth yn dangos bod hyn yn digwydd yn ystod cyfnod y contract gwreiddiol, gallwn eich cosbi drwy hawliadau a dalwyd eisoes.

Gan ddibynnu ar ba mor ddifrifol yw’r tramgwydd, gallwn ddod â’ch contract gwreiddiol a/neu adnewyddedig i ben, ac adennill yr holl arian a dalwyd.

Gan fod hyn yn estyniad i’ch contract presennol, dim ond i dir sy’n rhan o’r contractau Glastir gwreiddiol y mae’n berthnasol.

Rhaid ichi roi gwybod i RPW am unrhyw newidiadau i aelodau’r Gymdeithas Pori o fewn 30 diwrnod.